ଅଫରକ୍
ଅଫରକ୍
(୧)
- ଟିକେ ଗଲ ଗଲ । ଲୁଣ ସରିଗଲା । କହିବାକୁ ଭୁଲିଯାଇଥିଲି । ସାମ୍ନା ଦୋକାନରୁ ପାକଟିଏ ନେଇଆସ ।
- ରୁହ ମଁ । ସେଭେନ୍ଥ୍ ପେ' ହିସାବଟା ଟିଭିରେ ଦେଉଛି । ଭଲକି ବୁଝିଲାବେଳେ ଡିଷ୍ଟ୍ରବ୍ !
- ଆରେ ! ଅଧାରନ୍ଧା ହେବନା କଣ ? ଅଲଣା ଖାଇବ କହିଦେଉଛି ।
- ପୁଅକୁ ପଠା ।
- ତା' ପରୀକ୍ଷା ଦି'ଦିନ ଆଉ । ବୁଝିଲ ?
- ହଁ ମଁ । ଦଶ ମିନିଟରେ କଣଟା ଅଧିକା ପଢିପକେଇବ ? ସୋନୁ ! ଆସିଲୁ ଏଠାକୁ !
- ହଁ ପାପା ।
- ଗଲୁ , ଲୁଣ ପ୍ୟାକେଟଟେ ଆଣିଦେବୁ ।
- ଓକେ । କଣ୍ଡିସନ୍ ଆପ୍ଲାଇ ।
- କଣ ?
- ସରଭିସ୍ ଚାର୍ଜ !
- ମା ବାପାଙ୍କୁ ହେଲପ୍ କରିବାକୁ ବି ଲାଞ୍ଚ ?
- ଓକେ । ମୁଁ ଯିବିନି । ମୋର ଏକଜାମ୍ ଅଛି ।
- ଯା ଯା । କଣ ଗୋଟେ ଆଣିଆସିବୁ ନିଜପାଇଁ । ଯା ।
ପଚାଶ୍ ଟଙ୍କା ଧରି ଗଲା ଲୁଣ ଆଣିବାକୁ । ଫେରିଆସି ହିସାବ ଦେଲା ,-
- ଲୁଣ ଟୋଣ୍ଟି , ଅମୂଲ୍ କୁଲ୍ ଟୋଣ୍ଟି , କାଡବୋରିଜ୍ କ୍ୟାଣ୍ଡି ଟେନ୍ । ଫିନିସ୍ ।
- ଫିନିସ୍ ?
- ୟେସ୍ । ନେବ କି ଚୋକଲେଟରୁ ଟିକେ ବାଇଟ୍ ?
- ନା ନା ତୁ ଖାଆ । ମୁଁ ବଡପିଲା ।
(୨)
ବେଳେବେଳେ ଛକର ସେ ବିହାରୀ ଠେଲାରୁ ଜଳଖିଆ ଘରକୁ ଆଣେ । ସହର ପ୍ରସିଦ୍ଧ ବରା ଘୁଘୁନି ତାଠେଇଁ ମିଳେ । ଆଜି ଦେଖିଲି , ପିଲାଟାଏ ଦେବାନେବା କରୁଛି । ଚାଇଲଡ୍ ଲେବର୍ !
ଆଗ୍ରହରେ ପଚାରିଲି -
- କୌନ୍ ହେ ?
- ଛୋଟା ଲଡକା ହେ ବାବୁ ।
- ସ୍କୁଲ୍ ନେହିଁ ହେ କ୍ୟା ?
- ହରରୋଜ୍ ଯା'କେ କ୍ୟା କରେଗା ? ୟାହାଁ ଶିଖେଗା ତୋ କମାଏଗା , ଖାଏଗା । ଆପନା ବଚା ହେ । କୋଇ ବାଲ୍ ଶ୍ରମିକ ନେହିଁ ବୋଲ୍ ସକତା ।
ଏବେ ପିଲାଟିକୁ ପଚାରିଲି -
- ବାବାଙ୍କୁ ମନା କରୁନୁ ?
ଚିହିଁକି ଉଠିଲା ଅଧା ଓଡ଼ିଆ ବିହାରୀ ।
- ଏସେ ଥୋଡି ରାଜିହୁଆ ନିକ୍କମ୍ମା । ଘୁସ୍ ଦେନା ପଡା ବାବୁ ।
- ଘୁସ୍ ? ମା ବାପାଙ୍କୁ ହେଲପ କରିବାକୁ ବି ଲାଞ୍ଚ ?
- ହଁଅଁଅଁ ! ଓ' ଖିଲୋନା ବାଲାସେ ପାଞ୍ଚ୍ କା ଏକ୍ ତୁରତୂରୀ ଲାୟା ହେ । ଦିଖାଓ ବାବୁକୋ !
ପିଲାଟି ତା' ପ୍ୟାଣ୍ଟ ପକେଟରୁ , ଗୋଟେ ପ୍ଲାଷ୍ଟିକ୍ ଚଢେଇ ବାହାରକରି , ଲାଞ୍ଜକୁ ମୁହଁରେ ଦେଇ ଜୋରରେ ଫୁଙ୍କିଦେଲାରୁ , ଚଢ଼େଇର ଦୁଇକାନରୁ ସଟସଟ୍ ଦୁଇଟି ଶିଙ୍ଗ ବାହାରିଗଲା ।
ତା' ପେଁକାଳି ଶବ୍ଦରେ ମୋ କାନ ଯେମିତି ବଧିରା ହୋଇଗଲା !!!!
( ଆବଶ୍ୟକ ଅନୁଯାୟୀ ହିନ୍ଦୀ / ଇଂରାଜୀ ଶବ୍ଦର ବହୁଳ ବ୍ୟବହାର କରାଯାଇଛି )
ଅମିୟ ବେଜ୍ , ଘଟଗାଁ , କେନ୍ଦୁଝର