ଜଣାଣ
ଜଣାଣ
ତା’ ନାମ ମଧୁର ଅତି ଅମୃତ ସମାନ
ତା’ ନାମେ ସରଗ ସୁଖ ପାତକ ନାଶନ |୧ |
ଜଗତର ନାଥ ସିଏ ନୀଳାଚଳ ଧାମେ
ଚକାଆଖି ଅଧାଗଢା ସଙ୍ଘାରେ ଅଧମେ |୨|
ପତିତପାବନ ସେହି ଅଗତିର ଗତି
ବଡ ଦାଣ୍ଡ ଧୂଳି ବିନା କାହିଁରେ ମୁକତି ? |୩|
ସଖାର ସଙ୍ଖୋଳି ସିଏ ଦୁଃଖୀ ସହୋଦର
ଭକତ ବାନ୍ଧବ ବୋଲି ଜଗତେ ପ୍ରଚାର |୪|
ଦାସିଆ-ମହାନ୍ତି –ଦାସ –ସାଲବେଗ –ଶ୍ରୀୟା
ଭକତ ବତ୍ସଳ ପ୍ରଭୁ ଚଉବାହା ସାହା |୫|
ମୁଁହି ଛାର ଅକିଞ୍ଚନ ନାରାଧମ ପାପୀ
ଉଦ୍ଧାର କରହେ ନାଥ କପଟୀ –ବିଟପୀ |୬|
କଳୁଷ ପଙ୍କିଳ ମୁଁହି ଅଧମ ପାମର
ତ୍ରାହି କର ଭାବଗ୍ରାହୀ କରୁଣାସାଗର |7|
ବିବେକ-ବର୍ତ୍ତିକା ହୋଇ ଜୀବନ-ପ୍ରଦୀପ
ଆଲୋକିତ କର ପଥ ପଶ୍ଚିମ ସମୀପ |୮|
କ୍ଷମା ଦୟା ତ୍ୟାଗର ଉଦ୍ରେକ କରାଅ
ଭବ ସାଗରୁ ତାରଣ ଉପାୟ ଦେଖାଅ |୯|
ତନ ମନ ଚଇତନ ରହୁ ତବ ପାଦେ
ପ୍ରଭାତେ ନିଶିଥେ ସଦା ତୁମ ନାମ ହୃଦେ |10 |