ସଙ୍ଗୀତ ଆସର
ସଙ୍ଗୀତ ଆସର
ଚଳିତ ମାସର ସଙ୍ଗୀତ ଆସର
ଏଇଠି କରିବା ବସି
ବୋଲି ବେଙ୍ଗଭାଇ ସମସ୍ତଙ୍କୁ ଯାଇ
କହିଲା ବଣରେ ପଶି ।
ନିମନ୍ତ୍ରଣ ପାଇ ଯେଝା ଘରେ ଥାଇ
ସଭିଏଁ ଅଭ୍ୟାସ କଲେ
ଘୋଷି ବାରମ୍ବାର ଦେଖି ଦିନ ବାର
ପାହାଡ଼ ତଳକୁ ଗଲେ ।
କେତେ ପଶୁପକ୍ଷୀ ହୋଇ ଡକାଡକି
ଶୀତଳ ଝରଣା କୂଳେ
ହାତ ମୁହଁ ଧୋଇ ଛଡାଛଡି ହୋଇ
ବସିଗଲେ ଗଛ ମୂଳେ ।
ଗଉରା ବାନର ସଙ୍ଗୀତ ଗାନର
ନିୟମ ଯେତେକ କହି
ବିଚାରକ ଭାବେ ଉଚ୍ଚା ଏକ ଠାବେ
ବସିଲା ଅନାଇ ରହି ।
ପାଳି ପାଳି କରି ସୁର ଲୟ ଧରି
ଗାଇଲେ ବିହଙ୍ଗ ଦଳ
ପତଙ୍ଗ ବି ଆସି ସରୁ କଣ୍ଠେ ଭାଷି
ଦେଖାଇଲେ ନିଜ ବଳ ।
କାଳିଆ ଭ୍ରମର ନାଆଁର କ୍ରମର
ଡାକରା ଶୁଣୁ ନଶୁଣୁ
ଝିଙ୍କାରୀକୁ ଠେଲି ଦୁଇଡେଣା ମେଲି
ଆରମ୍ଭିଲା ଗୁଣୁଗୁଣୁ ।
ଗୀତର ମୁଖୁଡା ଗାଇଲା କୁକୁଡ଼ା
ବେକ ଯାଉଥିଲା ଫୁଲି
ଅଧା ଗାଉ ଗାଉ ପାରିଲାନି ଆଉ
ଅନ୍ତରା ଗଲା କି ଭୁଲି ।
ବୁଲ୍.ବୁଲ୍ ଆସେ ସଭାମଞ୍ଚ ପାଶେ
ଲମ୍ବାଇ ଗୀତର ଚିଠା
ଗାଇଦେଲା ସୁରେ ସଭିଏଁ ସେ ପୁରେ
କହିଲେ ଲାଗିଲା ମିଠା ।
କୋଇଲିର ସରୁ ରଙ୍ଗିଲା ଅଧରୁ
କୁହୁକୁହୁ ତାନେ ଝୁମି
ହେଲେ ବି ସଂକୁଳ ଗୁଣ୍ଡୁଚି ନକୁଳ
ନାଚି କମ୍ପାଇଲେ ଭୂମି ।
କିନ୍ତୁ ଏକ କାଉ ଛନ୍ଦହୀନ ଆଉ
ବେସୁରା ଗୀତରୁ ଗୋଟେ
ଭାବପୂର୍ଣ୍ଣ କହି ଗାଏ ରହି ରହି
ବୁଝି ହେଲାନାହିଁ ମୋଟେ ।
ସଭାକୁ ସମ୍ଭାଳି ସ୍ବବିଚାରେ ଭାଳି
ବାନର ନଚାହିଁ ଆନେ
ଫଳାଫଳ ଯାଇ କହିଲା ବୁଝାଇ
ଆୟୋଜକ ଭାଲୁ କାନେ ।
ମାନପତ୍ର ଚାହିଁ ଲାଜ ଟିକେ ନାହିଁ
କାଉ କଲା ମନମାନୀ
କୋଇଲିର ପରି ମନଦୁଃଖ କରି
କାନ୍ଦେ ବୁଲ୍.ବୁଲ୍ ରାଣୀ ।