Quotes New

Audio

Forum

Read

Contests

Language


Write

Sign in
Wohoo!,
Dear user,
ଅସ୍ତିତ୍ଵ
ଅସ୍ତିତ୍ଵ
★★★★★

© Rajib Gopal Swain

Tragedy Others

4 Minutes   7.0K    10


Content Ranking

ଫୋଟୋଗ୍ରାଫର୍ କୁ ଅନେକ ସମୟ ଅପେକ୍ଷା କଲାପରେ ସୁବୋଧ କହିଲା-ଆଉ କେତେ ସମୟ ରହିବା, ଫୋଟୋ ନୋହିଲେ ନାହିଁ ଚାଲ ବାହାରିଯିବା ।

ସଞ୍ଜିତ୍ ର କିନ୍ତୁ ଉଠିବାକୁ ଇଛା ନଥାଏ । ତା'ର ବିଶ୍ଵାସ ସେ ଫଟୋଗ୍ରାଫର ନିଶ୍ଚୟ ଆସିବ ।

ସୁଜୟ ମୁରୁକି ହସିଲା-ଆର ଜନ୍ମରେ ତୋର ସେ ପ୍ରେମିକା ଥିଲା କି ?

-ତୁ କେମିତି ବୁଝିବୁ, ସମୁଦ୍ରରେ ଗାଧୋଇବା ବେଳର ସବୁ ଫଟୋ ତା'ରି ପାଖରେ ।ଏତେଦିନ ପରେ ସଭିଏଁ ଏକାଠି ହୋଇଥିଲେ ତା ପୁଣି ପୁରୀରେ...ବେଳାଭୂମିର ସେଇ ମନୋରମ ମୁହୂର୍ତ୍ତ ଗୁଡାକ ଏବେ ସେଇ ଫଟୋଗ୍ରାଫରର ଲେନ୍ସରେ ବନ୍ଦ ହୋଇ ରହିଛି । ପାଣି ପଶିବ ବୋଲି ତ ତୁମେ କେହି ଭିତରକୁ ମୋବାଇଲ ନେଲନି!!

ସଞ୍ଜିତ୍ ଠିକ୍ କହୁଥିଲା । ସେମାନେ ଗୋଟିଏ ହେଲେ ଗାଧୁଆ ଫୋଟୋ ଉଠାଇପାରି ନାହାନ୍ତି । ବେଶ୍ ସ୍ମରଣୀୟ ଓ ମଜାଦାର ମୁହୂର୍ତ୍ତ ଗୁଡାକର ସ୍ଥିର ଚିତ୍ର । କିଏ ଜାଣେ ପୁଣି ଏମିତି ମୁହୂର୍ତ୍ତ ଫେରିବ କି ନାହିଁ !!

ଏଣେ ସମୟ ବି ବିତି ଚାଲିଛି । ଏତେ ବଡ଼ ବେଳାଭୂମିରେ ଅଗଣିତ ଲୋକ ତା'ଭିତରେ ଅନେକ ଫୋଟୋଗ୍ରାଫର୍, ଏକା ପ୍ରକାରର ପୋଷାକ । ସେଇ ନିର୍ଦ୍ଧିଷ୍ଟ ଲୋକଟିକୁ ଖୋଜି ପାଇବା ନିଶ୍ଚୟ ମୁସ୍କିଲ ।

ଫୋଟୋ ପାଇଁ ପ୍ରତୀକ୍ଷା ଚାଲୁ ରହିଲା । କିନ୍ତୁ ସେଇ ଫୋଟୋଗ୍ରାଫର୍ ଆସିଲା ନାହିଁ ।

ସଞ୍ଜିତ୍ ର ଆଶା ବ୍ୟର୍ଥ ଗଲା ଓ ଅନ୍ୟମାନଙ୍କ ଆଶଙ୍କା ସତ୍ୟ ପ୍ରମାଣିତ ହେଲା । ଅନ୍ୟମାନେ ସଞ୍ଜିତ୍ କୁ ବହୁତ ଶୁଣାଇଲେ , ଏହି ଦୁଇଘଣ୍ଟା ଭିତରେ ସେମାନେ ହୁଏତ ସାତପଡ଼ାରେ ପହଞ୍ଚି ସାରିଥାନ୍ତେ ।

xxx xxx xxx xxx xxx

ଏ'ଭିତରେ ଗୋଟେ ବର୍ଷ ବିତିଗଲାଣି ।

ସମୟ ଯେମିତି ଗୋଟେ ପାଣିର ସୁଅ ।

ନିଜ ନିଜ ଦୁନିଆର ଜଞ୍ଜାଳ ଭିତରେ ବୁଡିରହି ଦିନ ଦିନର ହିସାବ ରଖିବା ସମ୍ଭବ ହୋଇନି । ନୂଆ ବର୍ଷର ପ୍ରଥମ ସପ୍ତାହରେ ନିଜ ନିଜର ଆପଣାର ମାନଙ୍କ ସହିତ ଘେରାଏ ବୁଲି ନଆସିଲେ ବର୍ଷ ଯାକର କ୍ଳାନ୍ତି ଯେମିତି ଦୂର ହୁଏନି । ସେଥିପାଇଁ ନୂଆ ଜାଗା, ନୂଆ ପରିବେଶ ଖୋଜା ପଡେ ।

ଏଥର ବି, ସୁବୋଧ କଥାଟି ଆରମ୍ଭ କଲା । କେଉଁ ମାନେ ସବୁ ଯିବେ, ସ୍ଥାନ, ରହିବାର ବ୍ୟବସ୍ଥା, ଖାଇବା ପିଇବା, ଗାଡିଭଡା ଇତ୍ୟାଦି ସହିତ କେତେ ଟଙ୍କା ଲେଖାଏଁ ମୁଣ୍ଡ ପିଛା ପଡିବ ସବୁ କିଛିର ଆଲୋଚନା ହେଲା।

ସମୟ ଓ ସୁବିଧାକୁ ଆଖି ଆଗରେ ରଖି ପୁରୀ ପାଇଁ ମୋହର ମାରିଲେ ସମସ୍ତେ ।

ଆଉ ସେତେବେଳେ ମନେ ପଡୁଥିଲା ସଞ୍ଜିତ୍ ,ଆର ବର୍ଷ ଠିକ୍ ଏତିକି ବେଳକୁ ଥିଲା, ଏବେ ନାହିଁ । ଫୋଟୋ ଖଣ୍ଡିଏ ପାଇଁ କେତେ କହୁଥିଲା । ସ୍ମୃତିବିଜଡ଼ିତ ସେଇ ସମୟଟା ସମସ୍ତଙ୍କୁ ଭାବଗମ୍ଭୀର କରିଦେଲା କିଛି ସମୟ ।

xxx xxx xxx xxx xxx

ହୋଟେଲ ରିଚି ପ୍ୟାଲେସ ।

କେବଳ ଆଉ କେବଳ ସଞ୍ଜିତ୍ ର ଅସ୍ତିତ୍ଵକୁ ଉପଲବ୍ଧି କରିବା ପାଇଁ ସେଇ ଏକ୍ ହୋଟେଲ, ସମାନ କୋଠରୀ। 

ସମସ୍ତେ ପରସ୍ପରକୁ ଚାହୁଁଥିଲେ , ଓଠରେ ଭାଷା ନଥିଲା କଥା ହେବା ପାଇଁ । ଲାଗୁଥିଲା ଏଇଠି ହିଁ ଅଛି, ସେମାନଙ୍କ ଉପସ୍ଥିତିକୁ ଅନୁଭବ କରୁଛି ସଞ୍ଜିତ୍।

ଭାରି ପଡୁଥିଲା ସମୟ ।

xxx xxx xxx xxx xxx

ସାମୁଦ୍ରିକ ବେଳାଭୂମି ।

ପୁଣିଥରେ ମହୋଦଧି ସ୍ନାନ । ଆଉଥରେ ସଞ୍ଜିତ୍ କୁ ଅନୁଭବ କରିବାର ଅବସର ।

ସୁଜୟ କହିଲା-ନା ଏଥର ମୋବାଇଲ ନେବା । କାହାକୁ ଜଣଙ୍କୁ ଫୋଟୋ ଟିଏ ଉଠେଇବାକୁ କହିବା ।

-ନା ରେ ପାଣି ପଶିଯିବ । ହେଇ ସେଇ ଫୋଟୋ ବାଲାକୁ କହ । ଏଇଠି ଉଠେଇବ ଆଉ ଏଇଠି ହିଁ, ଦେଇକି ଯିବ ।

-ଭାଇ ଆମ ଫୋଟୋ ଉଠେଇବ ?

ଫୋଟୋଗ୍ରାଫରଟି ବୁଲି ଚାହିଁଲା,ସୁଜୟ ଚମକି ପଡ଼ିଲା । ଏ'ସେଇ ଫୋଟୋ ବାଲା କି ?

-ହଁ ନିଶ୍ଚୟ । ଆମେ ତ ସେଇଥିପାଇଁ ଅଛୁ !

ସୁଜୟ ସୁବୋଧ ଆଡକୁ ଚାହିଁଲା । ପରେଶ, ପଦ୍ମଜ୍, ବିପୁଲ... ସଭିଏଁ ଚମକିଲେ ।

ହଁ ଭୁଲିବାର ନୁହେଁ । ଇଏ ସେଇ ଲୋକ ।

-ତମେ ଆମକୁ ଚିହ୍ନି ପାରୁଛ ?

-ନା ତ ! ଏଠିକି ଅନେକ ଲୋକ ଆସନ୍ତି, ଚାଲିବି ଯା'ନ୍ତି । ଆମ କ୍ୟାମେରାରେ କିଛି ସମୟ ଧରିରଖି, ସେଇମାନଙ୍କୁ ସେମାନଙ୍କର ସ୍ମୃତିବୋଳା ମୁହୂର୍ତ୍ତମାନ ଧରାଇଦେଲା ପରେ ଆମ କାମ ଶେଷ୍। ଉଭୟ ଲେନ୍ସ ଓ ମନରୁ ଲିଭି ଯାଏ ମୁହଁ ।

-ମନେ ପକାଅ । ପ୍ଲିଜ୍ ...!! 

ସୁବୋଧ ଏକରକମ ଅନୁନୟ ହୋଇ କହିଲା ।

ନିରେଖି ଦେଖିଲା ଲୋକଟି । ତା'ଦିଲ୍, ଦୀମାଗ୍ ରେ ଚାପ ଦେଲା । ନିରେଖି ପରଖି ବହୁ କଷ୍ଟରେ କହିଲା-ହଁ ହଁ ଆପଣ ମାନଙ୍କୁ କୋଉଠି ଗୋଟେ ଦେଖିଲା ପରିଲାଗୁଛି ।

-ଗତ ବର୍ଷ ହୋଟେଲ ରିଚି ପ୍ୟାଲେସ । ଫୋଟୋ ଆଣିବ ବୋଲି ଆସିଲ ନାହିଁ .......ମନେ ପଡ଼ିଲା !!

-ହଁ ହଁ ମନେ ପଡ଼ିଲା । ମୋ କ୍ୟାମେରାରେ ପାଣି ପଶିଯାଇଥିଲା । ମୁଁ କ୍ୟାମେରାକୁ ଠିକ୍ କରି ହୋଟେଲରେ ଫଟୋ ପହଞ୍ଚାଇବା କଥା କିନ୍ତୁ ଠିକରେ ଶୁଣି ପାରିନଥିଲି | ରିଚି ପ୍ୟାଲେସ ପ୍ରତିବଦଳରେ ରିଷି ପ୍ୟାଲେସ ଯାଇଥିଲି। ସେଠାରେ କାହାକୁ ନପାଇ ଫେରିବା ବାଟରେ ରିଚି ପ୍ୟାଲେସ ଗଲି ,ସେତେବେଳକୁ ଆପଣମାନେ ଯାଇ ସାରିଥାନ୍ତି । ଆମେ କେହି କାହାର ନମ୍ବର ରଖିନଥିଲେ ।ରିସେପସନରୁ ନମ୍ବର ଖୋଜି ହୋଟେଲ ବାଲା ଫୋନ୍ କଲା ଫୋନ୍ ଲାଗିଲା ନାହିଁ । ସାମାନ୍ୟ ଫୋଟୋ ପାଇଁ, କିଏ କାହିଁକି ଫେରିବ ବୋଲି ସେଇଠି ହିଁ କଥା ସରିଥିଲା ।

ଉତ୍ସୁକତା ବଢ଼ୁଥିଲା -ସେଇ ଫୋଟୋ ସବୁ ?

-ସବୁ ଫୋଟୋର ଗୋଟେ ଗୋଟେ କପି ରିଚି ପ୍ୟାଲେସ ରିସେପସନରେ....!!

ଖୁସିରେ ନାଚି ଉଠୁଥିଲା ମନ । 

ସଞ୍ଜିତ୍ ର ସ୍ମୃତି ସମ୍ବଳିତ ସ୍ଥିର ଚିତ୍ର ପାଇଁ ସମୁଦ୍ରରୁ ଏକାମୁହାଁ ହୋଇ ହୋଟେଲ ଆଡକୁ ସଭିଏଁ ଦୌଡ଼ୁଥିବା ବେଳେ, ସୁବୋଧ ପୂର୍ବ ଭୁଲ୍ ର ପୁନରାବୃତ୍ତି ନକରି ଫୋଟୋଗ୍ରାଫରର ନାଆଁ ଓ ମୋବାଇଲ ନମ୍ବର ନେଉଥିଲା ଆଉ ତାଙ୍କ ସହିତ ହୋଟେଲ ଯାଏଁ ଆସିବାକୁ ଅନୁରୋଧ କରୁଥିଲା

-ଯଦି ନଥିବ ?

-ଆଉ ଗୋଟେ କପି ଖୋଜିଲେ ମୋ ପାଖେ ମିଳି ଯାଇପାରେ ।

ଫୋଟୋଗ୍ରାଫର୍ ଓଠ ଫାଙ୍କରେ ହସ ଆଉ ସେହି ହସରେ ସୁବୋଧ ଅନୁଭବ କରୁଥିଲା ସଞ୍ଜିତ୍ ର ଅସ୍ତିତ୍ଵ ଓ ବିଶ୍ୱାସ ।

🌺🌺🌺🌺🌺🌺🌺🌺

ରାଜୀବ ଗୋପାଳ ସ୍ବାଇଁ

ମାତୃକୁଟୀର, କୁରୁଣ୍ଟି, ମେରାମଣ୍ଡଳୀ,ଢେଙ୍କାନାଳ-୭୫୯୧୨୧

ସଞ୍ଜିତ୍ ଫୋଟୋଗ୍ରାଫର୍ ପୁରୀ

Rate the content


Originality
Flow
Language
Cover design

Comments

Post

Some text some message..