കിതക്കുന്നവർ

അർദ്ധരാത്രി... ഏകദേശം ഒരു മണിയോളം ആയിരിക്കണം, ഇരുട്ടാണ്... വല്ലാത്ത ഇരുട്ട്... ആകെ ഇരുട്ട്... പത്തു സെന്റിമീറ്റർ നീളവും അഞ്ചു സെന്റിമീറ്റർ വീതിയും ഉള്ള ആ ചതുരകട്ട മാത്രം കിടന്നു മിന്നുന്നു... ഇരുട്ടിലെ ഏക വെളിച്ചം. പുറത്തുള്ളതിനേക്കാൾ ഇരുട്ടുള്ള വെളിച്ചം. ഒരു നീലവെളിച്ചം, ഇരുട്ടിന്റെ പ്രതിഫലനങ്ങൾ ഉള്ള ഒരു നീലവെളിച്ചം.

ആ ഡിസംബർ മാസത്തിലെ തണുപ്പിന് പുറമെ എസിയുടെ ഉഗ്രൻ തണുപ്പിലും അവൻ വിയർത്തു. ഇന്നലെ മുതൽ ചെറുതായി മുളച്ചു തുടങ്ങിയ മീശരോമത്തിൽ വിയർപ് പൊടിഞ്ഞു, കുഞ്ഞു നിക്കർ നനഞ്ഞു. നെഞ്ചിലെന്തോ എടുത്തേറ്റിയ പോലെ അവൻ കിതച്ചു... എന്നിട്ടും ആ വെളിച്ചത്തിലെ ഇരുട്ടിലേക്ക് നോക്കികൊണ്ടേയിരുന്നു. അതാ ആ അഞ്ചു കട്ടകൾ പതിയെ കുറഞ്ഞു മൂന്നെണ്ണമായി... ദേഷ്യം!! നെറ്റ്‌വർക്ക് പ്രോബ്ലം.

ആ അഞ്ചു കട്ടകളുടെ തിരിച്ചുവരവിനായുള്ള കാത്തിരിപ്പിന്റെ ചെറിയ ഇടവേളയിൽ അവൻ ഓർത്തു... കൂടെ പഠിക്കുന്ന മൂക്കുത്തിയിട്ട കൂട്ടുകാരിയെ, അവളുടെ ഉരുണ്ട ശരീരത്തെ, മുടിയെ, മാറിടത്തെ, ഒടുവിൽ യോനിയെ... അവളോട് പ്രണയമാണോ അറിയില്ല... പിന്നീടും ഓർത്തു ക്ലാസ്സ്‌ടീച്ചറെ, അവധിക്ക് വന്നെത്താറുള്ള മാമന്റെ മകളെ... അവളുടെ ചിരിയിലെ പ്രണയത്തെ, സ്വന്തം അനുജത്തിയെ, ചേച്ചിയുടെ മൂന്നു വയസ്സുള്ള മകളെ, ഒടുവിലായി അമ്മയെ. എല്ലാവരുടെയും ചുണ്ടുകളെ ഓർത്തപ്പോൾ അമ്മയുടെ കണ്ണുകളെയാണ് ഓർത്തത്... ഒരൽപ്പം കണ്ണീരു പൊടിഞ്ഞിരുന്നോ? ഇല്ല സംശയം മാത്രം.

ഭാഗ്യം!!അഞ്ചു കട്ടകളും തെളിഞ്ഞു, അവൻ അമ്മയുടെ കണ്ണുകളെ മറന്നു വീണ്ടും കിതച്ചു കൊണ്ടിരുന്നു... വിയർത്തു കൊണ്ടിരുന്നു. ഒരു മണിക്കൂറോളം ആ ചതുരനീലവെളിച്ചം തിളങ്ങി നിന്നു... ഉറക്കം വരുന്നുണ്ട്, പോൺ വീഡിയോ റെക്കമെന്റഷൻ നോട്ടിഫിക്കേഷൻ എല്ലാം നീക്കം ചെയ്ത് ഫോൺ ചാർജിലിട്ട് അവൻ ഉറങ്ങി.

സ്വപ്നം കണ്ടു... ഇരുട്ട് നിറഞ്ഞ ചതുരവെളിച്ചം, മാറിടം, യോനി, കലങ്ങിയ കണ്ണുകൾ, മൂക്കുത്തി, അടിവസ്ത്രങ്ങൾ, കിതക്കുന്ന പട്ടി, വിശിഷ്ടമായ ഛായചിത്രങ്ങൾ, ഗിത്താർ, നഗ്നയായ സ്ത്രീയെ ചവിട്ടിയരക്കുന്ന കാലുകൾ, കൊലക്കയർ, ചിത... ഇതിന്റെയെല്ലാം അസ്വസ്ഥവും മൃഗ്ഗീയവും ആയ ആവർത്തനം...

വീണ്ടും കണ്ടു സ്വപ്നം... അവളെ... അവളറിയുന്നു... അവളാഗ്രഹിക്കുന്നു... കിതപ്പിൽ പ്രണയം ഉണ്ടായിരിക്കണം... അല്ലാതെ കിടന്നു കിതക്കുന്നവർ അവളെ അലോസരപ്പെടുത്തുന്നു, അവനെയും അവൾ നോക്കുന്നു, അവൻ നഗ്നനാവുന്നു അവളുടെ മുന്നിലൂടെ നടക്കുന്നു, ഒളിക്കാൻ ശ്രമിക്കുന്നു... അവൾ ലൈംഗികത വെള്ളം പോലെ ശുദ്ധമാണ് എന്ന് കുട്ടികളെ പഠിപ്പിക്കാൻ ആൾക്കൂട്ടത്തോട് പറയുന്നു... അവളെ കല്ലെറിയുന്നു!! ആണിനെയും പെണ്ണിനേയും ഒരു തുലാസിൽ നിർത്തുന്നു!! ഒരേ കയറിൽ കെട്ടിതൂക്കുന്നു!!! അവളെ വീണ്ടും കല്ലെറിയുന്നു!!!  അവൻ അതെല്ലാം നഗ്നനായി അസ്വസ്തനായി ഒളിച്ചുനിന്നു കാണുന്നു... കിതക്കുന്നു!!! കിതച്ചുകൊണ്ടുതന്നെ അവൻ ഞെട്ടി ഉണർന്നു...

കുളിച്ചു, കഴിച്ചു, കിതച്ചു കൊണ്ടു തന്നെ, അടിവസ്ത്രങ്ങൾ അഴയിൽ തൂക്കിയത് കണ്ടു തളർന്നു. കുറച്ചിടെയായി ഒരു 'പുരുഷനാ'യി എന്നൊരു ഭാവം അവനെ ഭരിക്കുന്നു. എല്ലാവരും പറയപ്പെടുന്ന 'പുരുഷസങ്കല്പ'ത്തെ അവൻ വല്ലാതെ ആരാധിക്കുന്നു, സ്വയം അഭിമാനിക്കുന്നു. അമ്മയെയും അനിയത്തിയെയും പെൺസുഹൃത്തുക്കളെയും ഭരിക്കുന്നു.... അവരതെല്ലാം മിണ്ടാതെ അംഗീകരിക്കുന്നു!! മമ് ചിലപ്പോളവൻ 'എല്ലാവരും പറയപ്പെടുന്ന' 'പുരുഷനാ'വുകയായിരിക്കാം... എല്ലാ മൗനാനുവാദങ്ങളും 'ആ പുരുഷസങ്കല്പ'ത്തെ ഊട്ടിയുറപ്പിച്ചുകൊണ്ടേയിരിക്കുന്നു...

അതെല്ലാം പോട്ടെ! ഇന്നവൻ തളർന്നിരിക്കുന്നു... അമ്മയെ നോക്കിയതേയില്ല. കിതച്ചുകൊണ്ട് സ്കൂളിൽ പോയി... ചാർട്ട് വർക്കിൽ ചിത്രം വരക്കുമ്പോൾ കൈ വിറച്ചു, ഗിത്താർ വായിച്ച് പാട്ടു പാടുമ്പോൾ ശബ്ദം ഇടറി, എങ്കിലും കിതക്കാൻ അവൻ മറന്നില്ല. കൂട്ടുകാരിയുടെ മൂക്കുത്തി കണ്ട് വീണ്ടും കിതച്ചു... കിതച്ചുകൊണ്ട് അടുത്തു വന്നിരുന്ന മറ്റൊരു സുഹൃത്ത് അവനോട് എന്തോ തിരക്കി... കലങ്ങിയ കണ്ണുകൾ കണ്ടിട്ടും... അവളെ കല്ലെറിയുന്നതു കണ്ടിട്ടും... ആൾക്കൂട്ടത്തിനിടയിൽ നഗ്നനായിട്ടും... ഊർജം ഇല്ലാതായിട്ടും... ആത്മധൈര്യം നഷ്ടപ്പെട്ടിട്ടും... വികൃതമായ ചിരിയോടെ അവൻ വീണ്ടും കിതച്ചു!!!