ତା'ପରେ
ତା'ପରେ
----------
ଉଜୁଡ଼ି ଗଲା ଗୋଟେ ଛବିଳ ସମ୍ପର୍କ କେଇ ମୁହୂର୍ତ୍ତରେ
ହଜିଗଲା ଘର ବସାଇବାର ସ୍ବପ୍ନ
କିଏ ଜାଣିଥିଲା କେବଳ ଜଣଙ୍କ ଅନୁପସ୍ଥିତିରେ ସୃଷ୍ଟି ହେବ
ଏତେ ବଡ଼ ଶୂନ୍ୟସ୍ଥାନ
ବେଫିକର ଜୀବନରେ ଲାଗିଯିବ ଲଗାମ
ଅତୀତକୁ ଦରାଣ୍ଡୁଥିବ ଗୋଟେ ଉଚ୍ଛଳ ହୃଦୟ ।
ଶେଷରୁ ଆରମ୍ଭ ହେଉଥିବା ଜୀବନକୁ
ସାମ୍ନା କରିପାରୁନଥିବା ମନ
ବେଶ୍ ଜୀଉଁଥିବ ଜୀବନ
ବେସୁରା ହେଲେ ବି ବାଜୁଥିବ ବଂଶୀ
କଦ୍ବା କେମିତି ବିସ୍ମୟରେ ହେଉ ପଛେ
ଭେଟୁଥିବ ଲୁହର ଅଷ୍ଟମ ରଙ୍ଗ ।
ଅପେକ୍ଷା ନଥିଲା କେଉଁ ଆଗନ୍ତୁକ ପାଇଁ
ତଥାପି ଦ୍ବାରଦେଶେ ଲିପିବଦ୍ଧ ଥିଲା
ସ୍ବାଗତର ବାର୍ତ୍ତାଟିଏ,
କେହି ଆସିବାର ନଥିଲେ ବି
ନିରିହ ଦୁଇଟି ଆଖି
ଦ୍ବାର ଦେଶୁ ଅନିଷା କରୁଥିଲା
ଆଖି ପାଉଥିବା ରାସ୍ତାର ଶେଷସୀମା ଯାଏ ।
ଉପେକ୍ଷିତ ଜୀବନଟିଏ ଜୀଉଁ ଜୀଉଁ
କଦ୍ବା କେମିତି ଶୁଭିଯାଉଛି ପ୍ରିୟ ମଣିଷର ଡାକ
ଶୁଷ୍କ ପତ୍ରର ମର୍ମର ଭିତରୁ,
ଛବିଳ ସମ୍ପର୍କ ଉଜୁଡିବା ପରେବି
ଏମିତି ମୁହୂର୍ତ୍ତ ଜୀବନକୁ ବାରମ୍ବାର ଫେରେ ଓ
ମନକୁ ଫେରାଇ ନିଏ କାହିଁକେତେ ପଛକୁ ।
.....
'ନିଶିପ୍ରଦୀପ', କଏଳପାଳ, ବାତୋ, କେନ୍ଦୁଝର
Mob :9438080583
Email :litp.ranjan@gmail.com