କୁଡ଼ିଆ ଘର
କୁଡ଼ିଆ ଘର
ଗଢ଼ିଛି ଗୋଟିଏ କୁଡ଼ିଆ ଘର
ମାଟି କାନ୍ଥ ତାର ଲାଗେ ସୁନ୍ଦର
ଗୋବର ପାଣିରେ ଲିପିଦେଲେ ଥରେ
ବାସି ମହକଇ ସାରା ସଂସାର ।
କୁଡ଼ିଆ ଘରରେ ଚାଳ ଛପର
ମଥାନଟି ତାର ଭାରି ସୁନ୍ଦର
ଶୀତ ଦିନେ ସେଠି ଗରମ ଲାଗଇ
ଗ୍ରୀଷିମେ ଶୀତଳ ଛୁଆଁ ତାହାର ।
ଲଙ୍ଗଳ ପାଇଁକି ରହିଛି ଓଳି
ରଜ ଆସିଲେ ଲାଗୁଛି ଦୋଳି
ଦାଣ୍ଡ ବାଡ଼ିରେ କେତେ ଗଛ ମୋର
ଆମ୍ବ ପଣସ ସାଥେ ପିଜୁଳି ।
ଫୁଲ ଫଳରେ ଶୋଭା ଦିଶୁଛି
ଦାଣ୍ଡରେ ମୋର ଚଉଁରା ଅଛି
ସକାଳ ହେଲେ ପୂଜା ହୁଏ ସେଠି
ସନ୍ଧ୍ୟା ହୋଇଲେ ଦୀପ ଜଳୁଛି ।
ରୋଷେଇ ପାଇଁକି ରହିଛି ଘର
ତିନି ଝିଙ୍କା ଵାଲା ଚୁଲି ମୋହର
ମାଟି ହାଣ୍ଡିରେ ଯେବେ ରୋଷେଇ ହୁଏ
ବାସି ମହାକଇ ଘର ଦୁଆର ।
ଘର ମଝିରେ ଅଛି ଭାଆର
ଜଳ ନିଷ୍କାସନ କାର୍ଯ୍ୟ ତାହାର
ବରଷା ହୋଇଲେ କାଗଜର ଡଙ୍ଗା
ଭସାଉଛି ସେଠି ହାପି ଆମର ।
ପରିବା ଲାଗିଛି ବାଡ଼ିରେ ମୋର
କଲରା କାଙ୍କଡ଼ ପୋଇ ପୋଟଳ
ତଟକା ପରିବା ତୋଳି ଆଣି ମାଆ
ରାନ୍ଧି ବାଡ଼ି ଦିଏ ସ୍ୱାଦ ଆହାର ।
ଛନ୍ଦ କପଟ ନାହିଁ ସେ ଘରେ
ବନ୍ଧା ସେ ହୋଇଛି ସ୍ନେହ ପ୍ରେମରେ
ଲୋଡ଼ା ନାହିଁ ମୋତେ ବଡ଼ ବଡ଼ କୋଠା
ଗର୍ବରେ ରହିଛି କୁଡ଼ିଆ ଘରେ ।