ଅନନ୍ତ ପ୍ରତୀକ୍ଷା
ଅନନ୍ତ ପ୍ରତୀକ୍ଷା
ଅନନ୍ତ ପ୍ରତୀକ୍ଷା
ମନୋଜ ଦଳବେହେରା
ଅନେକ ପ୍ରତୀକ୍ଷା ପରେ କାଳୀ କନ୍ୟାଟି ଭାଗ୍ୟରେ ବିବାହ ଯୋଗ ଘଟିଲା I କିନ୍ତୁ ସେତେବେଳକୁ ଆଷାଢ଼ ମାସର ଶେଷ ତିଥି I ଘୋଟି ଆସୁଥିବା କଳାମେଘର ରୂପ ଦେଖି କନ୍ୟାପିତା ମନେ ମନେ ଖୁସି ହେଉଥିଲେ ; ବର୍ଷା ହେଲେ ଲୋକ ଆସିବା କମି ଯିବେ I ବରଯାତ୍ରୀ ବି I ଯେତିକି ଖାସି କଟା ଯାଇଛି ସେତିକିରେ ଭୋଜିଟା ଚଳିଯିବ I ନହେଲେ ମାଂସ ଦାମ ଯାହା ହେଲାଣି !
ଏ ଯାଏଁ ହାଣ ଅପେକ୍ଷାରେ ଥିବା ଖାସିଟି ଆକାଶକୁ ଚାହିଁ ବର୍ଷାର ଆଗମନୀରେ ଉତଫୁଲ୍ଲିତ ହେଉଥିଲା I ଢେର୍ ଦିନରୁ କଅଁଳିଆ ଡାଳପତ୍ର ଖାଇବାକୁ ମିଳି ନାହିଁ I ଏଥର ପ୍ରଚୁର ମିଳିବ I
ପ୍ରତୀକ୍ଷାର ଅନ୍ତ ଘଟାଇ ବର୍ଷା ଆରମ୍ଭ ହୋଇଗଲା I ଆରମ୍ଭ ହୋଇଗଲା ବରଯାତ୍ରୀଙ୍କର ଟଳମଳ ପାଦର ରଙ୍ଗୀଲା ନୃତ୍ୟ I ବିବାହ ଦିନଟି ଜୀବନର କେତେ ପ୍ରତୀକ୍ଷିତ ମୁହୂର୍ତ୍ତ ସତରେ ! ଜୀବନର ଅର୍ଦ୍ଧାଧିକ ବସନ୍ତ ବୈଶାଖୀର ଝାଞ୍ଜିରେ ଜଳିଯିବା ପରେ ପ୍ରତୀକ୍ଷାର ଅନ୍ତ ଘଟାଇ ମିଳନ ଆସେ I
ବେଳକୁ ବେଳ ବର୍ଷା ବଢୁଥିଲା I ବରଯାତ୍ରୀଙ୍କ ଭିଡ଼ ବି I କନ୍ୟା ପିତା ଚିନ୍ତାରେ I ଯେତେକ ମାଂସ ଅଛି ସେତକ ବରଯାତ୍ରୀଙ୍କୁ ପାଇବ ତ ? ଶେଷକୁ ଉପାୟ ନପାଇ ସେହି ଖାସିଟିକୁ କଂସେଇ ପାଖକୁ ଟଣାଗଲା I ସେତେବେଳକୁ ଖାସିଟି ପ୍ରଥମ ବର୍ଷାର ସ୍ପର୍ଶରେ ବିଭୋର ଥିଲା I ସେ ଟଣାହୋଇ ଯାଉଥିବା ବେଳେ ତାକୁ ଲାଗୁଥିଲା ସେ ଯେମିତି ସବୁଜ ଶ୍ୟାମଳ ଖାଦ୍ୟପାଖକୁ ଯାଉଛି I ସେ ଉଲ୍ଲସିତ ହୋଇ ପଡିଲା I ଠିକ୍ ସେତିକିବେଳେ ଗୋଟିଏ ଚୋଟରେ ତା ମୁଣ୍ଡ ଦେହରୁ ଅଲଗା ହୋଇଗଲା I ସବୁ ସ୍ଵପ୍ନ ତା’ର ବିଛାଡି ପଡୁଥିଲା ଭୁଇଁରେ କଞ୍ଚା ତତଲା ରକ୍ତ ହୋଇ ଆଉ କାହା ସ୍ଵପ୍ନକୁ ସାକାର କରିବା ପାଇଁ I
ବାରିପଦା
ମୋ : ୯୪୩୭୨୯୪୯୪୫
email : makudabe64@gmail.com