ରବିବାର ସକାଳ
ରବିବାର ସକାଳ
"ସାଉଆଣୀ ମାଆ ,ମୋ କଥା ଟିକେ ଶୁଣ !" ସକାଳୁ ମୋ ଦାଣ୍ତ ଦୁଆରେ ସରୁ ଗଳାର ତା ଡାକ ଶୁଭିଲା l
ବେଶୀ ପରିଚିତ ନହେଲେ ବି ଅପରିଚିତ ନୁହଁ ଏ ଡାକ ମୋ ପାଇଁ l ପ୍ରାୟ ଛୁଟି ଦିନ ଦେଖିକି ସିଏ ଆସେ l ଆଉ କୋଉ ଛୁଟି ସିଏ ଜାଣୁ କି ନ ଜାଣୁ ଏଇ ରବିବାରଟାକୁ ଠିକ୍ ଚିହ୍ନିଚି l ତା ଦୁଃଖ କଥା କହିକି ମୋଠୁ କିଛି ନବା ଆଶାରେ ସିଏ ଆସେ l ଭଲ କି ତା ବିଷୟରେ କିଛି ମୁଁ ଜାଣିନି l ସିଏ କହିବ କହିବ ହଉଥିଲେ ବି ମୋ ପାଖରେ ସମୟ ନଥାଏ ଶୁଣିବାକୁ l ଆଜି ବି ଠିକ୍ ଘର ଝାଡୁଛି ସେ ପାଟି କଲା l
"ଓଃ ,ଭାରତର ମୁକ୍ତି ନାଇଁ ଏଇ ଭିକ ମଗା ଲୋକଙ୍କ କବଳରୁ l "ଏମିତି ଗୋଟିଏ ବିରକ୍ତିକର ଭାବନା ମୋ ମନକୁ ଚାଲି ଆସିଲା l କିଛି ପଇସା ଧରି ବାହାରକୁ ଆସିଲି l ଜଲ୍ଦି ସେ ଗଲେ ମୋ କାମ କରିବି l ଏକ ରକମ ପଇସା ତା ହାତରେ ପକେଇ ଦେଇ ମୁଁ ଫେରି ଆସୁଛି l ପୁଣି ତା ଡାକ ,"ମାଆ ଟିକେ ଶୁଣ !"
"ନାଁ ନାଁ ,ଆଉ ଶୁଣି ପାରିବିନି l ତୁ ଯା l "
"ମାଆ ତମର ମଙ୍ଗଳ ହବ l ମୋର ଛୋଟ ଛୋଟ ଛୁଆ ଦିଟାଙ୍କ କଥାଟିକେ ଶୁଣ l "
କେବେ ତ ତା ଛୁଆ କଥା କହେନି l ସେଇ
"ଛୁଆ ଦିଟା" ଶବ୍ଦରେ ଏକରକମ ତା ଆଡକୁ ମୁହଁ ଫେରେଇଲି l
ବିରକ୍ତିଭାବ ତଥାପି ଯାଇ ନଥିଲା l
"ସାଉଆଣୀ !ତମର ପୁରୁଣା ଲୁଗା ଥିଲେ ଦି ଖଣ୍ତ ଦିଅ l କେତେ ଶୀତ ହଉଛି ଦେଖୁଛ ତ l ମୋ ଛୋଟ ଛୁଆ ଦିଟିର ନିଃଶ୍ବାସ ପଡିବ l ତମର ମଙ୍ଗଳ ହବ l "
ତା ମାଗିବାଟା ମୋତେ ଭଲ ଲାଗିଲାନି l ମଣିଷ ହେଇ ଏତେ ନିକୁସୁକୁ କ'ଣ ମ !
"ତମେ କାମ କରୁନ? ଏତେ ନିକୁଟେଇ ହେଇ ମାଗୁଛ କାହିଁକି ?"
"ଛୋଟ ଛୋଟ ଛୁଆଦିଟା ମୋର l ସେମାନଙ୍କୁ ଛାଡି କାମ କରିବାକୁ କେମିତି ଯିବି ?"ଲୁହ ଭର୍ତ୍ତି ଆଖିରେ ତାର କରୁଣ ପ୍ରଶ୍ନବାଚୀଟିଏ l
"କାଇଁ ତମ ବରକୁ କହୁନ କାମ କରିବ l "
"ସେ କ'ଣ ମୋ ପାଖେ ଅଛି ?"
"କାଇଁ ,କୁଆଡେ ଗଲେ ସିଏ ? କଣ ଦାଦନ ଖଟିବାକୁ ?"
"ନାଇଁ ,ଆଉ ଗୋଟେ ମାଈକିନା ଧରି କି କୁଆଡେ ପଳେଇଲେ l "
ବୋକା ଭଳି ତାକୁ ଚାହିଁଥିଲି l ମୋ ଆଖିରେ ଅବିଶ୍ବାସ ଭାବ ଦେଖିକି ସିଏ ମୁଣ୍ଡ ତଳକୁ କରି ଦେଲା l
"ତମର ଛୁଆ ଦିଟା ଥାଇ ବି ସିଏ ଏମିତି କାହିଁକି କଲା ?"
"କେଜାଣି ମାଆ ?ମୋ ସାଥୀରେ ନିତି ମଦ ପିଇ ଆସି ଝଗଡା କଲା l ତାପରେ ତ ତୁ ଗୋଟେ କଳିହୁଡୀ ମାଇକିନା ,ତୋ ସାଥୀରେ ରହିପାରିବିନି କହି ପଳେଇଲା l ସାନ ଛୁଆଟି ମୋର ବହୁତ ସାନ l ଟିକେ ବଡ ହେଇଗଲେ ମୁଁ କାମକୁ ଯିବିା"
ଅସହାୟ ହେଇ ତାକୁ ଦେଖୁଥିଲି l ଯେତେ ଦେଲେ ବି ତା କ୍ଷତି ମୁଁ ପୂରଣ କରି ପାରିବିନି l ତଥାପି
କିଛି ଦେଇ ତାକୁ ବିଦା କଲି l ସାରାଟା ସକାଳ ଖାଲି ମୁଁ ଭାବୁଥିଲି ସେଇ ଛୁଆ ଦିଟି କଥା l ଆମକୁ ଜନ୍ମକର ସେମାନେ କହି ନଥିଲେ l ଆଜି ଜନ୍ମ ହେଇ ସାରିଲା ପରେ ଏମିତି ଦୁଃଖ ସେମାନେ କାହିଁକି ଭୋଗିବେ ? ମଣିଷ ହେଇ ବି ଖାଲି କଣ ମାଆ ବାପାର ଶରୀର ସୁଖପାଇଁ ସେମାନେ ଜନ୍ମ ହେଇଥିଲେ ?
କ'ଣ ସବୁ କାମ କରିବି ବୋଲି ଭାବିଥିଲି ଆଉ କେତେ କଲି ସେସବୁ ମୋର ଆଉ ମନେ ପଡୁ ନଥିଲା l ମଣିଷ ଆଉ ତାର ମଣିଷପଣିଆ କଥା ଭାବି ଭାବି ଦିନ ଯାଇ ସଂଜ ହେଲା l କିଛି ଲେଖିବି ବୋଲି ବସିଲା ବେଳକୁ ମୋତେ ସେଇ ଛୁଆ ଦିଟି ଦିଶି ଯାଉଛନ୍ତି l ରବିବାର ସକାଳ ମୋର କେମିତି ପାହିଥିଲା କେଜାଣି ?