Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

ଆଈ ମା'ର ଗପ ଚାଙ୍ଗୁଡ଼ି

Children Inspirational

2  

ଆଈ ମା'ର ଗପ ଚାଙ୍ଗୁଡ଼ି

Children Inspirational

ମାଙ୍କଡ ଓ ଗୁଣ୍ଡୁଚି ମୂଷା

ମାଙ୍କଡ ଓ ଗୁଣ୍ଡୁଚି ମୂଷା

3 mins
589


ଗାଁ କଡ ଦେଇ ବହିଯାଇଛି ନଈଟିଏ । ଆଉ ସେହି ନଈର ଦୁଇ କୂଳରେ ବଡ ବଡ ବର, ଓସ୍ତ ଗଛ, ବାଉଁଶ ବୁଦା ସେମାନଙ୍କର ଡାଳପତ୍ର ସବୁ ମେଲେଇ ହୋଇ ନଈ ଉପରକୁ ନଇଁ ପଡିଥାଆନ୍ତି ।

ସେଠାରେ ଥାଏ ଗୋଟିଏ ତେନ୍ତୁଳିଗଛ । ବହୁଦିନର ପୁରୁଣା ସେହି ଗଛଟି । ଶାଖା ପ୍ରଶାଖା ତା’ର ସବୁ ମୋଟା ଶୋଟା । ସେଇ ତେନ୍ତୁଳି ଗଛକୁ ଲାଗି ରହିଛି ଗୋଟିଏ ଡେଙ୍ଗା ତାଳ ଗଛ । ସେଇ ତାଳ ଗଛ ଅଗରେ ଗୋଟିଏ ଗୁଣ୍ଡୁଚିମୂଷା ବସା କରି ରହିଥାଏ । ତାର ଛୋଟ ଛୋଟ ଛୁଆମାନେ ମା’ ସାଙ୍ଗରେ ତଳକୁ ଓହ୍ଲେଇ ଆସନ୍ତି । ଧାନଚାଉଳ, ଫଳ, ମଞ୍ଜି ଯାହା ମିଳେ ତାକୁ ଟୁକୁରୁ ଟୁକୁରୁ କରି ଖାଇ ଦିଅନ୍ତି । ଅନ୍ୟ କାହାର ଛାଇ ପଡିଲା ମାତ୍ରେ ତରବର ହୋଇ ସେମାନେ ଗଛ ଉପରକୁ ଚଢି ଯାଆନ୍ତି ।

ତେନ୍ତୁଳି ଗଛ ଡାଳରେ ଗୋଟିଏ କୂଆ ଅଣ୍ଡା ଦେଇଥାଏ । ସେ ସକାଳୁ ଉଠି କାଆ କାଆ ରାବି ଗାଁ ଭିତରକୁ ଚାଲିଯାଏ ଓ ସେଠାରୁ କିଛି ଖାଦ୍ୟ ଖାଇ ଦେଇ ଫେରିଆସି ଗଛ ଉପରେ ଗୋଟେ ଚକର କାଟି ନିଜ ବସାକୁ ଅନାଏ । ଦେଖେ ତା ଅଣ୍ଡା ଦୁଇଟି ନିରାପଦ ଅଛି ନା ନାହିଁ? ଯେତେବେଳେ ଦେଖେ କେହି କୁଆଡେ ନାହାଁନ୍ତି, ସେ ପୁଣି ଉଡିଯାଏ ଆଉ କେଉଁ ଗାଁକୁ ।

ଦିନେ ଗୋଟିଏ ମାଙ୍କଡ ଖାଦ୍ୟ ଖାଇବା ପାଇଁ ଆସି ସେହି ତେନ୍ତୁଳି ଗଛ ଗୁଡାକୁ ଖାଲି କଡ ମଡ କରି ଚୋବାଇଲା । ତାପରେ ସେ ମାଙ୍କଡ ଗଛର ଏ ଡାଳରୁ ସେ ଡାଳକୁ ହୁଁ ହାଁ କରି ଡେଇଁବାକୁ ଲାଗିଲା । ଫଳରେ ସେ ଗଛର ଡାଳଗୁଡା ଦୋହଲୁଥାଏ । କୁଆ ତେନ୍ତୁଳି ଗଛରେ ନବସି ଅନ୍ୟଗଛରେ ବସି ମାଙ୍କଡକୁ ଚାହିଁଥାଏ । ଆଉ ବାରମ୍ବାର କହୁଥାଏ “ମାଙ୍କଡଭାଇ ସେ ଗଛରେ କାଠିକୁଟାରେ ତିଆରି ମୋ ବସା ଅଛି ।

ଆଉ ପୁଣି ସେହି ବସା ଭିତରେ ମୋର ଦୁଇଟି ଅଣ୍ଡା ଅଛି । ତୁମେ ଯେମିତି ଏ ଡାଳରୁ ସେ ଡାଳକୁ ଡେଉଁଛ ମତେ ଭାରି ଡର ମାଡୁଛି । କେତେବେଳେ ମୋ ଅଣ୍ଡା ଦୁଇଟା ଖସି ପଡି ମାଟିରେ ମିଶିଯିବ ।” ଏହା ଶୁଣି ସେ ମାଙ୍କଡ କହିଲା, “ତୁ ଅଣ୍ଡା ଦେଇଛୁ ବୋଲି କ’ଣ ମୁଁ ତେନ୍ତୁଳି ଗଛକୁ ଯିବି ନାହିଁ । ନାଚ କୁଦ କରିବି ନାହିଁ? ତୋ ଅଣ୍ଡା ଭାଙ୍ଗିଲେ କେତେ ରହିଲେ କେତେ, ମୋର ସେଥିରେ କିଛି ବି ଯାଏ ଆସେ ନାହିଁ ।” ମାଙ୍କଡର ତୋଡ ଦେଖି କୁଆ ବିଚରା ଚୁପ୍ ହୋଇଗଲା ।

ତହିଁ ଆର ଦିନ କୁଆ ଅତ୍ୟନ୍ତ ମନ ଦୁଃଖରେ ତେନ୍ତୁଳି ଡାଳରେ ବସିଥାଏ । ଏହି ସମୟରେ ଗୁଣ୍ଡୁଚିମୂଷା ତାକୁ କହିଲା କୁଆ ଭାଇ ତମ ମନରେ କାହିଁକି ସୁଖ ନାହିଁ କ’ଣ ହୋଇଛି ତୁମର?

କୁଆ କହିଲା, “ମୋ ଅଣ୍ଡାମାନଙ୍କ ପାଇଁ ଭାରି ବିପଦ ପଡିଛି । ପ୍ରତିଦିନ ଗୋଟାଏ ହନୁମାଙ୍କଡ ଆସି ଏଇ ତେନ୍ତୁଳି ଗଛରେ ନାଚ କୁଦ କରୁଛି । ତେଣୁ ମୋ ବସା ଦୋହଲୁଛି । ଯେତେ କହିଲେ ବି ସେ ମୋ କଥା ଆଦୌ ଶୁଣୁ ନାହିଁ ।” ସବୁକଥା ଶୁଣି ଗୁଣ୍ଡୁଚିମୂଷା କହିଲା “ଏଇଥିପାଇଁ ଏତେ ଚିନ୍ତା । ଶୁଣ ଯିଏ ଦୁଷ୍ଟ ହେବ ତାକୁ ଦଣ୍ଡ ନ ଦେଲେ ସେ ମୋଟେ ସୁଧୁରିବ ନାହିଁ । ମାଙ୍କଡକୁ ତ ତୁମେ କେତେଥର କହିଲଣି ହେଲେ ସେ ତୁମ କଥା ଯମା ଶୁଣୁନାହିଁ । ଏବେ ତୁମେ ତୁମ ଜାତିଭାଇ ଚାରି ପାଂଚଜଣକୁ ଡାକି ଆଣ । ମାଙ୍କଡ ଯେତେବେଳେ ତେନ୍ତୁଳି ଗଛକୁ ଆସିବ ସେତେବେଳେ ସମସ୍ତେ ତା ମୁଣ୍ଡକୁ ଖୁମ୍ପିବା ଆରମ୍ଭ କରିବ ଦେଖିବ ସେ କେମିତି ଡହଳ ବିକଳ ହୋଇ ଏଠାରୁ ପଳାଇଯିବ ।”

ତା’ପରେ ସେ କୁଆ ଉଡିଯାଇ ନଈକୂଳରୁ ଆଉ ପାଂଚଟି କୁଆକୁ ଡାକିଆଣିଲା । ଯେତେବେଳେ ମାଙ୍କଡଟି ତେନ୍ତୁଳି ଗଛକୁ ଆସିଲା, ସେତେବେଳେ ସମସ୍ତେ ଆକାଶରେ ଉଡି ଉଡି ସେ ମାଙ୍କଡର ମୁଣ୍ଡକୁ ଖାଲି ଖୁମ୍ପିବାକୁ ଲାଗିଲେ । ମାଙ୍କଡ ଡହଳ ବିକଳ ହୋଇ ଏ ଡାଳରୁ ସେଡାଳ ଏଗଛରୁ ସେଗଛ ଡେଇଁବାକୁ ଲାଗିଲା । ମାତ୍ର କୁଆମାନେ ତାକୁ ମୋଟେ ଛାଡିଲେ ନାହିଁ ବରଂ ତାକୁ ଗୋଡେଇ ଗୋଡେଇ ଖୁମ୍ପିଲେ । ଶେଷରେ ସେ ମାଙ୍କଡଟି ନଈକୂଳ ଛାଡି ବଣ ଆଡକୁ କୁଦି କୁଦି ପଳାଇଗଲା । କୁଆଟି ସେଇ ଦିନରୁ ଖୁବ୍ ଶାନ୍ତିରେ ରହିଲା । ତଥା ଅଣ୍ଡା ଫୁଟେଇ ଛୁଆ ଜନ୍ମକଲା ।

ତାଳ ଗଛରେ ଥାଇ ଗୁଣ୍ଡୁଚି ମୂଷା କହିଲା, କୁଆଭାଇ ଦେଖିଲ ତ ଦୁଷ୍ଟଲୋକଙ୍କୁ ଦୁଷ୍ଟ ବୁଦ୍ଧିଦ୍ୱାରା କିପରି ସାବାଡ କରାଗଲା ।


Rate this content
Log in

Similar oriya story from Children