ତୁମ କରୁଣାରୁ
ତୁମ କରୁଣାରୁ
ତୁମ କରୁଣାରୁ ପ୍ରତି ପ୍ରଭାତରେ
ମୋ ବେନି ନୟନ ଖୋଲେ ।
ସେ ନୟନ ଶୋଇଯିବ ଚିରଦିନ
କରୁଣାର ଊଣା ହେଲେ ॥ ୦॥
ତୁମ ଇଙ୍ଗିତରେ ସକାଳ ସୂରୁଜ
ଢାଳେ ସୁନେଲି କିରଣ ।
ଗାଆନ୍ତି ବିହଙ୍ଗ ଫୁଟେ ନାନା ଫୁଲ
ବହେ ମନ୍ଦ ସମୀରଣ ।
ତୁମ ସଂରଚନା ତୁମ ସଂଯୋଜନା
ପାଇବି କେଉଁଠି ଗଲେ ।
ତୁମ କରୁଣାରୁ ପ୍ରତି ପ୍ରଭାତରେ
ମୋ ବେନି ନୟନ ଖୋଲେ.........॥ ୧ ॥
ଜଡ ବା ଚେତନ ସବୁଥିରେ ଗୁଣ
ଦେଇଅଛ ତୁମେ ଖଞ୍ଜି ।
କେ ପରାଙ୍ଗପ୍ରିୟ କେ ବା ସ୍ୱୟଂକ୍ରିୟ
ଗୁଣୀ ଜାଣିଥାଏ ଖୋଜି ।
ତୁମ ଯାଦୁକରୀ ପାରେନା କେ ଜାଣି
ଯିଏ ଯେତେ ଚେଷ୍ଟା କଲେ ।
ତୁମ କରୁଣାରୁ ପ୍ରତି ପ୍ରଭାତରେ
ମୋ ବେନି ନୟନ ଖୋଲେ.........॥୨ ॥