" बाप "

माय माझे जीवन

बाप जीवनाचा आधार ।

राबतो घरासाठी

उचलतो सगळाच भार ।

माय लोण्याचा गोळा

बाप कठोर वाटे फार ।

झिजवी देह सारा

घराला कष्ट त्याचे अपार ।

होता तान्हुला बिमार

मायेला लागे आसवांची धार ।

ठेवून दगड छातीवर

बाप निभवी सारे आचार ।

प्रसंग येता कसा कसा

बाप करी संकटाशी हात चार ।

आच हृदयात त्याच्या

परि चेहरा त्याचा निर्विकार ।

येता वादळ किती कशाचे

होई उभा तो होऊन दार ।

झाड वडाचे जसे तो

सांभाळी आपुला परिवार ।