ସମର୍ପଣ

ରୋମାଣ୍ଟିକ କବି ମାୟାଧର ମାନସିଂହ

ଅହମିକା-ଜାଲୁ ମୁକ୍ତି ଲଭିବା ପାଇଁ,

ଅଜାଡ଼ି ନିଜରେ କାହା ପଦ ତଳେ

ଦେବି, ମୋ ଚିତ୍ତ ବାଇ ।

ଜଗଜ୍ଜନନୀ ଚରଣରେ ତେଣୁ

କରଇ ନମସ୍କାର ,

ଦେଇ ଉପହାର ଜଞ୍ଜାଳ ଜାଳ,

ରୁଗ୍ଣ ଅହଙ୍କାର ।

ଅଛି ଆଉ କିବା ଚରଣେ ବାଢିବା

ପାଇଁ ପୂଜା-ଅରପଣେ ?

ଅଞ୍ଜଳି ଭରି ଖାଲି ଅଛି ତୋଳି

ଫୁଲ ଅହମିକା-ବନେ ।

ତୋଷି ଆପଣାର ଶତ ତୃଷ୍ଣାର

ପିପାସୀ ବହ୍ନି ଶିଖା,

କରିଛି ନିଜରେ ଅଜ୍ଞତା ଭରେ

ମର୍ମ-ଦହନ ଚିତା ।

ଦଗ୍ଧ, ମଳିନ ଏ ହୃଦୟ ,ମନ

ଢାଳିଦେଲେ ପଦତଳେ,

ନବ ଜୀବନର କଅଁଳ ପତର

ଜାଗିବ ବା ପରଶରେ ।

ସବୁ ନିଃଶେଷ, ଅଛି ଖାଲି ଲେଶ

ଦିବ୍ୟ-ଜୀବନ-କଣା,

ସେହି ଆଜି ଖୋଜେ ଜନନୀରେ ତା' ର

ହୋଇ ବହୁ ବାଟ ବଣା ।

ସମାପ୍ତ