ମୁଁ ସେଇ ଉଗ୍ରବାଦୀ

ଶାନ୍ତିର ବାଣୀ ଶୁଣେଇବାକୁ

ନୁହେଁ ମୁଁ ଶାନ୍ତି ଦୂତ

ହୃଦେ ମୋର ଜଳେ ବିଦ୍ରୋହ ଅନଳ

ସହଜେ ହୁଏ ନା ଶାନ୍ତ ॥

ଧ୍ଵଂସ କରିଦେବି ଅନ୍ୟାୟୀ ଅଧର୍ମୀ

ତୋଳିବି ଧର୍ମ ଶଉଧ

ବାଧା ଦେଲେ ଯିଏ ପେଶିବି ପାତଳେ

ମୁଁ ନୁହେଁ କାହା ଦାସ ॥

ପୋଛିଦେବି ସବୁ ଜନନୀ ଆଖିରୁ

ନିଗିଡ଼ା ସେ ଅଶ୍ରୁ ଧାର

ମେଣ୍ଟେଇ ଦେବି ମୁଁ ନାରୀଙ୍କ ମଥାରୁ

ପ୍ରତି କଳଙ୍କର ଗାର ॥

ବହୁତ ହେଲାଣି ନିରୀହ ଉପରେ

ସବଳର ଅତ୍ୟାଚାର

ସ୍ୱାଧୀନତା ଥାଇ ଆଜିଏ ସମାଜେ

କିମ୍ପା ଛିନ୍ନ ଅଧିକାର ॥

ପ୍ରତି ଶିଶୁ ମୁଖେ ଫୁଟାଇବି ମୁଁ

ସଦ୍ୟ ଫୁଲର ହସ

ଫେରେଇ ଦେବି ମୁଁ ଶିଶୁ ଅଧିକାର

ହେବେନି ଶିଶୁ ଶ୍ରମିକ ॥

ବାପ ପୁଅ ଗୁରୁ ଶିଷ୍ୟ ସମ୍ପର୍କ

ହେଲାଣି ତ କଳୁଷିତ

ଶିକ୍ଷା ବ୍ୟବସ୍ଥା ତ ସାଜିଲାଣି ପଙ୍ଗୁ

ନାହିଁ କାହା ହିତାହିତ ॥

ପ୍ରତି ଅନ୍ୟାୟୀର ଖୋଲିଦେବି ମୁଖା

ଯାଆରେ ସବୁ ସୁଧୁରି

ଖଣ୍ଡି ଦେବି ମୁଁ ସବୁ ଅହଂକାର

ମୁଁ ତ ସେ ଉଗ୍ରବାଦୀ ॥