કુદરતની કરામત

કુદરત તારી કરામત નિરાળી !

સર્જ્યા લતા, આમ્રકુંજ, વનરાજી,

ડુંગરો, કોતરો, બર્ફીલી પહાડી,

ઝીલ, ઝરણા ને સરિતાઓ વહાવી !

વારિ વહ્યાં મહીં એવા અનાડી,

ચંચલ સુંદરી મલપતી મદમાતી !

ચોગરદમ સાગર લહેરાવી,

અલ્લડ ઉછાળ્યા મોજાં માંહી !

જીવો વસાવ્યા વિચારી વિચારી,

ક્ષુધા, તૃષા તણી ગોઠવી બાજી,

આહારજાળ ગૂંથી એવી નિરાળી,

ના અધિક ના ન્યૂન બને જીવરાશી !

બસ... માનવી રચ્યો તેં એવો અવિચારી,

બાજી ખોરવી તુજ રચિત નિરાળી !

વા,જળ, જમીન કીધાં ધૂળધાણી,

વનમંજરી પર કરવત ચલાવી.

થયો ઉદ્દંડ કાજ ધનરાશિ,

લાલચી, લોલૂપ મહા માયાવી !

કરશે ક્વચિત તુજનીય હરાજી !

તવ સર્જન થશે તુજ પર હાવી !

મંદ મંદ શું મલકે મુરારી ?

મનુજ અશ્વ લગામ ખીંચો વનમાળી !