ଚାଲ ଆମେ ଭୋଟ୍ ଦେମା

ପାଁଚ୍ ବଛରେ ଆଏସି ଥରେ

ନେତା ମନ୍ତ୍ରୀକର୍ ଭୋଟ୍,

ଗାଦିଟେ ପାଏମୁଁ ବଲି

ଉଡେଇ ଦେସନ୍ ନୋଟ୍ ॥

ମଦ୍ କୁକୁରା ଚିଂଗରା ଖୁଏଇ

ଦେସନ୍ ଲୁକ୍'କୁ ଚହରେଇ,

ପଏସାଖିଆ, ଉଦୁର୍' ଛିଆ ପଏସାର୍ ଲୁଭେ

ନାଇଁ ପାରେ ନିଜକେ ଠହରେଇ ॥

ଆମର୍ ଟଁକା ଆମର୍ ନୁଁ ନେଇ

ଦେସନ୍ ଆମକୁ ଭୁରତେଇ,

ଭୋଟ୍ ସର୍ଲେ ଇନୁଁ କିଏ କାହାକେ ପଚରେ

ଦେସନ୍ ପଛକେ ଥୁର୍ଲେଇ ॥

ପଚରେଇ ଦେଖ ଟିକେ ନିଜର୍ ମନ୍ କେ

କେଭେ ଦେସି କାଏଁ ନେତା ଦେଖା,

ଭୋଟ୍ ଗୁଟକର୍ ଲାଗି ଘର୍ ଦୁଆର୍ ବୁଲି

ଭୋଟ୍ ମାଗୁଥିସନ୍ ହେଇ ଜଖା ॥

ନାଇଁ ଜାନି ତୁମେ ନେତାକଁର୍ ଫାନ୍

ଥିସନ୍ ଦଲ୍ ବାନିକେ ବାନି,

ଭୁଜି ଖାଏସନ୍ ଗୁଟେ ଥାଲି ନେଁ

ସମିଆଁ କାଲ୍ ଜାଗା ଜାନି ॥

ହାତୀ ଦେମି ଘୁଡା ଦେମି ବଲି

ବନେଇ ଦେବେ ଥେତା,

ଭୋଟ୍ ଆଘୁଁ ବିକାଶ୍ ନାଁ ଥି

କହେବେ କେଡ଼େ କେଡ଼େ କଥା ॥

ନେତା କେନ୍ ଜାନସି ଚାଷୀର୍ ଦୁଖ୍

ବୁଢା,ବୁଢିକର୍ କାର୍ ମନ୍,

ପରଜା ମାଗସି ଭଲ୍ ଶାସନ୍ ଟିକେ

ନାଇଁ ମାଗେ କେଭେଁ ଧନ୍ ॥

ନାଇଁ ଖାଉଁ ଆମେ କାହାର୍ ଟଁକା

ନାଇଁ ବିକୁ ଆମର୍ ଭୋଟ୍,

ଏନ୍ତା ନେତା ଟେ ବାଛମୁ ଆମେ

ନାଇଁ ଥିବା ଯେନ୍ତା ଖୋଟ୍ ॥

ଯେନ୍ ନେତା ପରଜାର୍ ଠାନେଁ

ଦୁଃଖେ ସୁଖେ ହେବା ଠିଆ,

ସେନ୍ତା ନେତାକୁଁ ଭୋଟ୍ ଦେମା

ଆଜିର୍ ଦିନେଁ କରୁଁ କିରିଆ ॥

ଚେତ ଦଦା ଭାଏ ମୋର୍ ଲେଖା ପଢି

ଭୋଟ୍ ଆମର୍ ଅଧିକାର୍,

ଆମର୍ ହାତେ ପରେ ଆମର୍ ଶାସନ୍

ଆମର୍ ହାତେ ସର୍କାର୍ ॥

ଲେଖା ଟିକେ ଥି ସମକୁ ମୋର୍

ଏତକି ବିନତୀ ଥାଉ,

ଆମର୍ ଭୋଟ୍ ଟା ବିକ୍ରି ନାଇଁ ହଇ

ଅସଲ୍ ଲୋଗ୍ ଟା ପାଉ ॥

ଗଣତନ୍ତ୍ରର୍ ଜଏ ହେଉ

ଗଣତନ୍ତ୍ରର୍ ଜଏ ହେଉ ॥