ବତୁରାଇଦିଏ ବରଷାର ଛିଟା

ବତୁରାଇ ଦିଏ ବରଷାର ଛିଟା

 

ଆଭାକାନ୍ତ ମହାନ୍ତି

 

ବତୁରାଇ ଦିଏ ବରଷାର ଛିଟା

       ଶୁକୁଟାଇ ଦିଏ ଶୀତ

ଫଗୁଣ ପୁଲକେ ମନଟା ଫୁଲଇ

       ତୁମେ ନାହଁ ମନ ମିତ । ୦ ।

 

ଚଇତି ତାତିରେ ଫୁଙ୍ଗୁଳା ଛାତିରେ

       ଜୋଛନା ରାତିରେ ବସି

ସପନ କୁହୁକ ମନରେ ମୋହକ

       ମିତ ସାଥେ ଯାଏ ମିଶି

ହେଲେ କି ହୋଇବ, ଆଉ କି ଗାଇବ

       ପିକ ସେ ପୁଣୁଣା ଗୀତ ? । ୧ ।

 

ଅଶିଣ ସକାଳେ ହୃଦୟ ହକାଳେ

       ଛିଟା ଛିଟା ସ୍ମୃତି ଶାଢ଼ି

କାର୍ତ୍ତିକ କୁହୁକ ଡହଳ ଡାହୁକ

       ଫୁର୍ କିନା ଯାଏ ଉଡ଼ି

ସପନ କମ୍ପନ ଗୋପନେ ଉଜୁଡ଼େ

       ପୂବେଇ ବି ପରାଜିତ । ୨ ।

 

ନୂଆସାହି, ବିଡ଼ାନାସୀ

କଟକ-୭୫୩୦୧୪

ଫୋନ୍-୯୦୪୦୦୦୩୧୦୧

*****