ମା' ମାଡ଼
ମା' ମାଡ଼
'ସ୍ନେହା' ଆଉ 'ଜେନି' ଆଜି ଦେଖାହେଲେ ବହୁଦିନପରେ । ଗୋଟାଏ ଘରର ଦି ଭଉଣୀ । ମୁଁ , ଦୁହିଁଙ୍କର ବଡମାମୁଁ । ସେମାନେ, ନିଜ ମାମା ମାନଙ୍କ ସହ ଆସିଥିଲେ ସପିଂ । ମୁଁ ସପତ୍ନୀକ ତାଙ୍କ ଘରକୁ ଯାଇ, ସେମାନଙ୍କୁ ନପାଇ ଫେରୁଫେରୁ ଭେଟହେଲା ମେନ୍ ମାର୍କେଟରେ । ପିଲା ଦୁହିଁଙ୍କୁ ଦେଖି ଖୁସିଲାଗିଲା ଭାରି । ମାମା ମାନେ ଗୁପଚୁପ୍ ଖାଇ ଗପସପ୍ ହେଲା ଭିତରେ, ମୁଁ ପଚାରିଲି -
- ପିଲାଏ ଏଗଜାମ୍ କେମିତି ହେଇଛି ?
କିଛି ନକହି ଦୁହେଁ ଖାଲି ମୁଣ୍ଡ ଟୁଙ୍ଗାରିଲେ ।
- ଆରେ କେମିତି ହେଇଛି କହୁନ ?
ଦୁହେଁଯାକ ଚୁପ୍ । ମୁଁ ବି ପିଲାଗୁଡାଙ୍କ ଉପରେ ମାମୁଁତ୍ୱ ଜାହିର୍ କରି ଦୁହିଁଙ୍କୁ ଘାଣ୍ଟୁଥିଲି।
- ଘରେ ମାଡ ଖାଅ ?
ଏଥର ଦୁହେଁଯାକ ମୁହଁ ଫିଟାଇ କହିଲେ 'ହଁ' !
ସ୍ନେହାର ମାମା ରାଗିଗଲେ , ଡାଲି ଚଟୁରେ ମାରେ , ଆଉ ଜେନିର ମାମା ବେଲଣାକାଠିରେ !!!
ଜେନି ତା ହାତ ଦେଖେଇ କହିଲା -
- ଥରେ ମୋ ମାମା ଏତେ ମାରିଲା ଯେ, ମୋ ହାତ ଏଡୁଟେ ଫୁଲିଗଲା । ପୁଣି ଇଞ୍ଜେକ୍ସନ୍ ନେଲାରୁ କମିଲା।
- ଇଞ୍ଜେକ୍ସନଟା କାଟିଲାନି ?
- ମାଡଠୁଁ ଅଳପ ।
- ଆଉ ସ୍ନେହାର ?
- ଆମ ଘରେ ସବୁଯାକ ଡଙ୍କି ବଙ୍କାଟଙ୍କା ହୋଇଗଲାଣି ।
ଏତକ କହି ଦୁହେଁ ଖୁବ୍ ହସିଲେ ।
★★★
ମାମା ମାନେ ଗୁପଚୁପ୍ ଖାଇ ଆସିବାରୁ ମୁଁ ବିରକ୍ତରେ ପଚାରିଲି
- ପିଲାଗୁଡାଙ୍କୁ ଏଇମିତି ଡଙ୍କି, ବେଲଣାରେ ମାରୁଛନା ?
- ଆଉ ? ହାତରେ ମାରିଲେ ଆମ ହାତ ବଥା ହେବନି ????
ଏତକ କହି ଦୁହେଁ ଖୁବ୍ ହସିଲେ ।
ପତ୍ନୀ ମୋତେ ଇଶାରାରେ ଚୁପ୍ ରହିବାକୁ କହିଲା ।।।
@ ଅମୀୟ ବେଜ୍ ।