ଚାନ୍ଦା

ଦିନସାରା ରାଜରାସ୍ତା ଉପରେ ଚାଲିଥିଲା ବଟି ଆଦାୟ ଦଶରା ପୂଜା ଚାନ୍ଦା ଆଳରେ । ବାନର ସେନା ଲଙ୍କାକୁ ସେତୁ ବାନ୍ଧିଲା ପରି ଏକାଠି ହୋଇଥିଲେ ଜଗଦମ୍ବା କ୍ଲବର ସଦସ୍ୟ ମାନଙ୍କ ସହ ଅନେକ ଚେଙ୍ଗେଡା ଆଉ ବଟକରା । ଖୋଦ ବିଧାୟକଙ୍କ ଗାଁ ପୂଜା କୋଉ ପୁଲିସ ନିୟମର ଭୟ ନଥିଲା ।  ରାସ୍ତା ଉପରେ ଅଟକି ଥିଲା ଅନେକ ଛୋଟ ବଡ ଗାଡି ଚାନ୍ଦା ଦେଉ ନଥିବା ଲୋକ ମାନଙ୍କ ସହ ଯୁକ୍ତି ତର୍କରେ ବ୍ୟସ୍ତ ଥିଲେ କିଛି କ୍ଲବର ସଦସ୍ୟ । ଅଟକିଥିବା ଗାଡି ମାନଙ୍କ ପଛରେ ଲାଗିଥିଲା ଗୋଟେ ଆମ୍ବାସଡର କାର ଯେଉଁଥିରେ ମେଡିକାଲକୁ ନିଆ ଯାଉଥିଲା ଜଣେ କ୍ୟାନସର ରୋଗରେ ପୀଡିତ ଛୋଟ ଛୁଆଟିକୁ । ପିଲାଟିର ବାପା ମା' କେହି ନଥିଲେ ତାକୁ ମେଡିକାଲକୁ ନେଉଥିଲେ ସେ ରହୁଥିବା ମମତା ଅନାଥ ଆଶ୍ରମର କିଛି ସଦସ୍ୟ । ଗାଡି ଛାଡିବାକୁ ଯେତେ ନେହୁରା ହେଲେ ବି ଅଲଗା ଗାଡିବାଲାଙ୍କ ସହ ଯୁକ୍ତି ତର୍କ କରୁଥିବା କ୍ଲବର ସଦସ୍ୟ ମାନଙ୍କ ପାଖରେ ତାଙ୍କ ଭାଷା ପହଞ୍ଚି ପାରୁନଥିଲା । ଯା' ହେଉ ଶେଷରେ କ୍ଲବ ସଦସ୍ୟ ମାନେ ବୁଝିଲେ ତାଙ୍କ ଗାଡି ଗଡିଲା ପ୍ରାୟ ଅଧଘଣ୍ଟା ବିଳମ୍ବରେ ।

ପରଦିନ ସକାଳେ ସଦସ୍ୟ ମାନେ କ୍ଲବରେ ଗତ ଦିନର ଚାନ୍ଦାର ହିସାବ କରୁଥିଲେ ଆଜିର ଖବର କାଗଜ ଉପରେ କାହାର ନିଘା ନଥିଲା ଯେଉଁଥିରେ ବଡବଡ ଅକ୍ଷରରେ ପ୍ରଥମ ପୃଷ୍ଠାରେ ଛପିଥିଲା ... ପୁଣି କ୍ୟାନସର ନେଲା ଜୀବନ । ମମତା ଅନାଥ ଆଶ୍ରମର ଶିଶୁ ଆଖି ବୁଜିଲେ ସବୁଦିନ ପାଇଁ । ବୋଧେ ହିସାବ ଛିଡୁ ନଥିଲା ତେଣୁ ସମସ୍ତେ ପରସ୍ପର ଦୋଷାରୋପରେ ବ୍ୟସ୍ତ ଥିଲେ । ଏବେ ବି ଟିଭି ଟେବୁଲ ଡ୍ର ରେ ପଡିଥିଲା ଗତ ବର୍ଷ ଖବର କାଗଜରେ ବାହାରି ଥିବା ଖବର ... ମମତା ଅନାଥ ଆଶ୍ରମର କ୍ୟାନସର ପ୍ରପୀଡିତ ଶିଶୁର ଚିକିତ୍ସା ନିମନ୍ତେ ଜଗଦମ୍ବା କ୍ଲବର ପାଞ୍ଚ ହଜାର ଅର୍ଥରାଶି ଦାନ ।