బాల్యమేగ

ఎవరికైన అందమైన..లోకమంటె బాల్యమేగ..!

అమ్మప్రేమ లోగిలిలో..దీపమంటె బాల్యమేగ..! 

వీరివీరి గుమ్మడిపండు..వీరిపేరేమిటండి..

మరువతగని అనుభవాల..కావ్యమంటె బాల్యమేగ..!

ఆ బొమ్మల పెళ్లిళ్ళు..ఆ తొక్కుడు బిళ్ళాటలు.. 

చీకుచింత లేని మనసు..చిత్రమంటె బాల్యమేగ..! 

రాములోరి గుడిలో వడపప్పూ పానకాలు.. 

ప్రసాదాల కరువులేని..పర్వమంటె బాల్యమేగ..! 

బడిబెత్తం తప్పించుకు..చేలవెంట ఏం పరుగులొ.. 

బ్రతుకుబాట గొడవెరుగని..భాగ్యమంటె బాల్యమేగ..!