Library
ଚାଷୀ ଆତ୍ମହତ୍ୟା
ଚାଷୀ ଆତ୍ମହତ୍ୟା
ଜାତୀୟ ସ୍ତରରେ କୃଷି ବୃଦ୍ଧି ହାରେ
ଓଡିଶା ସବୁଠୁ ଆଗରେ
କହି ବାହାସ୍ଫୋଟ ମାରଇ ସର୍କାର
ବଡ ବଡ ମଞ୍ଚ ଉପରେ ।
ମରୁଡି ପଡିଛି, ଲେଡା ବି ମାଡିଛି
ଫସଲ ଯାଇଛି ଉଜୁଡି
କପାଳରେ କର ଦେଇ ବସିଅଛି
ଚାଷୀକୂଳ ଦାନ୍ତ କାମୁଡି ।
ଋଣ ପାଇଁ ଆଶା କରି ବସିଥିଲା
ମିଳିଲେ କରିବ ଚାଷ
ଋଣ ଯା’ ମିଳିଲା, ଆଖି ନଦେଖିଲା
ଉଡେଇ ଦେଲା ଫକାସ ।
ଅଧକ ଜମିରେ ହୋଇନାହିଁ ଚାଷ
ପାଣିର ଅଭାବ ପାଇଁ
ଯେଉଁ ଅଧକରେ ହେଇ ଯାଇଥିଲା
ଲେଡା ଗଲେ ତାକୁ ଖାଇ ।
କି ହେବ ଅମଳ, ପରିଶୋଧ ଋଣ
ଭାବି ଭାବି ମଥା ଘୂରେ
ଗୋଡ ଭାଙ୍ଗି ଠିଆ ହେବାକୁ ପଡୁଛି
ସକାଳୁ ନେତା ଦୁଆରେ ।
ମନ୍ତ୍ରୀ ଦେଇଛନ୍ତି ଅଭୟ ବଚନ
ଋଣ ଛାଡଦେବୁ ଭାଇ
ଲେଡା ପୋକ ପାଇଁ ଔଷଧ ସ୍ପ୍ରେୟର
ସବୁ ତ ଦେବୁ ଯୋଗାଇ ।
ବିଗତ ବର୍ଷରୁ ହେଉଅଛି ଦାବି
ମରୁଡି ଘୋଷଣା କର
ନେତାଙ୍କ ଆଖିକୁ ନ ଦିଶେ ସେସବୁ
କହନ୍ତି ରାଜ୍ୟ ସୁନାର ।
ଅମାରରୁ ଧାନ ସରି ତ ଗଲାଣି
ମାଙ୍କଡଚିତ୍ ମାରେ ହାଣ୍ଡି
କେମିତି ଭରିବ ପରିବାର ପେଟ
ଚିନ୍ତାରେ ଶୁଖଇ ଗଣ୍ଡି ।
ସାର ମିଳୁନାହିଁ, ଟଙ୍କା ମିଳୁନାହିଁ
ମିଳୁନି ଟୋପାଏ ପାଣି
ଭୋକ ଉପାସରେ ପେଟ ଛୁଆଟାର
ଅନ୍ତନାଡି ଶୁଖିଲାଣି ।
ଆନ୍ଦୋଳନ ପରେ ଆନ୍ଦୋଳନ ଚାଲେ
ଗାଁ ଗାଁ ସାହି ସାହି
ସରକାରଙ୍କର କୁମ୍ଭକର୍ଣ୍ଣ ନିଦ
ତଥାପି ବି ଭାଙ୍ଗୁନାହିଁ ।
କେତେ ଆଉ ଭୋକ ଉପାସ ଦେଖିବ
ଛାତିକୁ ପଥର କରି
ଟୋପାଏ ବିଷରେ ସବୁ ଦୁଃଖକଷ୍ଟ
ଆଖିରୁ ଯିବ ଉଭେଇ ।
ମିଡିଆ ଧାଇଁଲା, ନେତା ବି ଧାଇଁଲେ
କେତେ ବଡ କଥା ହେଲା
ଆର୍ଥିକ ଦୁର୍ଦ୍ଦଶା ପାଇଁ ଚାଷୀପୁଅ
ପ୍ରାଣଟାକୁ ତ୍ୟାଗିଦେଲା !
ବିରୋଧିବାଲାଏ ଗଳାକୁ ଫଟେଇ
ସର୍କାରଙ୍କୁ ଦୋଷ ଦେଲେ
ଚାଷୀ ଆତ୍ମହତ୍ୟା ପାଇଁ ଦାୟୀ କରି
ଇସ୍ତଫା ଦାବି କରିଲେ ।
ହେଲା ରାଜନୀତି, ସେଠି ଦିନରାତି
ଡେରା ବାନ୍ଧି ବସିଗଲେ
ଗୁଣ୍ଡାଏ ପାଇଁକି ପ୍ରାଣ ଯାଇଥିଲା,
ଖିରି ପୁରୀରେ ଭସେଇଦେଲେ ।
ବିରୋଧିଙ୍କୁ ଡରି ସର୍କାର ବାପୁଡା
ଧାଇଁଲେ ରାଜଧାନୀ ଛାଡି
ମୁହଁ ଅନ୍ଧାରରୁ, ବିରି ଚାଉଳରେ
ଘର ତା'ର ଦେଲେ ଭରି ।
ମିଡିଆ ଆଗରେ ଛାତିକୁ ଫୁଲେଇ
କହିଲେ ବସିକି କଥା
ଏ ଗାଆଁର ଚାଷୀ ମରିବା ପଛରେ
ନଥିଲା ଚାଷର ବ୍ୟଥା ।
ଘରକଳି ସହି ନପାରି ତ୍ୟାଗିଛି
ନିଉଛୁଣା ପ୍ରାଣ ତା'ର
ମାଇପ ପିଲାଙ୍କ ଜଞ୍ଜାଳ ବିଷମ
କି କରିବ ସରକାର !
ଋଣଛାଡ ଆମେ କରିଛୁ ଆଗରୁ
ଦେଇଛୁ ସାହାଯ୍ୟ କେତେ
କ୍ୟାମେରା ଆଗରେ ବିରୋଧିବାଲାଙ୍କ
ମିଛ ହୋ ହଲ୍ଲା ଯେତେ !
ହେବନାହିଁ ତାଙ୍କ ମସୁଧା ପୂରଣ
କରନ୍ତୁ ଫନ୍ଦି ଫିକର
କଥା ମୁଁ ଦେଉଛି, ପୂରା ପାଞ୍ଚ ବର୍ଷ
ଚଲେଇ ନେବି ସର୍କାର ।
-0-
