Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

Natesh MG

Tragedy Thriller classics


3.5  

Natesh MG

Tragedy Thriller classics


ಪೋಸ್ಟ್ ಮಾರ್ಟಂ.

ಪೋಸ್ಟ್ ಮಾರ್ಟಂ.

6 mins 112 6 mins 112

"ಮಾನ್ಯ ಜಿಲ್ಲಾಧಿಕಾರಿಗಳ ನ್ಯಾಯಾಲಯ " ಅದು .


ಆವತ್ತು , ತಾಲೂಕಿನ "ಮುಖ್ಯ ವೈದ್ಯಾಧಿಕಾರಿ , ಪೊಲೀಸ್ ಇನ್ಸ್ಪೆಕ್ಟರ್ " ಮತ್ತು .....ಸರ್ಕಾರಿ ಆಸ್ಪತ್ರೆಯ ಜವಾನ "ಶಿವಪ್ಪ "ಹೊರಗಡೆ ಕುಳಿತಿದ್ದರು .


ಆವತ್ತಿನ ವಿಚಾರಣೆಯಲ್ಲಿ "ಶಿವಪ್ಪ "ಎಂಬ ಸರಕಾರಿ ಜವಾನನ "ಭವಿಷ್ಯ" ನಿರ್ಧಾರ ಮಾಡಲಿದ್ದು , ಪಕ್ಕ ಕುಳಿತ ಇನ್ಸಪೆಕ್ಟರ್ ....ಹಾಗೂ ಮುಖ್ಯ ಆರೋಗ್ಯ ಅಧಿಕಾರಿಯ ಮುಖದಲ್ಲಿ , "ಅವಹೇಳನೆಯ "ನಗು ಕಂಡುಬರುತ್ತಿತ್ತು.

ಜಿಲ್ಲಾಧಿಕಾರಿಗಳು ಬಂದ ನಂತರ , ಅಲ್ಲಿನ ಜವಾನ ಕೂಗಿ ಹೇಳಿದ್ದ . "ಎಲ್ಲರೂ ಒಳಗೆ ಬರಬೇಕೆಂದು ". ಎಲ್ಲರೂ ಒಳಗೆ ನಡೆದಿದ್ದರು , ಕೊನೆಯಲ್ಲಿ ಶಿವಪ್ಪ ಮಾತ್ರ ,ಹೆಜ್ಜೆ ಮೇಲೆ ಹೆಜ್ಜೆ ಇಡುತ್ತಾ ಹೋಗಿ ನಿಂತಿದ್ದ .

        

ಅಷ್ಟರಲ್ಲೇ ಒಳಗೆ ನಮಸ್ಕರಿಸಿ , ನುಗ್ಗಿ ಬಂದಿದ್ದ ಸರ್ಕಾರಿ ವಕೀಲ ,ರಾಜೀವ ನಾಯ್ಕ . ಎದುರಿಗಿನ ಜಿಲ್ಲಾಧಿಕಾರಿಗಳಾದ ಚಕ್ರವರ್ತಿ ಅವರಿಗೆ , ಎಲ್ಲವೂ ನಿಚ್ಚಳ ಆಗಿತ್ತು . ಶಿವಪ್ಪ ಕುಡಿದು ಬಂದು , ಉದ್ಯೋಗ ಮಾಡಿದ ಎಂದು . ಅದಕ್ಕಾಗಿ ಆತ , ಸತ್ತವರ ಬಳಿ "ನೂರು ರೂಪಾಯಿ ಲಂಚ ಪಡೆದಿದ್ದಾನೆ " ಎಂಬುದು ಕೂಡ . ವಿಚಾರಣೆ ಎಂಬುದು ಕೇವಲ ಒಂದು ಭಾಗ ಅಷ್ಟೇ , ಅವನನ್ನು ಕೆಲಸದಿಂದ "ವಜಾ "ಮಾಡಲು ... ಎಂಬುದು ಕೂಡ ಅರಿತಿದ್ದರು ಅವರು. ಶಿವಪ್ಪ ಒಳಗೆ ಇದ್ದ "ಕಟಕಟೆಯಲ್ಲಿ "ನಿಂತಿದ್ದ . ಆತನ ಮುಖದಲ್ಲಿ ಮಾತ್ರ ಆವತ್ತು , ಹಿಂದೆಂದೂ ಕಾಣದ ದುಃಖ ಇತ್ತು.

   ಚಕ್ರವರ್ತಿ ಸಾಹೇಬರು ಕೂಡ , ಆತನ ಕಡೆ ನೋಡಿದರು ಕನಿಕರದಿಂದ .  ಅಷ್ಟರಲ್ಲಿ ಶುರು ಮಾಡಿದ್ದ , ತನ್ನ ವಾದವನ್ನು ಸರಕಾರಿ ವಕೀಲ ಪಂಡಿತ್ .  ಸ್ವಾಮಿ , ಇಲ್ಲಿ ನಿಂತವನು "ಶಿವಪ್ಪ "ಎಂದು . ಸರಕಾರಿ ಆಸ್ಪತ್ರೆಯಲ್ಲಿ , ಮೂವತ್ತು ವರ್ಷದಿಂದ ಕೆಲಸ ಮಾಡುತ್ತಿದ್ದಾನೆ . "ಡೀ ದರ್ಜೆಯ ನೌಕರನಾಗಿ ".

                     

"ಅವನ ಮೇಲಿನ ಮೊದಲ ಆರೋಪ ....ಕುಡಿದು ಕೆಲಸ ಮಾಡಿದ ಎಂದು . ಹಾಗೂ ಎರಡನೇ ಆರೋಪ ..... ಸುಟ್ಟ ಗಾಯದಿಂದ ಮೃತಪಟ್ಟ "ಹೆಂಗಸಿನ "ಶರೀರ ಪೋಸ್ಟ್ ಮಾರ್ಟಂ ಮಾಡಲು .....ಅವರ ತಂದೆಯಿಂದಲೇ ನೂರು ರೂಪಾಯಿ "ಲಂಚ " ತೆಗೆದುಕೊಂಡಿದ್ದ ಎಂಬುದು".  ಸರಕಾರಿ ವಕೀಲ ಇಷ್ಟು ಹೇಳಿ , ತನ್ನ ವಾದ ಹೇಗೆ ಇದೆ ಎಂದು? ....ಒಳಗೆ ಕುಳಿತ , ಪೋಲಿಸ್ ಇನ್ಸ್ಪೆಕ್ಟರ್ ಕಡೆ ನೋಡಿದ ಆತ .  ಅವರ ಕಣ್ಣಲ್ಲಿ ಕೂಡ ಮೆಚ್ಚುಗೆ . ಒಂದು ಉತ್ತಮ ಕೆಲಸದಲ್ಲಿ ಇದ್ದವರು , ಸಮಾಜದಲ್ಲಿ ಒಳ್ಳೆಯ ಹೆಸರನ್ನು ಪಡೆದವರು ....ಒಬ್ಬ ಸಣ್ಣ ನೌಕರನ ವಿರುದ್ಧ ನಿಂತು ಬಿಟ್ಟಿದ್ದರು ಆವತ್ತು .  ತಾವು ಎಷ್ಟು "ಪ್ರಾಮಾಣಿಕರು "ಎಂದು ತೋರಿಸಿಕೊಳ್ಳಲು.   ಕೇಳುತ್ತಾ ಇದ್ದ ಶಿವಪ್ಪ , ತನ್ನ ಮೇಲಿನ ಆರೋಪವನ್ನು . ಯಾವುದೂ "ಸುಳ್ಳು "ಇರಲಿಲ್ಲ .

  

 ಮುಂದೆ ವಕೀಲ ನುಡಿದಿದ್ದ."ಸ್ವಾಮಿ ಅದಕ್ಕೆ ಸಂಬಂಧಪಟ್ಟಂತೆ ಇರುವ ಎಲ್ಲಾ "ದಾಖಲೆಗಳನ್ನು ", ನಿಮ್ಮಮುಂದೆ ಈಗಾಗಲೇ ಹಾಜರು ಮಾಡಿದ್ದೇನೆ . ಅದನ್ನು ಪರಿಗಣಿಸಿ ತಾವು , ಅಲ್ಲಿ ನಿಂತಿರುವ "ಆರೋಪಿಯನ್ನು "ತಕ್ಷಣಕ್ಕೆ ಜಾರಿಗೆ ಬರುವಂತೆ ...ಕೆಲಸದಿಂದ ವಜಾ ಮಾಡಬೇಕೆಂದು ಕೋರಿಕೆ " ಎಂದು , ಕೈ ಮುಗಿದು ಕುಳಿತಿದ್ದ .  ಎಲ್ಲರಿಗೂ ಅರಿವು ಇತ್ತು , ಶಿವಪ್ಪ ಕೆಲಸದಿಂದ ವಜಾ ಆಗುತ್ತಾನೆ ಎಂದು .  "ನಿನ್ನ ಕಡೆ ವಾದ ಮಾಡಲು ಯಾರು ಇಲ್ಲವೇ " ಎಂದು ಕೇಳಿದ್ದರು , ಜಿಲ್ಲಾಧಿಕಾರಿ ಚಕ್ರವರ್ತಿಯವರು . ಅದೊಂದು "ಪ್ರಕ್ರಿಯೆ "ಮಾತ್ರ ಉಳಿದಿತ್ತು ಅಷ್ಟೇ.  ಕೈ ಮುಗಿದು ಹೇಳಿದ್ದ ಶಿವಪ್ಪ .

"ಯಾರನ್ನೂ ಕೂಡ ವಾದ ಮಾಡಲು , ನಾ ನೇಮಕ ಮಾಡಿಲ್ಲ ಸ್ವಾಮಿ "ಎಂದು .  "ಎಲ್ಲವೂ ಸತ್ಯವೇ ಅವರು ಹೇಳಿದ್ದು .ಆದರೆ ತಾವು ದಯವಿಟ್ಟು , ನನ್ನ ಐದು ನಿಮಿಷದ ಮಾತು ಕೇಳಿ" ಎಂದು ವಿನಂತಿ ಮಾಡಿದ್ದ . "ಕುಡಿದಿದ್ದು ಹೌದು ಮಹಾ ಸ್ವಾಮಿ , ಯಾಕೆ ಅಂದರೆ "..... ಆತನ ಕಣ್ಣಲ್ಲಿ ನೀರಿತ್ತು . "ಆದರೆ ನಾನು "ಕುಡುಕನಲ್ಲ "ಮಹಾಸ್ವಾಮಿ ".


"ಆದರೆ ಈ "ಪೋಸ್ಟ್ ಮಾರ್ಟಂ "ಮಾಡಲು ಹೋಗುವಾಗ , ಅದು ನನಗೆ ಅದು ಬೇಕೆ ಬೇಕು . ಈ ಮೂವತ್ತು ವರ್ಷದಿಂದ , ನಾನು ಇದನ್ನೇ ಮಾಡಿದ್ದೇನೆ ಕೂಡ ". ಚಕ್ರವರ್ತಿ ಅವರಲ್ಲಿ ಕುತೂಹಲ . ಈತನಲ್ಲಿ ಮಾತನಾಡಲು , ಏನು ವಿಷಯ ಇರುತ್ತೆ ಎಂದು. "ಅಲ್ಲಿ ಸತ್ತವರ ದೇಹವನ್ನು ಕೊಯ್ದು , ಅದರಲ್ಲಿ ವೈದ್ಯರು ಹೇಳಿದ ಅಂಗವನ್ನು ತೆಗೆದು ...ಮತ್ತೆ ಶರೀರವನ್ನು "ಹೊಲಿಯುವ "ಕೆಲಸ ನನ್ನದು . ಮಾಮೂಲಿ ಮನಸು ಅದಕ್ಕೆ ಒಗ್ಗುವುದಿಲ್ಲ . ಯಾಕೆ ಅಂದರೆ , ಸತ್ತ ಸಣ್ಣ ಮಕ್ಕಳ "ತಲೆ "ಒಡೆದು ,ಅವರ ಮೆದುಳಿನ ಭಾಗ ತೆಗೆಯಬೇಕು . ಅದು ಕೂಡ , ಅವರ ತಲೆಗೆ "ಸುತ್ತಿಗೆ "ಪೆಟ್ಟು ಹಾಕಿ".

ಶಿವಪ್ಪ ಭಾವುಕನಾಗಿ ಹೋಗಿದ್ದ . ಅಲ್ಲಿನ ಪ್ರತಿ ಚಿತ್ರ , ಅವನ ಕಣ್ಣ ಮುಂದೆ ಬರುತ್ತಿತ್ತು. "ದೇಹ ಸತ್ತಿರಬಹುದು ಸ್ವಾಮಿ , ಆದರೆ ಅದನ್ನು ಮತ್ತಷ್ಟು ಹಿಂಸಿಸಿ ...ಅದರ ಎದೆಯ ಭಾಗವನ್ನು , ಹೊಟ್ಟೆಯನ್ನು ಕೊಯ್ದು ...ಅದರ "ತುಣುಕು "ಇಡುವ ಕೆಲಸ ನನ್ನದು , ವೈದ್ಯರು ಹೇಳಿದ ಹಾಗೆ . ಕಡೆಗೆ ಕೂಡ ...ಅದನ್ನು ಸೇರಿಸಿ ಹೊಲೆಯಬೇಕು ನಾನು , ಪೇಟೆಯಲ್ಲಿ ಸಿಗುವ ಹಗ್ಗದಿಂದ .ಬಿಗಿದು ಹೋದ ಮಾಂಸದಲ್ಲಿ , "ಸೂಜಿ " ಬರೋಲ್ಲ ಸ್ವಾಮಿ , ಅದಕ್ಕೆ ದೊಡ್ಡ "ದಬ್ಬಣ "ಬೇಕು .


ಎಂತಹ ಹಣೆಬರಹ ನೋಡಿ ನನ್ನದು " . ಎಂದು ಅಲ್ಲೇ ಕುಸಿದು ಕುಳಿತಿದ್ದ ಆತ . ಕಣ್ಣಲ್ಲಿ "ಧಾರಾಕಾರವಾಗಿ " ನೀರು ಹರಿದು ಹೋಗುತ್ತಿತ್ತು .ಚಕ್ರವರ್ತಿ ಸಾಹೇಬರಿಗೆ ಕೂಡ , ಎಲ್ಲೋ ಮನಸಿಗೆ ತಾಗಿದ ಹಾಗಿತ್ತು ಮಾತು . " ನೀರು ಏನಾದರೂ ಬೇಕ ಶಿವಪ್ಪ "ಎಂದು ಕೇಳಿದ್ದರು . "ಗಂಡನಿಂದ "ಸುಟ್ಟು "ಕರಕಲು ಆದ ಹೆಂಗಸು , ಬೈಕ್ ಮೇಲಿಂದ ಬಿದ್ದ ಮಕ್ಕಳು...ಸಾಲ ತೀರಿಸಲು ಆಗದ "ರೈತನ "ಶರೀರ . ಈಜಲು ಹೋದ "ಮಕ್ಕಳ "ಶರೀರಗಳು ಸ್ವಾಮಿ ,ಅಲ್ಲಿಗೆ ಬರುವುದು .

 ಕೆಲವೊಮ್ಮೆ , ಅಪಘಾತದಲ್ಲಿ "ತಲೆಯೇ" ಇಲ್ಲದ ಶರೀರ . ತುಂಬಿದ ಬಸುರಿಯ ಶರೀರ ಕೂಡ ಕೆಲವೊಮ್ಮೆ ".

ಇದನ್ನು ಹೇಳುವಾಗ , ದೊಡ್ಡದಾಗಿ ಅತ್ತು ಬಿಟ್ಟ ಶಿವಪ್ಪ .  "ಹೇಗೆ ಸ್ವಾಮಿ ಮಾಡಲಿ ನಾನು , ಮಾಮೂಲಿ ಮನುಷ್ಯನಂತೆ ಈ ಕೆಲಸಗಳನ್ನು . ಹೇಗೆ ಬಸುರಿಯ ಹೊಟ್ಟೆಯನ್ನು ಕೊಯ್ದು ....ಕಣ್ಣು ಬಿಡದ ಮಗುವನ್ನು ಎತ್ತಿ ಇಡಲಿ ಹೊರಗೆ .

ಎಲ್ಲಾ "ಹೆಣದ ಕಣ್ಣುಗಳು "ನನ್ನನ್ನೇ ನೋಡುತ್ತಿರುವಾಗ . ಡಾಕ್ಟರ್ ಬಳಿ ಇರುವ , "ಚೂಪು ತುದಿಯ" ಬ್ಲೇಡ್ ಸೌಲಭ್ಯ ಕೂಡ ನನಗಿಲ್ಲ . ನನ್ನ ಬಳಿಯ ಬಾಕು , ನನ್ನ ಬಳಿಯ ಸುತ್ತಿಗೆ ....ಕಡೆಗೆ ಕೂಡ ಯಾವುದೋ ...ಪ್ಲಾಸ್ಟಿಕ್ ಹಗ್ಗದಲ್ಲಿ ಹುಲಿಗೆ ಹಾಕಿ , ಶರೀರವನ್ನು ಒಟ್ಟು ಮಾಡಿ ಕೊಡುವ ಕೆಲಸ ಸ್ವಾಮಿ ನನ್ನದು ". ಕೇಳುತ್ತಿದ್ದ ಚಕ್ರವರ್ತಿ ಅವರ "ಹೃದಯದಲ್ಲಿ" ಕೂಡ ಸಣ್ಣ ಕಂಪನ .  ಕಣ್ಣೀರು ಬಸಿದು ಹೋಗುತ್ತಿತ್ತು ಶಿವಪ್ಪನ ಕಣ್ಣಿನಿಂದ .


"ಪ್ರತಿ ಬಾರಿ ಹೆಣದ ಮುಂದೆ ಕುಳಿತಾಗ , ನನಗೆ ಕಾಣಿಸುವುದು ನನ್ನ ಮಗ , ನನ್ನ ಮಗಳು . ಸತ್ತು ಹೋದ ಹುಡುಗ ಬದುಕಿ ಇದ್ದರೆ , ಎಂಬ ಭಾವನೆ ಸ್ವಾಮಿ . ಈಜಲು ಹೋದ ಮಗುವನ್ನು , ಮತ್ತಷ್ಟು ಹಿಂಸೆ ಕೊಡುತ್ತೇನೆ ಎಂಬ ಸಂಕಟ ಸ್ವಾಮಿ .

ಅಲ್ಲಿ ನನಗೆ ಕಾಣಿಸುವುದು ಶವ ಅಲ್ಲ , ಕಾಣಿಸುವುದು ಅವರ ಮುಂದಿನ ಬದುಕು . ಅದಕ್ಕೆ ಈ ಕೆಲಸ ಮಾಡಲು , "ಮನಸು " ಎಂಬುದು ಇರಬಾರದು ಸ್ವಾಮಿ "...ಎಂದಿದ್ದ ಶಿವಪ್ಪ . ಎಲ್ಲವೂ "ಸತ್ಯವಿತ್ತು "ಆತನ ಮಾತಿನಲ್ಲಿ .

 "ಮನೆಗೆ ಹೋದರೆ , ಅದೆಷ್ಟೇ ಸ್ನಾನ ಮಾಡಿದರೂ ಕೂಡ ಹೋಗದ ನನ್ನ ಕೆಲಸದ ವಾಸನೆ .

        

ರಾತ್ರಿ ಮಲಗಿದರೂ ಕೂಡ ,ಮುಂದೆ ನಿಲ್ಲುವ ಶವದ ಮುಖಗಳು ....." ಹೇಳುತ್ತಲೇ ಇದ್ದ ಆತ . ಹೊಟ್ಟೆಯಿಂದ ಸಂಕಟ , ಎದ್ದು ಹೊರಗೆ ಬರುತ್ತಿತ್ತು ಅವನಿಗೆ . " ಅದಕ್ಕೆ ಸ್ವಾಮಿ , ಮನಸನ್ನು ಕೊಲೆ ಮಾಡಲು ನಾನು ಕುಡಿದು ಹೋಗುತ್ತಿದ್ದೆ ...ಶವಾಗಾರಕ್ಕೆ . ನಾನು ಏನು ಮಾಡುತ್ತಿದ್ದೇನೆ , ಯಾವ ಮುಖ ಅದು ಎಂಬುದು ಕೂಡ ತಿಳಿಯಬಾರದು ನನಗೆ ...ಅದಕ್ಕಾಗಿ ನಾನು "ಕುಡಿದು "ಹೋಗುತ್ತಿದ್ದೆ . ಕಣ್ಣು ಮಸುಕಾಗಿ , ಮನಸು ಎಂಬುದೇ ಸತ್ತು ಹೋಗಬೇಕೆಂದು ...ಕುಡಿಯುತ್ತೇನೆ ಸ್ವಾಮಿ . ನೂರು ರೂಪಾಯಿ ಪಡೆದಿದ್ದು ನಿಜ ಸ್ವಾಮಿ . ಆವತ್ತು ಗಂಡನಿಂದ ಸುಟ್ಟು ಹೋದ , ತುಂಬಿದ "ಬಸುರಿಯ ಹೆಣವನ್ನು "ನಾನು ಕೊಯ್ದು ಹಾಕಬೇಕಿತ್ತು .  ಅವಳ ಹೊಟ್ಟೆಯಲ್ಲಿ ಇದ್ದ ಮಗುವನ್ನು , ಅಳತೆ ಮಾಡಬೇಕಿತ್ತು . ದುಡ್ಡು ಇರಲಿಲ್ಲ ನನ್ನ ಬಳಿ , ಅದಕ್ಕಾಗಿ ಆವತ್ತು ಕೇಳಿದೆ ಸ್ವಾಮಿ "...ಎಂದು ಕೈ ಜೋಡಿಸಿ ನಿಂತು ಬಿಟ್ಟಿದ್ದ . "ಆದರೆ ಅವರ ದುಡ್ಡಿಗೆ , ನಾನೇ ಸ್ಮಶಾನದಲ್ಲಿ ಗುಂಡಿ ಹೊಡೆದು ಕೊಟ್ಟೆ ....ಅದೆಷ್ಟು ಚಿತ್ರಹಿಂಸೆ ಪಟ್ಟು ಹೆಣವಾಗಿ ಹೋದಳು ಆಕೆ ". ದ್ವನಿ ಕಟ್ಟಿ ಬರುತಿತ್ತು ಆತನದು .  ವಾದ ಮಾಡಲು ಬಂದ ಸರಕಾರಿ ವಕೀಲ , ಮೇಲೆ ಕುಳಿತಿದ್ದ "ಚಕ್ರವರ್ತಿ ಸಾಹೇಬರಿಗೆ "ಕೂಡ ಕಣ್ಣು ಮಂಜಾದ ಹೊತ್ತು ಅದು . "ದಯಮಾಡಿ ನನ್ನ ಕೆಲಸದಿಂದ ತೆಗೆದು ಬಿಡಿ ... ಈ ಹೆಣ ಕೊಯ್ದು , ಅದನ್ನು ಜೋಡಿಸುವ ಕೆಲಸದಿಂದ ...ನನಗೆ ಮುಕ್ತಿ ಕೊಡಿಸಿ ಬಿಡಿ ಸ್ವಾಮಿ "ಎಂದು ಗೋಳೋ ಎಂದು ಆತ್ತಿದ್ದ ."ಅತ್ಯಾಚಾರ "ಮಾಡಿ , ಆಕೆಯನ್ನು ಕೊಲೆ ಮಾಡಿ ಹೋದ ಶವವನ್ನು , ನಾನೇ ಮತ್ತೊಮ್ಮೆ ಆಕೆಯನ್ನು ನಗ್ನ ಮಾಡಿ ...ಅದೆಷ್ಟು "ಹಾನಿ "ಆಗಿದೆ ಎಂದು ಹೇಳಬೇಕು ..  ಆಕೆಯ ಪ್ರತಿ ಅಂಗವನ್ನು ಮತ್ತೊಮ್ಮೆ ಕತ್ತರಿಸಿ . ಆಗ ನೆನಪು ಆಗುವುದು ನನ್ನ ಮಗಳು ....ಹೊರಗೆ "ಅಪ್ಪ ಅಮ್ಮನಿಗೆ " ಕೈ ಬೀಸಿ ಶಾಲೆಗೆ ಹೋಗುವ ಹೆಣ್ಣು ಮಕ್ಕಳು .  ಅದೇ "ಅತ್ಯಾಚಾರಿಗಳಿಗೆ " ತಲೆ ಸರಿ ಇರಲಿಲ್ಲವೆಂದು , ಅದಕ್ಕಾಗಿ ಅವರಿಗೆ ಜಾಮೀನು ಕೊಡಬೇಕೆಂದು ....ಜಾಮೀನು ಕೂಡ ಕೊಡಿಸಿ ಬಿಟ್ಟರು ಇಲ್ಲಿ ಕುಳಿತವರು ".


ದುಃಖ ಉಕ್ಕಿ ಬರುತ್ತಿತ್ತು ಆತನಿಗೆ , ತನ್ನ ಕೆಲಸ ಹೋಗುತ್ತದೆ ಎಂದು ಅಲ್ಲ . ತನ್ನ ಮನಸನ್ನು ಕೊಲೆ ಮಾಡಿಕೊಂಡು , ಇನ್ನೆಷ್ಟು ಹೆಣ ಕೊಯ್ದು ಹಾಕಬೇಕೆಂಬ ಸಂಕಟ ಅದು .ಜಿಲ್ಲಾಧಿಕಾರಿಗಳಿಗೆ , ಒಬ್ಬ ಸರಕಾರಿ ಡೀ ದರ್ಜೆ "ನೌಕರನ ನೋವು " ತಿಳಿದ ದಿನ ಅದು . ಮುಂದೆ ಇದ್ದ ಯಾರಿಗೂ ಕೂಡ , ತಮ್ಮ ಕಣ್ಣಲ್ಲಿ ತುಂಬಿದ "ನೀರು "ಕಾಣಿಸಬಾರದು ಎಂದು ...ಮುಖವನ್ನು ತಿರುಗಿಸಿ ಬಿಟ್ಟಿದ್ದರು , ಗಾಳಿ ಬರುತ್ತಿದ್ದ ಕಿಟಕಿಯ ಕಡೆಗೆ. ಆವತ್ತು ತಾನು "ಬರೆಯುವ "ಒಂದೇ ವಾಕ್ಯ , ಅವನ ಮೂವತ್ತು ವರ್ಷದ ಸೇವೆ ....ಸೇವೆಯ ನಂತರ ಬರುವ ಕೆಲ ಸವಲತ್ತು ...ಎಲ್ಲವೂ ನಿಂತು ಹೋಗುತ್ತದೆ ಎಂದು ತಿಳಿದಿತ್ತು .   ನಿರ್ಧಾರ ತೆಗೆದುಕೊಳ್ಳುವ ಸಮಯ ಹತ್ತಿರ ಆಗಿತ್ತು . ಆಗ ನುಡಿದಿದ್ದರು ಅವರು . "ವೈದ್ಯಾಧಿಕಾರಿ , ಮತ್ತು ಇಲ್ಲಿ ಇರುವ ಪೋಲಿಸ್ ಇನ್ಸಪೆಕ್ಟರ್ ಮೇಲೆ ಕೂಡ ...ಕೆಲ ಆರೋಪ ಇದೆ ಅಲ್ಲವೇ".

  "ಆಫ್ ದೀ ರೆಕಾರ್ಡ್ ಇದು "ಎಂದು ಹೇಳಿದ್ದರು. ಆಗ "ತಲೆ ತಗ್ಗಿಸಿ "ಕುಳಿತು ಬಿಟ್ಟರು . ಬಂದಿದ್ದ ತಾಲೂಕಿನ ಮುಖ್ಯ ವೈದ್ಯಾಧಿಕಾರಿ , ಮತ್ತು ಇನ್ಸಪೆಕ್ಟರ್ ."ವಾಪಸ್ ಪಡೆದು ಬಿಡಿ ಕೇಸ್ . ಎಲ್ಲಾ ಪ್ರಕ್ರಿಯೆ ಇನ್ನೊಂದು ಗಂಟೆಯಲ್ಲಿ ಆಗಬೇಕು " ಎಂದು , ಒಳಗೆ ನಡೆದಿದ್ದರು . ಒಳಗೆ ಹೋಗುವಾಗ , ಅವರ ದೃಷ್ಟಿ ಶಿವಪ್ಪನ ಮೇಲೆ ಇತ್ತು .    ಆವತ್ತು ಅವರ "ಮನಸಿಗೂ "ಒಂದು ತೃಪ್ತಿ . ಲಂಚ ಎಂಬುದು ದೊಡ್ಡ ಆರೋಪ ಆದರೂ , ಅದನ್ನು ಒಪ್ಪಿ ಹೇಳಿ ಬಿಟ್ಟಿದ್ದ. ಅದು ಯಾಕೆಂದು . ನಿರಪರಾಧಿ ಅಲ್ಲದೇ ಇದ್ದರೂ , ಆತ ಅಪರಾಧಿ ಅಲ್ಲವೆಂದು ಅನಿಸಿದ ದಿನ ಅದು. ಅದೆಷ್ಟು ಕ್ರೂರ ಜಗತ್ತು , ಆತನ ಪ್ರತಿ ಮಾತು , ನೋವು ಎಲ್ಲವೂ ನಿಜ ಎಂದು ಅನಿಸಿದ್ದು ಆವಾಗಲೇ ಅವರಿಗೆ .


Rate this content
Log in

More kannada story from Natesh MG

Similar kannada story from Tragedy