કોણ મહાન (ઝેન કથા)

બે શિષ્યો વચ્ચે બંનેમાંથી કોણ મહાન એ વિષયને લઈને તકરાર ચાલી રહી હતી. 

પહેલો શિષ્ય બોલ્યો, "હું મહાન છું."

આ સાંભળી બીજો બોલ્યો, "રહેવા દે... રહેવા દે... તારા કરતા હું મહાન છું."

આમ કોઈ નમતું લેવા તૈયાર નહોતું પરિણામે બંને વચ્ચેની તકરારે ઝઘડાનું સ્વરૂપ ધારણ કર્યું. આ જોઈ તેમના ગુરુને ખૂબ દુઃખ થયું. બંનેની તકરારનું નિવારણ લાવવા ગુરુએ તેમને કહ્યું, "જે બીજાને મહાન ગણે તે જ સાચા અર્થમાં મહાન છે."

ગુરુની વાત સાંભળી પહેલો શિષ્ય બીજા શિષ્યને બોલ્યો, "તું મહાન છે."

આ સાંભળી બીજો બોલ્યો, "રહેવા દે... રહેવા દે... મારા કરતા તું મહાન છે."

હવે બંનેની તકરારનું સ્વરૂપ બદલાયું!

(સમાપ્ત)