అమ్మ చూపు

అద్భుతమౌ ప్రేమపూల..వానంటే అమ్మచూపు..! 

చదువు నేర్పు మౌనమైన..భాషంటే అమ్మచూపు..! 

అమృతమేదొ అందుతుంది..గోర్వెచ్చని ఆ స్పర్శన.. 

వెన్నునిమిరి నిదురపుచ్చు..పాటంటే అమ్మచూపు..! 

కాలానికి ఎదురీదే..జ్ఞానమిచ్చె స్థన్యమిచ్చి.. 

సర్వస్వం తానయ్యే..కోటంటే అమ్మచూపు..! 

సేవలెన్ని చేసేనో..తిరుగేమీ కోరకుండ.. 

మైమరపుల కోటినదుల..ఊటంటే అమ్మచూపు..! 

నాన్న కోపపడుతుంటే..అడ్డుపడును మాటాడక.. 

కమ్మనైన పున్నమింటి..తేటంటే అమ్మచూపు..! 

తన తీరును ఛాదస్తం..అంటావా మాధవుడా.. 

అపురూపతా గగనాల..నీడంటే అమ్మచూపు..!

ఊరు మరచి ఒళ్ళుమరచి..నిద్దురేల మాధవుడా..

చలాకీగ నువ్వుంటే..అమ్మ ఇంట ఉన్నట్లే..!