Quotes New

Audio

Forum

Read

Contests


Write

Sign in
Wohoo!,
Dear user,
କୁଆ ଏବଂ ପେଚା କାହାଣୀ
କୁଆ ଏବଂ ପେଚା କାହାଣୀ
★★★★★

© ଓଡିଆ ଶିଶୁ ଗପ

Children

3 Minutes   7.4K    11


Content Ranking

ଭାରତର ଦକ୍ଷିଣରେ ‘ମହିଳାରୋପ୍ୟ’ ନାମକ ଏକ ନଗରୀ ଥିଲା । ଏହି ନଗରୀ ମଧ୍ୟରେ ଏକ ବିରାଟ ବରଗଛ ରହିଥିଲା । ସେହି ବରଗଛଟିରେ କୁଆ ମାନଙ୍କର ରାଜା ‘ମେଘବର୍ଣ୍ଣ’ ତାର ବନ୍ଧୁ, ପରିଜନ ଏବଂ ଅନୁଚର ବର୍ଗଙ୍କୁ ନେଇ ବାସ କରୁଥିଲା । ସେହି ବରଗଛ ନିକଟରେ ଏକ ପର୍ବତ ଗୁମ୍ଫା ଥାଏ । ସେହି ଗୁମ୍ଫା ମଧ୍ୟରେ ପେଚା ରାଜା ‘ଅରିମର୍ଦ୍ଧନ’ ତା’ର ଅନୁଚର ମାନଙ୍କୁ ନେଇ ବାସ କରୁଥାଏ । କୁଆରାଜା ଏବଂ ପେଚା ରାଜା ଉଭୟଙ୍କ ମଧ୍ୟରେ କେଉଁ ପୁରାତନ କାଳରୁ ଶତ୍ରୁତାଥାଏ ।

ପେଚାମାନଙ୍କୁ ସାଧାରଣତଃ ରାତିରେ ଦେଖାଯାଏ, ଦିନରେ ଦେଖାଯାଏ ନାହିଁ । ତେଣୁ ସେମାନେ ଦିନବେଳା ଗୁହା ମଧ୍ୟରେ ଛପି ରହନ୍ତି । ରାତି ହେଲେ ଶିକାରକୁ ବାହାରନ୍ତି । ଶିକାର ନିମିତ୍ତ ମଧ୍ୟ ସେମାନଙ୍କୁ ବେଶୀ ପରିଶ୍ରମ କରିବାକୁ ପଡେ ନାହିଁ । ରାତିରେ ବରଗଛ ଚର୍ତୁପାଶ୍ୱର୍ରେ ବୁଲି ଛୋଟ ଛୋଟ କୁଆମାନଙ୍କୁ ମାରି ଖାଆନ୍ତି । ଫଳରେ କୁଆମାନଙ୍କର ସଂଖ୍ୟା ଦିନକୁ ଦିନ କମିବାରେ ଲାଗିଲା । ଦିନେ କୁଆରାଜା ମେଘବର୍ଣ୍ଣ ଏହି ପ୍ରସଙ୍ଗରେ ଆଲୋଚନା କରିବା ପାଇଁ ମନ୍ତ୍ରୀ ଏବଂ ପାରିଷଦ ବର୍ଗଙ୍କୁ ଦରବାରକୁ ଡକାଇଲେ । ପ୍ରଥମେ ମନ୍ତ୍ରୀ ‘ଉଜ୍ଜୀବ’ କହିଲେ, ‘ମହାରାଜ! ଯେହେତୁ ପେଚା ରାଜା ଅରିମର୍ଦ୍ଧନ ଆମ୍ଭମାନଙ୍କ ଉପରେ ରାତ୍ରି କାଳରେ ଆକ୍ରମଣ କରୁଛନ୍ତି । ସେ ନିଶ୍ଚିତ ରୂପେ ଶକ୍ତିଶାଳୀ । ପ୍ରଥମେ ତାଙ୍କ ଶକ୍ତି ସଂପର୍କରେ ଜାଣିବା ଉଚିତ୍ । ଯେହେତୁ ଆମର ଶତ୍ରୁ ବଳବାନ୍ । ତେଣୁ ତାକୁ ହଠାତ୍ ଆକ୍ରମଣ ନକରି ଶତ୍ରୁର ଦୁର୍ବଳ ସମୟରେ ତାକୁ ଆକ୍ରମଣ କରିବା ଉଚିତ୍ ହେବ ।’

ଦ୍ୱିତୀୟ ମନ୍ତ୍ରୀ ସଂଜୀବୀ କହିଲେ, ‘ଶତ୍ରୁ ସହିତ ଯୁଦ୍ଧ ନକରି ସନ୍ଧି କରିବା ଉଚିତ୍ । କାରଣ ଶତ୍ରୁ ଆମଠାରୁ ବଳବାନ୍ । ବଳବାନ୍ ଶତ୍ରୁ ସହିତ ଯୁଦ୍ଧ କରିବା ଅର୍ଥ ପରାସ୍ତ ହେବା ହିଁ ସାର ହୁଏ । ତେଣୁ ଶତ୍ରୁ ସହିତ ସମ୍ମୁଖ ଯୁଦ୍ଧ ନକରି କୂଟନୀତି ଦ୍ୱାରା ବଳବାନ୍ ଶତ୍ରୁକୁ ପରାସ୍ତ କରାଯାଇପାରେ । ଯେପରି ସିଂହ ବଳଶାଳୀ ହୋଇଥିଲେ ମଧ୍ୟ ସାମାନ୍ୟ ଠେକୁଆର ବୁଦ୍ଧି ନିକଟରେ ପରାଜିତ ହୋଇ ଶେଷରେ ମୃତ୍ୟୁ ବରଣ କଲା’ ।

ଏହାପରେ କୁଆରାଜା ମେଘବର୍ଣ୍ଣକୁ ତୃତୀୟ ମନ୍ତ୍ରୀ ‘ଅନୁଜୀବି’ କହିଲେ, ‘ମହାରାଜ! ଆମ୍ଭମାନଙ୍କର ଶତ୍ରୁ ବଳବାନ୍ । ତେଣୁ ତା ସହିତ ଯୁଦ୍ଧ କିମ୍ବା ସନ୍ଧି ସ୍ଥାପନ କରିବା ଉଚିତ୍ ହେବ ନାହିଁ । ଏହି କ୍ଷେତ୍ରରେ ଆମକୁ ଦୁଇଟି ପନ୍ଥା ଅବଲମ୍ବନ କରିବାକୁ ପଡିବ । ଚାଲନ୍ତୁ ଆମେ ସମସ୍ତେ ଏହି ଜାଗା ଛାଡି ଅନ୍ୟତ୍ର ପଳାଇବା । ନଚେତ୍ ପ୍ରଥମେ ଆମ୍ଭେମାନେ ଜାଣିବା ଆବଶ୍ୟକ ଯେ, ଯୁଦ୍ଧରେ ଆମେ ବିଜୟୀ ହେବା କି, ନାହିଁ । ଏହି ସମ୍ବନ୍ଧରେ ଅବଗତ ନହୋଇ ଯଦି ଆମେ ଶତ୍ରୁକୁ ଆକ୍ରମଣ କରିବା ତା’ହେଲେ ପରାଜୟ ସୁନିଶ୍ଚିତ ।’

ଏହାପରେ ମେଘବର୍ଣ୍ଣ ଚତୁର୍ଥ ମନ୍ତ୍ରୀ ‘ପ୍ରଜୀବୀ’ଙ୍କ ପରାମର୍ଶ ଲୋଡିଲେ । ପ୍ରଜୀବୀ ନିଜର ମତାମତ ଦେବାକୁ ଯାଇ କହିଲେ, ‘ମହାରାଜ! ଆପଣ ନିଶ୍ଚିନ୍ତରେ ଏଠାରେ ବାସ କରନ୍ତୁ । ସମସ୍ତେ ଯଦି ଏକାଠି ହୋଇ ରହିବା, ଯେତେ ବଡ ଶତ୍ରୁ ହେଲେ ମଧ୍ୟ ସେ ପରାଜିତ ହୋଇପାରିବ । ଉଦାହରଣ ଦେବାକୁ ଯାଇ କହିଲେ, ପାଣି ମଧ୍ୟରେ କୁମ୍ଭୀରଟି ବିରାଟକାୟ ହାତୀକୁ ଟାଣି ନେଇପାରେ ମାତ୍ର ପାଣି ମଧ୍ୟରୁ ବାହାରି ଆସିଲେ ସାମାନ୍ୟ କୁକୁର ଦ୍ୱାରା ମଧ୍ୟ ସେ ପରାଜିତ ହୋଇଥାଏ । ତେଣୁ ଅନ୍ୟ କୌଣସି ସ୍ଥାନକୁ ନଯାଇ ଏହି ସ୍ଥାନରେ ରହି ଆପଣ ଶତ୍ରୁର ମୁକାବିଲା କରନ୍ତୁ । ଦେଖିବେ ଆମ୍ଭେମାନେ ନିଶ୍ଚୟ ବିଜୟୀ ହେବା’ ।

ଏହାପରେ ରାଜା ମେଘବର୍ଣ୍ଣ ପଂଚମ ମନ୍ତ୍ରୀ ଚିରଂଜୀବିଙ୍କର ପରାମର୍ଶ ଲୋଡିଲେ । ଚିରଂଜୀବି କହିଲେ ‘ନିଜେ ଏକାକୀ କୌଣସି ପଦକ୍ଷେପ ନେବା ଉଚିତ୍ ନୁହେଁ । ଅନ୍ୟଠାରୁ ସାହାଯ୍ୟ ଗ୍ରହଣ କରିବା ଆବଶ୍ୟକ । ପବନ ବହୁ ଥିବା ସ୍ଥାନରେ ଜଳନ୍ତା ନିଆଁ ଲିଭିଯାଇଥାଏ । ତେଣୁ ଆପଣ ଏ ସ୍ଥାନ ଛାଡି କଦାପି ଅନ୍ୟତ୍ର ଯାଆନ୍ତୁ ନାହିଁ । ଅନ୍ୟ ସ୍ଥାନରେ ଆପଣଙ୍କୁ କେହି ସାହାଯ୍ୟ କରିବେ ନାହିଁ । ଜ୍ୱଳନ୍ତ ଅଗ୍ନିଶିଖାକୁ ପବନ ସାହାଯ୍ୟ କରିଥାଏ କିନ୍ତୁ ଅନ୍ୟତ୍ର ଏକାକୀ ଜଳୁଥିବା ଦୀପଶିଖାକୁ ପବନ କଦାପି ସାହାଯ୍ୟ କରିନଥାଏ’ ।

ମେଘବର୍ଣ୍ଣଙ୍କ ଦରବାରର ପାଂଚଜଣ ମନ୍ତ୍ରୀ ପାଂଚ ପ୍ରକାର ମତବ୍ୟକ୍ତ କଲେ । ପାଂଚଜଣଙ୍କ ମଧ୍ୟରୁ ରାଜା କାହାର ମତକୁ ଗ୍ରହଣ କରିବେ କିଛି ଠିକ୍ କରିପାରିଲେ ନାହିଁ । ବଡ ଦ୍ୱନ୍ଦ୍ୱରେ ପଡିଲେ । ଶେଷରେ ରାଜାଙ୍କ ମନକୁ ଏକ ଚିନ୍ତା ଆସିଲା । ନିଜ ପିତାଙ୍କ ସମୟରେ ସ୍ଥିରଜୀବି ନାମକ ଜଣେ ବୃଦ୍ଧ ମନ୍ତ୍ରୀ ଥିଲେ । ସେ ଥିଲେ ଅତ୍ୟନ୍ତ ବୁଦ୍ଧିମାନ୍ । ରାଜା ମେଘବର୍ଣ୍ଣ ତାଙ୍କରି ମତାମତ ଲୋଡିଲେ । ତାଙ୍କ ପାଖରେ ଯାଇ ପହଁଚି କହିଲେ, ‘ମହାଶୟ! ମୋର ପ୍ରଣାମ ଗ୍ରହଣ କରନ୍ତୁ ।’ ଏହା କହିସାରି ଏ ପର୍ଯ୍ୟନ୍ତ ଘଟିଥିବା ସମସ୍ତ ଘଟଣା ବର୍ଣ୍ଣନା କଲେ । ଏବଂ କେଉଁ ମତାମତକୁ ସେ ଗ୍ରହଣ କରିବେ ତାହା ତାଙ୍କୁ ସ୍ଥିରଜୀବି କହିଲାପରେ ସେ ତାହା ସାଦରେ ଗ୍ରହଣ କରିବେ ।

ସବୁ ଶୁଣି ସାରିବା ପରେ ସ୍ଥିରଜୀବି କହିଲେ, ଆପଣଙ୍କ ଦରବାରର ମନ୍ତ୍ରୀମାନେ ନୀତିଶାସ୍ତ୍ର ଅନୁଯାୟୀ ମତପ୍ରଦାନ କରିଛନ୍ତି । କିନ୍ତୁ ବର୍ତ୍ତମାନ ଏହି ବିପଦକୁ ଏଡାଇବା ପାଇଁ ତାହା ଆମର କୌଣସି କାର୍ଯ୍ୟରେ ଆସିବ ନାହିଁ । ଶତ୍ରୁକୁ ପରାଜିତ କରିବାକୁ ହେଲେ କୂଟ ନୈତିକ କୌଶଳ ଅବଲମ୍ବନ କରିବା ଆବଶ୍ୟକ । ପ୍ରଥମେ ଶତ୍ରୁ ସହିତ କପଟ ଭାବରେ ମିତ୍ରତା ସ୍ଥାପନ କରି ତା’ର ଦୁର୍ବଳତାକୁ ଅନୁସନ୍ଧାନ କରିବ । ଉଚିତ୍ ସମୟ ସୁଯୋଗ ଦେଖି ଶତ୍ରୁକୁ ଧ୍ୱଂସ କରିବ ।

ମହିଳାରୋପ୍ୟ ବରଗଛ ଅରିମର୍ଦ୍ଧନ

Rate the content


Originality
Flow
Language
Cover design

Comments

Post

Some text some message..