నవీన కవిత్వం
నవీన కవిత్వం
అక్షరాల బొడ్డుముడి సరిగా వేయకపోయినా
పదాల పుల్లలు ఒంపు సొంపుగా లేకపోయినా
గూగులమ్మ నుండి ఎరువు తెచ్చుకున్న
వాక్యాల దారం గట్టిగా కట్టేసి
ఎగిరేస్తున్నాయి కవితా పతంగాలు
అద్దం పద్ధం లేని ప్రాసల తోకలు తగిలించుకుని
అవే అందంగా భ్రమించి
ఆకాశానికి అర్రులు జాస్తూ
అంతరీక్షపు అంచుకు చేరాలని
ఎగిరేస్తున్నాయి ఉరకలేస్తున్న ఉత్సాహంతో..
లెక్కకు మిక్కిలి పుట్టగొడుగుల్లా పుట్టుకొస్తూ
సంఖ్యా బలం పెంచుకుని
మిన్నును చుట్టుముట్టి
కొత్త పుంతలు తొక్కుతున్నాయి
పాత సంస్కృతికి పాతరేస్తూ..
అంతకంతకూ సాహిత్య విపణిలో విహరిస్తూ
నాణ్యంగా తీరు దిద్దుకున్న
కవన పతంగాలను సైతం వెక్కిరిస్తూ
తమ ఉనికిని చాటుకుంటున్నాయి
ఎందుకంటే అవి నవీన తొడుగులు కదా!!