ଚେହେରା

       ଲୋକଟା ଏଡେ ମାରାତ୍ମକ ହୋଇପାରେ ପ୍ରଥମ ଥର ପାଇଁ ଅନୁଭବ କରୁଥିଲି ମୁଁ l କଣ ନା ଗୁରୁ l ଗୁରୁ ନା ଗୋରୁ? ଏମାନେ ସବୁ ଗୁରୁ ନାମରେ କଳଙ୍କ l ନାଚ ଶିଖେଇବା ବେଳେ କେତେ ଉପଦେଶ ଦେଉଥିଲେ l କେତେ ସ୍ୱପ୍ନ ଦେଖାଉଥିଲେ l ନାଚରେ ମୋତେ ପ୍ଲାଟଫର୍ମ୍ ଦେବେ l ଦେଶ ବିଦେଶରେ ମୋତେ ପରିଚୟ ଦେବେ, ଇତ୍ୟାଦି ଇତ୍ୟାଦି l ରଜ ପାଇଁ ରବିନ୍ଦ୍ର ମଣ୍ଡପରେ ରାଜଧାନୀ ନୃତ୍ୟ ମଣ୍ଡଳୀ ତରଫରୁ ଏକ ଭବ୍ୟ କାର୍ଯ୍ୟକ୍ରମ ଅନୁଷ୍ଠିତ ହେବ ଏବଂ ସେଥିରେ ମୋର ମୁଖ୍ୟ ଚରିତ୍ର ରହିବ ବୋଲି ମଧ୍ୟ ଗୁରୁଜୀ ଘୋଷଣା କରିଦେଲେ l ମୁଁ ବହୁତ ଖୁସି ଥିଲି l

       ସେ ଦିନ ରାତିରେ ଗୁରୁଜୀ ଫୋନ୍ କରି କହିଲେ (ଆଦେଶ ଦେଲେ) ମାମାକୁ କହି ପାଞ୍ଚଟା ଖଣ୍ଡେ ବିଜ୍ଞାପନ ଯୋଗାଡ କରିଦେବା ପାଇଁ l ମୁଁ ମୋ ମାମାକୁ ଜାଣେ l ମାମା କେବେ ବି ଶୁଣିବନି l ତେଣୁ ମୁଁ ରୋକଠୋକ ମନା କରି ଦେଲି l

       ବାସ୍ ତା ପରଦିନ ମୋ ଠାରୁ ମୁଖ୍ୟ ଚରିତ୍ର କାଢି ନିଆଗଲା, ଭାବ ଠିକ୍ ସେ ଦେଇପାରୁନି ବୋଲି l ସେ ଦିନ ଠାରୁ ତାଙ୍କର ବ୍ୟବହାରରେ ବହୁତ ପରିବର୍ତ୍ତନ l ମୋ ବିରୁଦ୍ଧରେ କୁତ୍ସାରଟନା l ଆଉ କିଛି ଅଧିକା ଘଟଣା ଘଟିବା ଆଗରୁ ମୁଁ ସେ ସଂସ୍ଥା ଛାଡିବା ନିଷ୍ପତ୍ତି ନେଇ ସାରିଥିଲି l