దేవుడికి మొట్టికాయలు

అమ్మా

నువ్వు వెళ్ళిపోయావనుకున్నా

నిర్జీవమైన నీ దేహాన్ని చూసి

నా కన్నీటికి కూడా బాధేసింది

తింటున్నా తిరుగుతున్నా

పని చేసుకుంటున్నా

నిన్ను గుర్తు చేసుకోకుండా గడిపేస్తున్నా

నే నిన్ను మరచిపోయాననుకున్నా

నా పిచ్చిగానీ

నే నిన్ను మరచిపోలేదు

నువ్వు లేవన్న సంగతి మరచిపోయాను

అవును

నన్ను కనడానికి ప్రాణం పణంగా పెట్టిన నువ్వు

ఇలా కాలం తీరిందని 

నన్ను వదిలి ఎలా వెళ్లగలవ్

నాకు తెలుసు

మా పిల్లాడి దగ్గరి నుండి నన్ను దూరం చేస్తావా

హన్నా! దేవుడూ

ఎంత ధైర్యం నీకు అని

దేవుడు వాళ్ళ అమ్మకు చెప్పి

దేవుడికి మొట్టికాయలు వేయించి

(మరే!

దేవుడు కూడా వాళ్ళ అమ్మ ముందు చిన్న పిల్లాడేగా)

నా నీడలా నా ధైర్యంలా

నేను పొందే ఆశీర్వాదంలా

నాతోనే ఉన్నావ్ కదూ అమ్మా

ఉంటావ్ కదూ అమ్మా

అమ్మా నువ్వు తోడు ఉంటానంటే

నాకు భయం వేయదమ్మా

ఒక్కసారి చెప్పమ్మా