వదిలేసేయ్

ఏనిమిషం ఏమౌనో దైవానికి వదిలేసేయ్

ఏ భారం మోయాలో కాలానికి వదిలేసేయ్

తప్పులేవి చేయనట్టి మనిషుండడు లోకంలో

ఏ పాపం చేశావో కర్మానికి వదిలేసేయ్

ఎంత నీవు శ్రమించినా కలిసి రావటం లేదా

ఏ ఫలితం ఇస్తుందో భాగ్యానికి వదిలేసేయ్

లక్ష్యాలను చేరేందుకు ఆటంకం ఉండవచ్చు

ఏ గమ్యం చేరాలో పయనానికి వదిలేసేయ్

ప్రతిరోజూ వినిపించే పుకార్లనే నమ్మవద్దు

ఏది జరిగి ఉంటుందో సత్యానికి వదిలేసేయ్

ఎంత ఘనత నీకున్నా నీవెపుడూ చెప్పరాదు

ఏం గొప్పను చెబుతుందో సంఘానికి వదిలేసేయ్

ప్రాణంపై తీపినేది ఎంతున్నా ఓ 'హంసా'

ఏక్షణాన వస్తుందో మరణానికి వదిలేసేయ్