ଆମ ପର୍ଯ୍ୟଟକ ଆମର ଅତିଥି

ଆମ ପର୍ଯ୍ୟଟକ ଆମର ଅତିଥି

 

ପର୍ଶୁରାମ ବିଶ୍ୱାଳ

 

ଆମ ପର୍ଯ୍ୟଟକ ଆମର ଅତିଥି ଆମ ପାଇଁ ଭଗବାନ,

ତାଙ୍କ ସେବା ମନେ ରହୁ ସଭିଙ୍କର ସୁରକ୍ଷା ଆତ୍ମସମ୍ମାନ,

ଏ ଭାବନା ଗୋଟି ଭରିଦେ ସବୁଠି

ହେ ପ୍ରଭୁ ଚକାନୟନ !

 

କାହିଁ ପର୍ଯ୍ୟଟନ ସ୍ଥଳୀ ବେଳାଭୂଇଁ ଗୋଟି ଆବର୍ଜନାଭରା,

ଜାଣିଶୁଣି ଆମେ କରୁଚୁ ସେପରି, ନାହିଁ ସେ ସଫାସୁତରା,

କି ଭାବିବେ ସେଇ ବିଦେଶୀ ମଣିଷ

ସେଥିକି ନାହିଁ କା’ ଧ୍ୟାନ ।

 

ଜାଣିକି ନଜାଣି କେ’ ବିଦେଶୀ ଯେବେ ଯାଏ ତୋର ଶ୍ରୀମନ୍ଦିର,

ନିର୍ଯାତନା ତାକୁ ମିଳୁଚି ଦେଖୁଚୁ, ଇଏ କି ତୋର ବିଚାର,

ଛୁଆଁଛୁତ କଥା ନାହିଁ ଯହିଁ ପ୍ରଭୁ

ଏ କି ମଣିଷତା ଧର୍ମ ?

 

ବିଦେଶୀ ବୋଲିକି କେତେ ଠକୁଚନ୍ତି, ବିକି ନିଜ ଚିଜଟିଏ,

ଭାବୁନାହାନ୍ତି ସେ ଦେଶର ଇଜ୍ଜତ ବିକିବାଠୁ ବଳି ଇଏ,

ତା ଘର ଅତିଥି ପକେଟରୁ ଟଙ୍କା

ଚୋରି ନୁହେଁ କି ସମାନ ?

 

ଆମ କଳା ଆମ ସ୍ଥାପତ୍ୟ ସଂସ୍କୃତି ବିଦେଶେ ହେବ ଆଦର,

ଭଲ ଦି’ ପଇସା ରୋଜଗାର ହବ, ଉନ୍ନତି ଦେଶ-ରାଜ୍ୟର,

ଅତିଥି ଆମର ଦେବତୁଲ୍ୟ ପ୍ରଭୁ

ଏକଥା ବୁଝା ମୋ ଧନ ।

 

ଗ୍ରା.-ମିତ୍ରସେନପୁର, ପୋ.ଅ.-ଗମୁଁ

ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪

ଫୋନ୍-୯୮୫୩୭୫୯୭୦୦

*****