ଏକ କୁମ୍ଭାରର କାହାଣୀ

ଗୋଟିଏ ସହରରେ ଯୁଧିଷ୍ଠିର ନାମକ ଏକ କୁମ୍ଭାର ବାସ କରୁଥିଲା । ସେ ସବୁ ସମୟରେ ମଦ୍ୟପାନ କରୁଥାଏ । ଦିନେ ସେ ମଦ୍ୟପାନ କରି ମାତାଲ୍ ହୋଇ ଗଢିଥିବା ହାଣ୍ଡିତକ ସବୁ ଭାଙ୍ଗିଦେଲା । ମଦ ନିଶାରେ ହାଣ୍ଡି ଉପରେ ପଡିବାରୁ ଖପରା ମୁଣ୍ଡରେ ଗଳି ମୁଣ୍ଡକୁ ଚିରିଦେଲା । କ୍ଷତ ସ୍ଥାନରୁ ରକ୍ତ ବାହାରି ଦେହସାରା ହୋଇଗଲା । ଖୁବ୍ କଷ୍ଟରେ ସେ ସେହି ହାଣ୍ଡି ଗଦା ମଧ୍ୟରୁ ଉଠିଲା । ଉପଯୁକ୍ତ ଯତ୍ନର ଅଭାବରୁ କ୍ଷତ ସ୍ଥାନ ଗୁଡିକ ଶୀଘ୍ର ଭଲ ହେଲାନାହିଁ ।

କିଛି ଦିନ ପରେ, ସେହି ରାଜ୍ୟରେ ଦୁର୍ଭିକ୍ଷ ପଡିଲା । ଫଳରେ ରାଜ୍ୟବାସୀ ସେହି ସ୍ଥାନରୁ ଅନ୍ୟ ସ୍ଥାନକୁ ଖାଇବାକୁ ନପାଇ ଚାଲିଗଲେ । କୁମ୍ଭାରଟି ବିଚରା ଖାଇବାକୁ ନପାଇ ଦୁର୍ବଳ ହୋଇ ପଡିଲା । କିଛି ଦିନ ପରେ ସେ ମଧ୍ୟ ଅନ୍ୟ ଏକ ରାଜ୍ୟକୁ ପଳାଇଗଲା । ସେହି ପଡୋଶୀ ରାଜ୍ୟର ରାଜା କୁମ୍ଭାରର କପାଳରେ କ୍ଷତ ଚିହ୍ନ ଦେଖି ଭାବିଲେ, ‘ଯେ ଲୋକଟି ନିଶ୍ଚୟ ଏକ ବୀର ହୋଇଥିବ’ । ହୁଏତ ଶତ୍ରୁକୁ ମୁକାବିଲା କରିବା ସମୟରେ ତା’ର ଏପରି ଅବସ୍ଥା ହୋଇଛି । ଏହା ଭାବି ରାଜା କୁମ୍ଭାରକୁ ସସମ୍ମାନେ ନିଜ ରାଜ୍ୟରେ ଆଶ୍ରୟ ଦେଲେ । କିଛି ଦିନ ଗଲା, ଦିନେ ସେହି ରାଜ୍ୟକୁ ପଡୋଶୀ ରାଜ୍ୟ ସୈନ୍ୟ ଆକ୍ରମଣ କଲା । ଶତ୍ରୁକୁ ମୁକାବିଲା କରିବା ପାଇଁ ରାଜା ସାମନ୍ତମାନଙ୍କୁ ସଜାଇଲେ । ରାଜା ତ’ ମନେ ମନେ କୁମ୍ଭାରକୁ ଏକ ବୀର ବୋଲି ଭାବିଥାଆନ୍ତି । ସେହି ସମୟରେ ରାଜା ତାକୁ ପଚାରିଲେ, ‘ତୁମେ କେଉଁଠାରେ ଯୁଦ୍ଧ କରି ଜିତିଛ?’ ତୁମେ କେଉଁ ଅସ୍ତ୍ର ଚାଳନାରେ ପାରଙ୍ଗମ?

ରାଜାଙ୍କର ଏହି ପ୍ରଶ୍ନ ଦ୍ୱାରା କୁମ୍ଭାର ପ୍ରଥମେ ଆଶ୍ଚର୍ଯ୍ୟ ହୋଇଗଲା । ସେ ଭାବିଲା, ‘ରାଜା ମୋତେ କାହିଁକି ଏପରି ପ୍ରଶ୍ନ ପଚାରୁଛନ୍ତି? ଏହା ଭାବି ସେ ରାଜାଙ୍କୁ ଉତ୍ତର ଦେବାକୁ ଯାଇ କହିଲା, ‘ମହାରାଜ’! ପ୍ରକୃତରେ ମୁଁ ଜଣେ କୁମ୍ଭାର । ମୋର ନାମ ହେଉଛି ଯୁଧିଷ୍ଠିର । ସବୁ ସମୟରେ ମୁଁ ମଦ୍ୟପାନ କରୁଥାଏ । ଦିନେ ମଦ୍ୟପାନ କରି ମୁଁ ଗଢିଥିବା ହାଣ୍ଡି ଉପରେ ପଡିଯିବାରୁ ମୋର ମୁଣ୍ଡରେ ଏହି କ୍ଷତ ସୃଷ୍ଟି ହୋଇଛି । କୁମ୍ଭାରର କଥା ଶୁଣି ରାଜା ମନେ ମନେ ବହୁତ ରାଗିଗଲେ ଏବଂ ନିଜ ସୈନ୍ୟ, ସାମନ୍ତମାନଙ୍କୁ ଆଦେଶ ଦେଲେ କୁମ୍ଭାରକୁ ତୁରନ୍ତ ସେଠାରୁ ବାହାର କରିଦେବା ପାଇଁ । ସୈନ୍ୟ ମାନେ ଯେତେବେଳେ କୁମ୍ଭାର ନିକଟକୁ ଆସିଲେ, କୁମ୍ଭାରଟି କହିଲା, ‘ମହାରାଜ’! ମୋର ଭୁଲ୍ ହୋଇଯାଇଛି । ଆପଣ ଏପରି କରନ୍ତୁ ନାହିଁ । ମୁଁ ମଧ୍ୟ ଭଲ ଯୁଦ୍ଧ କରିପାରେ । ମୋତେ ଆପଣ ଥରେ ସୁଯୋଗ ଦିଅନ୍ତୁ । କୁମ୍ଭାରର କଥା ଶୁଣି ରାଜା କହିଲେ, ‘ହୋଇପାରେ, ତୁମେ ଯୁଦ୍ଧ କରିପାରୁଥାଅ । ମାତ୍ର ଏଠାରେ ତୁମର ଆବଶ୍ୟକତା ନାହିଁ । ତୁମେ ଏଠାରୁ ତୁରନ୍ତ ଚାଲିଯାଅ । ଯେପରି ସିଂହୀ ଶୃଗାଳକୁ କହିଲା, ‘ତୁମେ ଯେତେ ବଳବାନ୍, ସୁନ୍ଦର, ବୁଦ୍ଧିମାନ୍ ହୋଇଥିଲେ ମଧ୍ୟ ତୁମ ବଂଶରେ କେହି ହାତୀ ମାରିନାହାନ୍ତି ।

ରାଜାଙ୍କ କଥା ଶୁଣି କୁମ୍ଭାର ପଚାରିଲା, ‘ମହାରାଜ’! ଆପଣ ମୋତେ ସମସ୍ତ କଥା ବର୍ଣ୍ଣନା କରି କୁହନ୍ତୁ ।

କୁମ୍ଭାରର କଥା ଶୁଣି ରାଜା କାହାଣୀଟି କହିବାକୁ ଆରମ୍ଭ କଲେ ।