ଏ କଥା ଶିଖାଏ ପରା
ଏ କଥା ଶିଖାଏ ପରା
ଶ୍ରୀ ନୀଳମଣି ଚାନ୍ଦ
ପ୍ରଭାତରେ ଫୁଟେ ପଦୁଅଁ ଫୁଲରେ
ସଞ୍ଜ ହେଲେ ଫୁଟେ କଇଁ,
ସୂର୍ଯ୍ୟମୁଖୀ ଫୁଟେ ସୁରୁଯକୁ ଚାହିଁ
ଆଉ ଦିଏ ମଥା ନଇଁ l
ମଲ୍ଲିଟି ଫୁଟଇ ଆସିଲେ ଚଇତ
କଲମ୍ବ ବରଷା ଦିନେ
ପଠାରେ ଫୁଟଇ ଶରତରେ ଯିଏ
କାଶତଣ୍ଡୀ ବୋଲି ଚିହ୍ନେ l
କାକରରେ ଭିଜି ଶୀତରେ ଫୁଟଇ
ଗୋଲାପ ତ କଣ୍ଟା ଡାଳେ
ବଣମଲ୍ଲୀ ଫୁଟେ ବାସ ଚହଟେଇ
କେଉଁ ଦୂର ବଣ ମାଳେ l
ଅପରାଜିତା ତ ଫୁଟଇ ସିନାରେ
ଶରତ ଆସିବା ଜାଣି
କାହାକୁ ସକାଳେ କାହାକୁ ସଞ୍ଜରେ
ଫୁଟାଏ ପ୍ରକୃତି ରାଣୀ l
ଇନ୍ଦ୍ରଧନୁ ରଙ୍ଗ ଫୁଲରେ ରହିଛି
ଭରିଛି ତା’ ଠାରେ ବାସ !
ଫୁଲର ଭିତରେ କାଲିର ଫଳଟି
ରହିଛି ସିନାରେ ଲୁଚି
ଆସୁ ମହୁମାଛି, ପରଜାପତିରେ
ଯାଏନା ଜମା ସେ ଘୁଞ୍ଚି l
ବୃନ୍ତ, ରେଣୁ ଆଉ କେଶର ପାଖୁଡା
ଫୁଲର ତ ଅବୟବ
କେଉଁ ଫୁଲ କାହା ଜାତୀୟ ଫୁଲରେ
ବୁବୁନ୍ ତ କହିଦେବ l
ଜୀବନ କାଳ ତା’ ହୋଇପାରେ ସ୍ୱଳ୍ପ
ହସି ହସାଏ ସେ ଧରା
ସୁଚାରୁ ଭାବରେ କରିଯାଅ କାମ
ଏ କଥା ଶିଖାଏ ପରା l