ହୃଦୟ କୁରୁଳେ ତୋ ଦେଖା ପାଇ
ହୃଦୟ କୁରୁଳେ ତୋ ଦେଖା ପାଇ
ପ୍ରିୟ ଭାଇ ମୋର ,କହ ରାଜ୍ୟ କଥା
କେମିତି ଅଛନ୍ତି ଉଆସେ ପିତା ,
ବନବାସେ ମୁହିଁ ଆସିଲା ବେଳକୁ
ଶୋକଭରେ ହାରିଥିଲେ ସେ ଚେତା ।
କେମିତି ଏବେ ତୁ ରାଇଜ ଚଳାଉ,
ରାଜ୍ୟବାସୀଙ୍କର ଖବର କ'ଣ ?
ବନବାସ ଲାଗି ମୋ ସାଥିରେ ସେବେ
ଗୋଡ଼ାଇଥିଲେରେ ବହୁତ ଜଣ ।
ରାଜମହଲର ତଥ୍ୟ କହ ମୋତେ
ଆସିଛନ୍ତି କିବା ସାଥେ ଜନନୀ ,
ସେ ତିନି ମାତାଙ୍କୁ ଦର୍ଶନ କରିଲେ
ଧନ୍ୟ ହେବ ମୋର ନୟନ ବେନି ।
ମୋହ ଠାରୁ ତୁହି ଭିନ୍ନ ନୋହୁଁ ଆରେ
ଶୋକ ତେଜ ମୋର ଭାଇ ଭରତ ,
ପିତୃ ମାତୃ ସତ୍ୟ ପାଳନ କରିବା
ଧର୍ମ ଆମ ପରା ଜାଣେ ଜଗତ ।
ଉପହାର ସୂତ୍ରେ ରାଜ୍ୟ ଦେଇଅଛି
ହେଜକରି ତାହା କରିବୁ କାର୍ଯ୍ୟ ,
ବନବାସ ମୋର ସରିଲେ ଫେରିବି
ସେତେବେଳ ଯାଏ ରଖିବୁ ଧୈର୍ଯ୍ୟ ।
ଶତ୍ରୁଘନ କଥା ଧ୍ୟାନ ରଖିଥିବୁ
ସେ ପରା ଆମର କନିଷ୍ଠ ଭାଇ ,
ଶାନ୍ତ ହୋଇ ଏବେ କହ ତୋ ବାରତା
ହୃଦୟ କୁରୁଳେ ତୋ ଦେଖା ପାଇ ।