ଭଗବାନଙ୍କ ଠିକଣା

ଭଗବାନ'ଙ୍କ ଠିକଣା (୧)

★★★★★★★★

ଟିଉସନ ସାର୍ ଆସିନଥିବାରୁ ସେଦିନ ଲିପ୍ସା ପୁଅ ପିଣ୍ଟୁକୁ ପାଠ ପଢ଼ାଇବାକୁ ବସିଲେ।

ଗଣିତ ଓ ବିଜ୍ଞାନରେ ଟିକେ ଦୁର୍ବଳ ଲିପ୍ସା।ସ୍ୱାମୀ ନରେଶ ,ଏଇ ଦୁଇ ବିଷୟ ଦେଖନ୍ତି।

ସାହିତ୍ୟ ବହି କାଢ଼ିବାକୁ ନିର୍ଦେଶ ଦେଲେ ଲିପ୍ସା।

" ପିତାମାତା ଓ ଗୁରୁଜନଙ୍କୁ ଭକ୍ତି " ବିଷୟ ପଢ଼ାଇବାକୁ ଯାଇ ,ଲିପ୍ସା ବୁଝାଇଲେ, "ବାପା ,ମା ହେଉଛନ୍ତି ପ୍ରକୃତ ଭଗବାନ।ସେମାନଙ୍କୁ ଆମେ ପୂଜା କରିବା ଉଚିତ। ସେମାନଙ୍କ ସେବା କଲେ ଆମକୁ ସବୁଠୁ ଅଧିକ ପୁଣ୍ୟ ମିଳେ।"

ଖୁସି ହୋଇଯାଇ ପିଣ୍ଟୁ କହିଲା, "ମମି, ତା ହେଲେ ତମେ ଓ ବାପା ,ଜେଜେ ଜେଜେମାଙ୍କୁ ଘରେ ନରଖି ବୃଦ୍ଧାଶ୍ରମରେ କାହିଁକି ରଖିଛ ?ଆଉ ସବୁଦିନ ଠାକୁର ଘରେ ପଶି ଘଣ୍ଟା ଘଣ୍ଟା ଧରି ଏ ଫଟ ଆଗରେ କାହିଁକି ପୂଜା କରୁଛ ?"

ପାଟିଟା ଆଫୁ ଆଫୁ ହୋଇଯାଉଥିଲା ଲିପ୍ସାଙ୍କର।ସ୍ବାମୀଙ୍କ ଉଦ୍ଦେଶ୍ୟରେ ଡାକ ପକାଇଲେ, " ଠାକୁର ଘରୁ ଜଲଦି ବାହାରି ପିଣ୍ତୁକୁ ସାହିତ୍ୟ ପଢାଅ।"

"ଓହୋ,ସାହିତ୍ୟ ବି ପାରୁନ ?"

ମୁହଁକୁ ମୋଡି ଲିପ୍ସା କହିଲେ, "ତମ ପୁଅ ସିଲାବସ ବାହାର ପ୍ରଶ୍ନ ପଚାରୁଛି ପରା।"

(ଅରବିନ୍ଦ ଦାସ )

************

ଭଗବାନଙ୍କ ଠିକଣା (୨)

ସ୍କୁଲରେ ଶିକ୍ଷକ ପିଲାଙ୍କୁ ପଚାରିଲେ,"ଆଛା ,ପିଲେ କହିଲ,ଭଗବାନ କେଉଁଠି ରହନ୍ତି ?"

ରାଜୁ ହାତ ଟେକିଲା।ଖୁସି ହୋଇ ଶିକ୍ଷକ ପଚାରିଲେ "ତୁମେ ଜାଣିଛ ଭଗବାନଙ୍କ ଠିକଣା ?କୁହ।"

" ସାର୍, ଭଗବାନ ଦୁଇଟା ଜାଗାରେ ରୁହନ୍ତି।"

ଅତିଶୟ ଆନନ୍ଦରେ ଶିକ୍ଷକ କହିଲେ, "ହୃଦୟ ଓ ମନ୍ଦିରରେ ତ "?

ନାସ୍ତିସୂଚକ ମୁଣ୍ଡ ହଲାଇ ରାଜୁ କହିଲା, "ବୟସ ଥିଲା ପର୍ଯ୍ୟନ୍ତ ଭଗବାନ ଘରେ ରୁହନ୍ତି, ବୁଢ଼ା ବୁଢ଼ୀ ହୋଇଗଲେ ଭଗବାନ ,ବୃଦ୍ଧାଶ୍ରମରେ ରୁହନ୍ତି।"

ଶିକ୍ଷକ ଜଡ ପାଲଟି ଯାଉଥିଲେ।

(ଅରବିନ୍ଦ ଦାସ)