Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

Arun Kumar Mitra

Others

2.5  

Arun Kumar Mitra

Others

ମୋହର ସ୍ଵର୍ଗପୁରୀ

ମୋହର ସ୍ଵର୍ଗପୁରୀ

2 mins
19.9K


ମୋହର ସ୍ଵର୍ଗପୁରୀ

 

ଦେଖିଛ କେହି କି ଆମ ଗାଁ’ ଟିକୁ

ଛୋଟ ନଦୀଟିର ତୀରେ,

ଚାରିପଟେ ଗଛ, ଘନ ଘୋର ଘଞ୍ଚ

ଶାଗୁଆ ବୁଦାର ବାଡ଼େ   ?

ସେ ମୋର ଜନନୀ, ଜନ୍ମଭୂମି ଓ ମୋହର ସ୍ଵର୍ଗପୁରୀ,

ସେଇଠି ମୋହର ମନପ୍ରାଣ ସବୁ ରହିଥାଏ ସଦା ପଡ଼ି  ।

ଦୁଇ ଆଡ଼େ ଦୁଇ ଧୂମ୍ର ପାହାଡ଼

ଗାଁ’ ଟି ତାହାରି କୋଳେ,

ଛୋଟ ବଡ଼ ସବୁ ଘରଗୁଡ଼ି ଯେତେ

ଶିଖରର ଛାୟାତଳେ,

ମଧ୍ୟସ୍ଥଳେ ଗୋଟିଏ ପୋଖରୀ

ପଦ୍ମ ଫୁଲରେ ଭରା,

ବତକମାନେ ତାରି ଉପରେ

ଖେଳନ୍ତି ଦିନ ସାରା ।

ସେ ମୋର ଜନନୀ ଜନ୍ମଭୂମି ଓ ଏକ ମନୋହର ପୁରୀ

ସେଇ ମନୋରମ ଦୃଶ୍ୟସବୁ ମୁଁ, ଦେଖଇ ନୟନ ଭରି  ।

ରାତି ଥାଉ ଥାଉ କୁକୁଟର ଡାକ

ନିଦ୍ରାଟି ଦିଏ ଭାଙ୍ଗି,

ପକ୍ଷୀକୁଳର କିଚିରି ମିଚିରି

କିଏ ନ ଯାଆନ୍ତି ଜାଗି  ?

ଦ୍ଵିପ୍ରହର ବେଳେ ପଖାଳ ଖାଇକି

ଗଛର ମୂଳରେ ନିଦ,

ବସନ୍ତର ଶୁଭାଗମନରେ କୋଇଲି ଶୁଣାଏ ଗୀତ  ।

ସେ ମୋର ଜନନୀ ଜନ୍ମଭୂମି ଓ ମୋର ଆନନ୍ଦପୁରୀ

ସେଇ ଗାଁ’ ଟି ମୋର ହୃଦୟଟିକୁ ସଦା କରଇ ଚୋରି  ।

ଗାଈ ବାଛୁରୀ ଉଡ଼େଇ ଧୂଳି

ଫେରନ୍ତି ସେଇ ବେଳ,

ପିଲାମାନେ ସବୁ ମିଶି ଖେଳନ୍ତି

ହରେକ ରକମ ଖେଳ  ।

ଅସ୍ତାଚଳରେ ବିଭାବସୁ ଯେବେ

ଭାସନ୍ତି ପଶ୍ଚିମ ଅମ୍ବରେ,

ଉଦ୍ଭାସିତ ଆଲୋକଛଟା ମାୟାବୀ ରୂପଟି ଧରେ  ।

ସେ ମୋର ଜନନୀ ଜନ୍ମଭୂମି ଓ ମୋହର ସ୍ଵପ୍ନପୁରୀ,

ସେଇ ଗୋଧୂଳି ଲଗନ ଦେଖି ମୋ ମନ ଯାଏ ଭରି  ।

ସନ୍ଧ୍ୟାକାଳେ ଶଙ୍ଖଧ୍ଵନି

ପ୍ରଦୀପ ଉଠଇ ଜଳି,

ହୁକ୍କା ହୁଆ ବିଲୁଆ ଡାକେ

କୁନି ପିଲା ଯାଏ ଡରି  ।

ନୀରବ ନିଶିର ଜୁଳୁଜୁଳା ଦୀପ

ଲଣ୍ଠଣ ମିଞ୍ଜି ମିଞ୍ଜି,

ଜୋଛନା ରାତିର ଚନ୍ଦ୍ରର ହସ

କେଉଁଠି କେ ପାଏ ଖୋଜି  ।

ସେ ମୋର ଜନନୀ ଜନ୍ମଭୂମି ଓ ମୋହର ଇନ୍ଦ୍ରପୁରୀ

ସେଠି ଅନ୍ତହୀନ ଶାନ୍ତି ସୁଖେ ଦିନ ବିତେ ଆମରି  ।

ମିଠା ଜଳ ମୁକ୍ତବାୟୁ

ଉର୍ବର ତାର ମାଟି,

ଅତି ସରଳ ଗାଁ’ ଲୋକ ମୋର

ସୁନାରୁ ଅଧିକ ଖାଣ୍ଟି  ।

ଭାଇ ଭାଇର ଏତେ ସ୍ନେହ

ମାୟା ମମତାର ବନ୍ଧନ,

କେଉଁଠି ଅଛି କିଏ କରଇ

କାହାରି ପାଇଁ କ୍ରନ୍ଦନ  ।

ସେ ମୋର ଜନନୀ ଜନ୍ମଭୂମି ଓ ମୋହର ମମତାପୁରୀ

ମଣିଷ ନ ହେଉ ପକ୍ଷୀ ହୋଇ ଆସିବି ମୁଁ ପୁଣି ଫେରି  ।


Rate this content
Log in