ବାଜପେୟୀ ତୁମେ କାଳଜୟୀ
ବାଜପେୟୀ ତୁମେ କାଳଜୟୀ
ତୁମେ ଶ୍ରେଷ୍ଠ ହିନ୍ଦୁ ଜନ୍ମ କିନ୍ତୁ ଡିସେମ୍ବର ପଚିଶ- ଯୀଶୁଙ୍କ ପରି
ଅସୀମ ଧୈର୍ଯ୍ୟ- କୃଶ ବିଦ୍ଧ ହୋଇବି ଶତ୍ରୁ ପାଇଁ କ୍ଷମାଟି ଆଚରି ।
କବି ନୁହେଁ ତୁମେ ବହ୍ନି ଶିଖା ଟିଏ- ଏତେ ଧୀର ଜ୍ଵାଳାମୁଖୀ ପୁଣି
ସାମ୍ବାଦିକ ବୃତ୍ତି ତବ ସାଲିସ ବିହୀନ ନିର୍ଭୀକ ସତ୍ୟଟି ବଖାଣି ।
'ବହ୍ମଂ ଜାନାତି ବ୍ରାହ୍ମଣ' ତୁମେ ତାହା ଜୀବନରେ କରିଛ ପ୍ରମାଣ
ପଡୋଶୀ ଶତ୍ରୁ ନୁହେଁ ଭାଇ- ତହିଁକି ବସ ଯାତ୍ରା କଲ ପାକିସ୍ଥାନ।
ଶାନ୍ତ ସରଳ ଚେହେରାରେ ଦୃଢ ମନା ବ୍ୟକ୍ତିତ୍ୱ ନେତୃତ୍ଵର ନମୁନା
ପୋଖରାନ୍ ପରୀକ୍ଷଣ କାରଗିଲ୍ ଜିତାଇଣ ପ୍ରମାଣିଲ ମହାମନା ।
ଦଳର ନେତା ନୁହେଁ ପ୍ରଧାନ ମନ୍ତ୍ରୀ ଦେଶର ନେତା- ତୁମଠି ସମ୍ଭବ
'ଛାଡ ସ୍ୱଧର୍ମ କର ରାଜଧର୍ମ' ଆଉ କିଏ ଅବା ଏପରି କହିବ!!
ସୁବର୍ଣ୍ଣ ଚତୁର୍ଭୁଜ ସାଥେ ନଦୀ ସଂଯୋଗ ମହାର୍ଗ ଯୋଜନା
ଦେଶର ପ୍ରକୃତ ବିକାଶ ପାଇଁ କଲ ଗ୍ରାମ ସଡକ ପରିକଳ୍ପନା ।
ହେ ମହାନାୟକ ଯୋଡି ଶ୍ରେଷ୍ଠ ହିନ୍ଦୁ ସାଥେ ସଚ୍ଚା ମୁସଲମାନ
ବାଜପେୟୀ କଲାମ ଯୁଗଳ ଦେଶ ପାଇଁ ମଣିକାଂଚନ ସମାନ ।
ଜୀବନୀ ତୁମର ଏକ ଖୋଲା ବହି ବହ୍ନି ଶିଖାଟିଏ ଦୁନିଆର
ଭୀଷ୍ମ ପିତାମହ ଏ ଦେଶର- କରି ନାହଁ ତୁମେ ପରିଗ୍ରହ ଦାର ।
ଦେଶର ମହୋତ୍ସବେ ତୁମକୁ ନେବା ପାଇଁ ଯମ ରାଜ ଡରିଗଲେ
ଅଗଷ୍ଟ ପନ୍ଦର ଛାଡି ସେଥିପାଇଁ କିବା ଷୋଳ ତାରିଖ ବାଛିଲେ !
ଅଟଳ ବିହାରୀ- ଜନ୍ମ ସିନା ମଧ୍ୟ ପ୍ରଦେଶରେ ତୁମେ ଭାରତ ଭାରତୀ
ବାଜପେୟୀ- ବାଜପକ୍ଷୀ ପରି ଲକ୍ଷ୍ଯ ସ୍ଥିର ଅତୁଳନୀୟ ଦେଶ ପ୍ରୀତି ।
ମହାତ୍ମା ଜୟ ପ୍ରକାଶଙ୍କ ପରେ ତୁମେ ହିଁ ଅପ୍ରତିଦ୍ଵନ୍ଦୀ ଜନନାୟକ
ଅଜାତ ଶତ୍ରୁ ମୃତ୍ୟୁଂଜୟ- ଦେଶର ପ୍ରଣତି ଘେନ ହେ ମହାନାୟକ।