ଆମ ଗାଁ
ଆମ ଗାଁ
ବଦଳି ଗଲାଣି ଆମ ଗାଆଁ ରୂପ
ଧୋତି ଗାମୁଛାର ଜାଗାରେ କୋଓଟ
କାହିଁ ବିଲ ବାଡି ନାଳ ନଈ,
ଏବେ ଲାଗେ ସେ ସହର ଭଳି !
ନାହିଁ ଗାଆଁ ତୁଠ, ଗାଈଚରା ଗୋଠ
ସବୁଆଡେ ଶୁଭେ ନୋଓଟ, ଭୋଓଟ
ଦେଖ କୋଠା ଖାଲି ଧାଡି ଧାଡି,
ଆଜି ଲାଗୁଛି ସହର ଭଳି !
ସଂକୀର୍ତ୍ତନିଆଙ୍କ ଖଞ୍ଜଣି ଶୁଭୁନି
ପାଲା ଦାସକାଠି ଆଉ ବି ବାଜୁନି
ରେଡିଓ ନଲାଗି ଲାଗୁଅଛି ଟିଭି,
ଆଜି ଲାଗୁଛି ସହର ଭଳି !
ବାପାଙ୍କର ହିରୋ, ଦାଦାଙ୍କର ରାଲେ
ଡେରା ହେଇ ହେଇ ଅଚଳ ହୋଇଲେ
କାନ ନଶୁଣିଲା ଆଉ ଘଣ୍ଟି,
ଆଜି ଲାଗୁଛି ସହର ଭଳି !
କାହିଁ ସେ ବୁଢୀମା’, ନାତି କରି ଜମା
ପାକୁଆ ପାଟିରେ ବର୍ଣ୍ଣିବ ମହିମା
ଖୋଲି ତା’ କାହାଣୀ ପେଡି,
ଆଜି ଲାଗୁଛି ସହର ଭଳି !
ନାହିଁ ଦାସବୁଢା, ନାହିଁ ବି ଚକରା
ଲଗେଇ ଦେବାକୁ କଳିର ପସରା
ଏବେ ତ ସଭିଙ୍କ ହାତରେ ଛୁରି,
କାହିଁ ହେଲା ଏ ସହର ଭଳି !
ଦିଶନ୍ତିନି କାକା, ଦିଶୁନି ବି ଖୁଡି
ଦୂର ଦେଶେ ସବୁ ଯାଇଛନ୍ତି ଉଡି
ଘର ଜଗିଛନ୍ତି ବୁଢା ବୁଢୀ,
କାହିଁ ହେଲା ଏ ସହର ଭଳି !
ରଜ ଦୋଳି ବନ୍ଧା ଆଜି ବି ହେଉଛି
ପୂର୍ଣ୍ଣମୀର ଜହ୍ନ ଆକାଶେ ଉଉଁଛି
କିନ୍ତୁ ଖେଳିବ କୋଉ ଭଉଣୀ ?
ସଭିଙ୍କୁ ନେଇଛି ସହର ଟାଣି !
ଗାଡି ମଟରର ପେଁ ପାଁ ଶବ୍ଦ
ମନେ ଭରିଦିଏ ପ୍ରବଳ ବିଷାଦ
ଆମ ଆଖିରୁ ନିଗିଡେ ପାଣି
ସେହି ଗାଆଁକୁ ଦିଅ ମୋ ଆଣି !