କ୍ଷେତ କଥା
କ୍ଷେତ କଥା
ହୃଦାନନ୍ଦ ପାଣିଗ୍ରାହୀ
ଦଗାଦିଆ ମୌସୁମୀକୁ
କି ଭରସା ?
ମେଘ ଟୋପେ ଝରିବାର ନାହିଁ
ଜମି ଫାଟି ଆଁ କଲାଣି
ମନ କଷ୍ଟରେ ହିଡ଼େହିଡ଼େ ବୁଲୁଛି
ଚାଷୀର କଙ୍କାଳ।
ଆଜିକାଲି ଭାରି ମହଙ୍ଗା ଏ ଚାଷ
ତହିଁକି ପହିଲେ ଗଜାମରୁଡ଼ି
ବିହନର
ଯେଉଁ ଜମିକି ମାଡନ୍ତା ପାଣି
ଖକଡ଼ା ଘାସ , କଙ୍କଡ଼ା ଗାତରେ
ପୋତି ପଡିଲାଣି ସେ ନାଳ ,
କୋଡ଼ି , କୋଦାଳରେ ଚଞ୍ଛା ହେଇ
ବିଲ ହୋଇଗଲା ଗଲା ସନ
ଏବକୁ ପାଣି ଠୋପେ ଆସିବାର ନାହିଁ
ସବା ଢାଳେ ଲୋକସାନରେ ଗଲା
ସାର , ମଜୁରି , ଶ୍ରମ ।
ସବୁ ଖରା ଏ ପିଠିରେ
ସବୁ ନିର୍ଦ୍ଦୟତା
ଏ ନୁଖୁରା ମୁଣ୍ଡରେ
ହାଟବାଟ ସବୁଠି ଚର୍ଚ୍ଚା ପାଗଯୋଗର
କେହି ପାଣି କଥା କହିବାବେଳେ
କିଏ ଗୋଳକଲାଣି ରଣ ଛାଡ଼
କାଳ ଅକାଳରେ ଫେଲ୍ ମାରୁଛି
ସବୁ ଯୋଜନା
ବ୍ୟବସ୍ଥାର ମଗଜକୁ ଏଯାଏଁ ପଶିଲା ନାହିଁ
ସମସ୍ୟାର ମୂଳ ଉତ୍ସ ।
କେଉଁ ବାଟରେ ବଞ୍ଚେଇ ହଉନି
ଭରସା ଟିକକ
ଟାଣ୍ ଖରାରେ
ପୋଡ଼ିଯାଉଛି ମୁହଁ,
ଜଳିଯାଉଛି ହୃଦୟ ।