Quotes New

Audio

Forum

Read

Contests


Write

Sign in
Wohoo!,
Dear user,
ବିଚରା ବିଲୁଆ
ବିଚରା ବିଲୁଆ
★★★★★

© SARATA KUMAR DAS

Children

4 Minutes   14.8K    21


Content Ranking

ଜଙ୍ଗଲିଆ ରାସ୍ତା। ଚାରିଆଡେ ଶୂନଶାନ। ଆଗରେ କେହି ନାହିଁ କି ପଛରେ କେହି ନାହିଁ। ଜଙ୍ଗଲକୁ କିଏ କାହିଁକି ବା ଆସିବ ସକାଳୁ ସକାଳୁ। ଏମିତି ତ ତୁହାକୁ ତୁହା ବର୍ଷା ଲାଗିରହିଛି। ଶୀତୁଆ ପବନ ବି ବହୁଛି। ଆକାଶରେ କଳାହାଣ୍ଡିଆ ମେଘ ।

-'ଏ ବିଲୁଆ ନନା ! ତରବର ହୋଇ ସକାଳୁ ସକାଳୁ କୁଆଡେ ଧାଉଁଛ ?' -ପଛରୁ କିଏ ଡାକିଲା ଭଳି ଶୁଭିଲା ।

-'ଆରେ ତମେ ବି ତ ଧାଉଁଛ କୁକୁର ଭାଇ ।' -ବିଲୁଆ ନନା ହଡବଡ ହୋଇ ପଛକୁ ଚାହିଁ ଜବାବ ଦେଲା ।

-'ଜଙ୍ଗଲରେ ଆଜି ଗୋଟିଏ ଜରୁରୀ ସଭା ଡକାଯାଇଛି। ମୁଁ ସେଇଠିକୁ ଧାଉଁଛି ।' -ବିଲୁଆ ନନା ଟିକେ ମୁରୁକି ହସି ଉତ୍ତର ଦେଲା ।

-'ମୁଁ ତ ସେହି ସଭାକୁ ବାହାରିଛି।' -କୁକୁର ଭାଇ ଖନେଇ ଖନେଇ କହିଲା

- 'ଗଧିଆ ଭାଇ ସଭା ଡାକିଛି । ଏ ଜଙ୍ଗଲରେ ଯେତେ ପଶୁ ପକ୍ଷୀ ଅଛନ୍ତି ସବୁ ଏକାଠି ହେବେ । ସିଂହ ରଜାଙ୍କ ଅତ୍ୟାଚାର ଦିନକୁ ଦିନ ବଢି ଚାଲିଛି। ସେ ଆଉ ଆମ ଦୁଃଖ ଶୁଣୁନାହାଁନ୍ତି ।

ଖାଲି ଚିଡି ଚିଡି ହଉଛନ୍ତି। ନିଜେ ମଉଜ ମଜଲିସ୍ ରେ ଦିନ କାଟୁଛନ୍ତି। ଗଧିଆ ଭାଇ ରାଜା ହେବ । ସିଂହ ରାଜାକୁ ଆଛାକି ପାନେ ଦେବ ।' -ବିଲୁଆ ଏକ ନିଶ୍ବାସରେ କହିଦେଲା ।

ବିଲୁଆ ତ ବଡ ଚତୁର । ସେ ବି ସୁଯୋଗ ଅପେକ୍ଷାରେ ଥିଲା । ଗଧିଆ ହେବ ଜଙ୍ଗଲରେ ରାଜା ସେ ଏ କଥା ସହଜରେ ହଜମ କରିପାରୁନଥିଲା ।ମନେ ମନେ ଭାବିଲା କୁକୁରକୁ ହାତ କରି ଗଧିଆକୁ ପାନେ ଦେଲେ କେମିତି ହୁଅନ୍ତା। ଏହି କଥା ଚିନ୍ତା କରି କରି ତା ଦେହରୁ ଝାଳ ଗମଗମ ବହିଯାଉଥିଲା। ସିଂହାସନ ପ୍ରତି କାହାର ବା ଲୋଭ ନ ଥାଏ !

-'ଏତେ କ'ଣ ଭାବୁଛ ମ ।' -କୁକୁର ପଚାରିଲା ।

-'ନାଇଁ ଯେ....। ମୁଁ କ'ଣ ଭାବୁଥିଲି କି!'

-'ହଁ କ'ଣ କହୁ ନ ।'

ବିଲୁଆ ଦେଖିଲା ଏଇଟା ଠିକ୍ ସମୟ । ତା ମନ କଥାଟା କୁକୁରକୁ ଜଣାଇଦେଲେ କେମିତି ହେବ । ଅବଶ୍ୟ ତା କଥାରେ କୁକୁର ରାଜି ହୋଇନପାରେ । ଗଧିଆ ତା ପିଲାଦିନର ସାଙ୍ଗ । ସେ କ'ଣ ତାକୁ ଧୋକା ଦେଇପାରିବ ।ହଉ ପଛେ ତାକୁ ଥରେ ପଚାରି ଦେଲେ କ୍ଷତି କ'ଣ ? ମନରେ ସାହାସ ବାନ୍ଧିଲା ବିଲୁଆ ।ଦରକାର ହେଲେ ଲାଂଚ ବି ଯାଚିବ ।ମନେ ମନେ ସେ ସ୍ଥିରକଲା ।

-'ହଇ ହୋ ବିଲୁଆ ନନା ଏତେ କ'ଣ ଭାବୁଛ ? '

-''ମୁଁ କ'ଣ ଭାବୁଛିକି.......।'କହୁ କହୁ ଅଟକି ଗଲା ବିଲୁଆ।

-'ହଁ କୁହ ।'

-ଆଛା, କହିଲ ଭାଇ ଗଧିଆ ଜଙ୍ଗଲରେ ରାଜା ହେବ ଏ କଥା ତମ ମନକୁ କ'ଣ ଯାଉଛି ? -ଅନେକ ଭାବିଚିନ୍ତି ବିଲୁଆ ପଚାରିଲା ।

କୁକୁର ତ ଏତେ ମୁର୍ଖ ନୁହେଁ ଯେ ବିଲୁଆ କଥାରେ ସେ ସହଜରେ ଭୁଲିଯିବ । ବିଲୁଆର ଚାଲାଖିକୁ ସେ ବୁଝିପାରିଲା । ଟିକେ ମୁରୁକି ହସି ଭାବିଲା ବିଲୁଆ ନିଜକୁ ଅତି ସିଆଣା ଭାବୁଛି। ଆଗରୁ ତ ବିଲୁଆ ଉପରେ ଏମିତି ରାଗ ଥିଲା। ଏଇ ମଉକାରେ ସୁଜେଇ ଦେବ ।

-'ଆଛା ! ତୁମେ ତାହେଲେ କ'ଣ ଭାବୁଛ ?'

- 'ଗଧିଆ ବଦଳରେ ମୁଁ ରାଜା ହେବାକୁ ଚାହୁଁଛି। ତୁମେ ଖାଲି ମୋ କଥା ଟିକେ ମାନିଲେ ହେଲା ।ତୁମେ ଯାହା ଚାହିଁବ ମୁଁ ତାହା ଦେବି ।'

-' ତେବେ ମୋତେ କ'ଣ କରିବାକୁ ପଡିବ ?'

-'ତୁମେ କେବଳ ମୋ ନାଁ ଟି ଉଠାଇଲେ ହେଲା । ତା ପର

କଥା ମୁଁ ସମ୍ଭାଳି ଦେବି ।'

××××××××××××××××××××××××××××××××

ଯଥା ସମୟରେ ସଭା ଆରମ୍ଭ ହେଲା । ଜଙ୍ଗଲର ସବୁ ପଶୁ ପକ୍ଷୀ ଏକାଠି ହେଲେ । ଗଧିଆ ସିଂହ ରଜାଙ୍କ ଦୁର୍ଗୁଣ ବଖାଣି ବସିଲା। ସେ ନିଜେ ରାଜା ହେବା କଥା କହିଲା । ସମସ୍ତେ କରତାଳି ମାରିଲେ । କଜଳପାତି ଅଭିନନ୍ଦନ ଜଣାଇଲା ।

ହଳଦୀବସନ୍ତ ସମର୍ଥନ କଲା ।ହେଲେ କୁକୁର ଚୁପ ଚାପ ବସିଥିଲା ।ଏପଟରେ ବିଲୁଆ କିନ୍ତୁ ରାଗରେ ଗରଗର ହେଉଥିଲା କୁକୁର ଉପରେ । ଏଥର ଆଉ ବସିପାରିଲାନି ।ଛିଡା ହେଲା ।ରାଗକୁ ଚାପିରଖି କହିଲା -

-'ଆଜ୍ଞା, ମୋତେ ଯଦି ଅନୁମତି ମିଳିବ ତେବେ ମୁଁ ଗୋଟିଏ କଥା କହିବି ।'

-'ହଁ କୁହ ।' -ଗଧିଆ କହିଲା ।

-'ତେବେ ସମସ୍ତେ ଶୁଣ ।'

-'ଗଧିଆ ଭାଇ ରାଜା ହେବା କଥା ମୋର କାହିଁକି ମୋଟେ ପସନ୍ଦ ହେଉନି । ଏମିତି ତ ସେ ବହୁତ ବୋକା ।ଦୁର୍ବଳ ବି ।

ସେ ରାଜା ହେଲେ ବହୁତ ଅସୁବିଧା ହେବ ।ଶତୃ ମାଡିଆସିବେ ତେଣୁ ମୋତେ ରାଜା କରାଯାଉ । ନାଁ କ'ଣ କହୁଛ କୁକୁର ଭାଇ ?'

ସଭାରେ ବସିଥିବା ସମସ୍ତ ପଶୁ ପକ୍ଷୀ ବିଲୁଆ କଥା ଶୁଣି ଠୋ ଠୋ କରି ହସିଲେ । ଗଛ ଡାଳରେ ହନୁମାଙ୍କଡ ବିଲୁଆକୁ ଚାହିଁ ଖତେଇ ହେଉଥିଲା ଖେଁ ଖେଁ.......।କକୁର ସବୁ କଥା ଚୁପ ଚାପ୍ ବସି ଶୁଣୁଥିଲା। ହଠାତ୍ ଉଠିପଡି ଠିଆ ହେଲା।

-'ମୋତେ ଅନୁମତି ଦିଆଗଲେ ମୁଁ ମୋ କଥା କହିବି। '-କୁକୁର ଆନୁମତି ମାଗିଲା।

-'କୁହ ତେବେ। '-ଗଧିଆ କହିଲା।

-'ଆଜ୍ଞା! ବିଲୁଆ ନନାର ବୁଦ୍ଧି ବହୁତ ଖରାପ ।ସେ ନିଜକୁ ଅତି ଚାଲାକ ଭାବେ ।ତା ଆଖିରେ ଅନ୍ୟମାନେ ନିହାତି ବୋକା ।

ନିଜେ ରାଜା ହେବା ପାଇଁ ଷଡଯନ୍ତ୍ର କରିଥିଲା । ମୋତେ ତା ସପକ୍ଷରେ କହିବାକୁ ଲାଂଚ ବି ଯାଚୁଥିଲା । ତେଣୁ ତାକୁ ଉଚିତ ଦଣ୍ଡ ଦିଆଯାଉ ।'

କୁକୁର ମୁହଁରୁ ସତ କଥା ଶୁଣି ସମସ୍ତେ ବିଲୁଆକୁ ଛି ଛି କଲେ । ଦୁଷ୍ଟକୁ ଦଣ୍ଡ ମିଳୁ ବୋଲି କହିଲେ । ହା ହୋଲ୍ଲା ବେଶ୍ କିଛି ସମୟ ଧରି ଚାଲୁରହିଲା ।କୋକିଶିଆଳୀ ପଛରେ ବସି ସବୁ ଶୁଣୁଥିଲା। ତା ମୁଣ୍ଡକୁ କି ବୁଦ୍ଧି ପଶିଲା କେଜାଣି ହଠାତ ଆଗକୁ ଆସି କହିଲା-'ମୁଁ ଗୋଟିଏ କଥା ଭାବୁଛି କହିବା ପାଇଁ।'

-'ଆମ ଭିତରୁ କେହି ବି ରାଜା ହେଲେ ନିଶ୍ଚୟ ଅସୁବିଧା ହେବ।

ଗଣ୍ଡଗୋଳ ଲାଗିରହିବ ।ଏହାର ସୁଯୋଗ ମଣିଷମାନେ ନେବେ। ତା'ଛଡା ବଣରେ ସିଂହ ହିଁ ରାଜା ରହିବା ଉଚିତ।

ନ ହେଲେ କାହାରି ଭୟ ରହିବ ନାହିଁ। ଚାଲ ଆମେ ସମସ୍ତେ ଏକାଠି ହୋଇ ସିଂହ ରାଜାଙ୍କ ପାଖକୁ ଯିବା । ତାଙ୍କୁ ବୁଝେଇ ସୁଝେଇ ବାଟକୁ ଆଣିବା ।ସେ ଆମ କଥା ନିଶ୍ଚୟ ରଖିବେ ।'

କୋକିଶିଆଳୀର କଥା ସମସ୍ତଙ୍କ ମାନକୁ ପାଇଲା ସମସ୍ତେ ତା' ବୁଦ୍ଧିକୁ ପ୍ରଶଂସା କଲେ। ଏକତା ହିଁ ବଳ । ଖଳ ପ୍ରକୃତିର ପ୍ରାଣୀଙ୍କ ପାଖରୁ ଦୂରେଇ ରହିବା ଉଚିତ ବୋଲି ସମସ୍ତେ ଅନୁଭବ କଲେ ।

ସବୁ ପଶୁ ପକ୍ଷୀ ଏକାଠି ହୋଇ ଏକଲୟରେ ସିଂହ ରାଜାଙ୍କ ପାଖକୁ ଧାଇଁଲେ । ବିଚରା ବିଲୁଆ ମୁଣ୍ଡରେ ହାତ ଦେଇ ଏକୁଟିଆ ବସିରହିଥିଲା । କରିଥିବା କର୍ମ ପାଇଁ ନିଜକୁ ଧିକାର କରୁଥିଲା । ଚତୁରତା ଖରାପ ନୁହେଁ। ମାତ୍ର ଅଧିକ ଚତୁରତା ଖରାପ ବୋଲି ପ୍ରମାଣିତ ହେଲା ।

-- ----------'-----------------

ଶରତ କୁମାର ଦାସ

ବିଲୁଆ କୁକୁର ରାଜା

Rate the content


Originality
Flow
Language
Cover design

Comments

Post

Some text some message..