" ଆସିଲା ବରଷା କାଳ "

  " ଆସିଲା ବରଷା କାଳ " 

-------------------------------

ଆସିଲା ବରଷା କାଳ 

ଶୁଣି ଘଡଘଡି ତାଳ 

ସୂରୁଯ ଦେବତା ଲୁଚିଲେଣି କାହିଁ 

ଦେଖି ମେଘ ମାଳ ମାଳ । 

 

ଟପ ଟପ ପଡ଼େ  ପାଣି 

ଆକାଶେ ବିଜୁଳି ଠାଣି 

ନାଚଇ ମୟୂର ପୂଚ୍ଛକୁ ମେଲାଇ  

ଦେଖିକି ବରଷା ରାଣୀ । 

 

ହସି ଉଠେ ବନ ଲତା 

ମୁଣ୍ଡରେ ପକ୍ଷୀଆ ଛତା 

ଚାଷୀ ଭାଇ ଚାଷ କରିବ କ୍ଷେତରେ 

ଚାଷେ ଖେଳାଉଛି ମଥା । 

 

କିଆଁ କଇଁ ଫୁଲ ଫୁଟେ 

ସଙ୍ଗରେ ସୁବାଷ ଛୁଟେ 

ବେଙ୍ଗୁଲି ରାଣୀ ଯେ କେଁ କଟ କଟ 

ଗାଡ଼ିଆ ପୋଖରୀ ତୁଠେ । 

 

ପାଣି ସୁଅ ଓଳି ତଳେ 

କାଗଜର ଡଙ୍ଗା ଚଳେ 

ନାଲି ଟୁକୁ ଟୁକୁ ସାଧବ ବୋହୂଟି 

ଦାଉ ଦାଉ ବେଶେ ଜଳେ । 

 

ଜେଜେ କହେ ରଡି ଛାଡ଼ି 

ଧରି ଶାବଳ ଓ ବାଡ଼ି 

ବରଷା ଆସିଛି ଉଚ୍ଛୁର ନ କରି 

ଗଛ ଲଗା ଧାଡ଼ି ଧାଡ଼ି । 

----ଅମୂଲ୍ୟ କୁମାର ପଣ୍ଡା ----

--ଅରଙ୍ଗାବାଦ୍ , ବରୀ , ଯାଜପୁର --