ଲାବଣ୍ୟ ସୁନ୍ଦରୀ

ଲାଜେଇ ଲାଜେଇ ଆଗୋ ଲାଜବତୀ

ଲାଜକୁ ଭୂଷଣ କରିଛ

ମଦନ ଜର୍ଜର ନୟନରେ ଶର

ପେଷି ବୁକୁ ଭେଦ କରୁଛ     ll

ମୁରୁକି ମୁରୁକି ହସ ଆଢୁଆଳେ

ମଧୁରସ ଲୁଚି ରହିଛି

ସଧିର ମଳୟେ ଓଢଣୀଟା ଉଡ଼ି

ଗୁପତକୁ ଖୋଲି ଦେଉଛି     ll

ରତ୍ନଆଭୂଷିତା ଚମ୍ପକମଣ୍ଡିତା

ଲକ୍ଷେ ଚନ୍ଦ୍ରଫୁଲ ସମ୍ଭାର

ପୁରିଲା ପୁରିଲା ବକ୍ଷ ବିଭାବରୀ

ସୁରଭି ଲେପନ ବେଭାର     ll

ଏପରି ରମଣୀ ସୁଦକ୍ଷ ବିନ୍ଧାଣୀ

ଚାରୁକଳା ଚିତ୍ତେ ଚିନ୍ତିଲା

ମନସିଜଜୟ ସୁରମ୍ୟ ପ୍ରତିମା

ସଜେଇ ସାଜେଇ ଗଢିଲା    ll

ପାଖେଇ ପାଖେଇ ଆସୁଥିଲି ଚାହିଁ

ଲାବଣ୍ୟସୁନ୍ଦରୀ ଅଞ୍ଚଳ

ଅଜାଣତେ ଦୃଷ୍ଟି ପଡିଲା ଉରଜେ

ହୃଦୟ ସ୍ପନ୍ଦିଲା ଚଞ୍ଚଳ       ll

ସରସ ବିନ୍ୟାସ କୁନ୍ତଳର କାନ୍ତି

ଗଭାରେ ମଞ୍ଜୁଳ ଗଜରା

ଚପେଇ ଚପେଇ ଚିବୁକେ ଚୁମ୍ବନ

ପିଆଇଲା ମଧୁ ମଦିରା      ll

ଧସେଇ ଧସେଇ ଅନ୍ତର ଗର୍ଭରୁ

କାମ ହେଲା ଉଦ୍-ଗିରଣ

ସୁକୁମାର ଆହା ମଉନ ଯୌବନ

କାମିନୀରେ ହେଲା ବିଲିନ     ll