స్వార్ధం
స్వార్ధం
ఆ మోహనాంగి మోజులోపడి
అమాయకుడు కూడా
హంతుకుడిలా మారిపోతున్నాడు
సమాజ గొంతును తడిగుడ్డతో కోసేస్తూ...
ఆ కాలకూట విషాన్ని తనువంతా పూసుకుని
అమృతమయమైన హృదయంలో
చితిని పేర్చుకుంటున్నాదు
ప్రతీకారాగ్నిని సృష్టించుకుంటూ..
ఆ మాయావిని మనసులోకి ఆహ్వానించి
బలమైన పునాదిని త్రవ్వుకుని
ఒంటరి సామ్రాజ్యాన్ని నిర్మించుకుంటున్నాడు
బంధపు తాళ్లను పుటుక్కున తెంపేసుకుంటూ...
ఆ చిత్రమైన రెక్కల పక్షినెక్కి
మిన్నుకు చేరాలని అర్రులుజాస్తూ
అందనంత ఎత్తుకు ఎగిరేస్తున్నాడు
కిందపడితే నూకలు చెల్లిపోతాయని
తెలియని స్థితిలోకి జారుకుంటూ..
ఆ స్వార్ధపు గొడ్డలిని చేతబట్టి
తను కూర్చున్న కొమ్మను
తానే నరికేసుకుంటున్నాడు
మూర్ఖత్వపు ముడులను బిగించుకుంటూ..
ఆ బుగ్గిని నెత్తికెత్తుకుని
పచ్చని పుడమితల్లిగుండెలపై కాంక్రీటు కోటింగ్ వేసి
తన సమాధిని తానే నిర్మించుకుంటున్నాడు
ఆలంబనకు చరమ గీతం పాడుతూ...