ଦାଗ

ନବନିର୍ବାଚିତ ଜନପ୍ରତିନିଧି ଜଣକ ନିଜ ନିର୍ବାଚନ ମଣ୍ଡଳୀ ପରିଦର୍ଶନ ଅବସରରେ ଯେତେବେଳେ ଆମରି ଗାଁର ରାଧୁଆ ସାହୁକୁ ତାର ଜମିରେ ହଳ କରୁଥିବା ଅବସ୍ଥାରେ କୁଣ୍ଡାଇ ପକାଇ କହି ଉଠିଲେ- "ତୁମେ ମାନେ ହେଲ ଆମ ଦେଶର ଗର୍ବ ଆଉ ଗୌରବ । ଚାଷୀର ସମ୍ମାନ, ଏ ମାଟି ମାଆର ସମ୍ମାନ । ତୁମମାନଙ୍କ ଯୋଗୁଁ ଏ ଦେଶ ଆଉ ଜାତି ବଂଚିଛି......"ସେତେବେଳେ ଉପସ୍ଥିତ ଜନତା ହେଲେ ସ୍ତମ୍ଭୀଭୂତ ।

ଜଣେ ନେତା ନିଜର ଧୋବ ଫରଫର ଇସ୍ତ୍ରୀଦିଆ କୁର୍ତ୍ତା ପାଇଜାମାରେ ଦାଗ ଲାଗିଯିବାକୁ ଖାତିର ନ କରି କାଦୁଅ ଲଟପଟ ରାଧୁଆକୁ କୋଳାଗ୍ରତ କରି ଯେଉଁ ମହାନତାର ପରିଚୟ ଦେଇଛନ୍ତି ତାହା ବାସ୍ତବରେ ବିରଳ । ଏଭଳି ନେତା ପାଇ ଆମ୍ଭେମାନେ ଧନ୍ୟ ହୋଇଗଲୁ- ପରସ୍ପର ମଧ୍ୟରେ ଆଲୋଚନା କରୁଥାନ୍ତି ଜନତା ।

ତା'ପରଦିନ ପୂର୍ବୋକ୍ତ ବସ୍ତ୍ରରେ ଦାଗ ଭଲ ଭାବରେ ଛାଡି ନ ଥିବାରୁ ନେତାଙ୍କ ଘରେ କାର୍ଯ୍ୟ କରୁଥିବା ନାବାଳକ ଚାକର ପିଲା ପିଠିରେ ବସିଥିଲା କେତୋଟି କ୍ଷତାକ୍ତ ଦାଗ........।