ସ୍ମୃତି ଏକ ପ୍ରେମର

ସମୟର କେଉଁ ଅଜଣା ମୋଡରେ

ତୁମ ସହ ଦେଖା ହୋଇଗଲା ।

ପଲକ ଉଠାଇ ଦେଖୁଥିଲ ତୁମେ

ମୋର ଦୁଇ ଆଖି ଚାହିଁଥିଲା ॥

କିଛି କ୍ଷଣ ତୁମେ ନିରବ ରହିଲ

ମୁଁ ବି ନିରବ ରହିଥିଲି ।

ନଜର ଫେରାଇ ଯାଉଥିଲ ଚାଲି

ହଠାତ୍ ତୁମକୁ ଡାକିଦେଲି ॥

ଚମକି ମୋ ଆଡେ ଅନେଇଲ

ହେଲେ ପଦେ ବି ତ କଥା ହେଲନାହିଁ ।

ନିରବରେ ମୁଁ ଠିଆହୋଇ ଖାଲି

ତୁମ ଆଡେ ରହିଥିଲି ଚାହିଁ ॥

ଅତୀତର ସେହି ନିବିଡ ସମ୍ପର୍କ

ଏତେ ଶୀଘ୍ର ଭୁଲିଯିବ ବୋଲି

ଭାବି ମୁଁ ପାରୁନି ବିଶ୍ବାସ ହେଉନି

ଏପରି ବି ହୁଏ ଆଜିକାଲି ॥

ଯେତେବେଳେ ଯାହା କହିଛ କରିଛି

କେବେ ବି ତ କରିନାହିଁ ମନା ।

କେଉଁଠାରେ ମୋର ରହିଗଲା ଦୋଷ

କେଉଁ କାମେ କରିଦେଲି ଊଣା ॥

ଏ ମୋର ପ୍ରଥମ ପ୍ରେମ ମୁଁ ତୁମକୁ

ପାଇଥିଲି ଭଲ ଏ ଜୀବନେ ।

ହେଲେ ଆଜି ଏକା ହୋଇ ମୁଁ ଯାଇଛି

ନାହିଁ ସେ ସରାଗ ଆଉ ମନେ ॥

ପଲକ ଫେରାଇ ଯାଉଥିଲ ଚାଲି

ଡାକିଦେଇ ମୁଁ ଭୁଲ୍ କଲି ।

ଏପରି ଭୁଲ୍ ହେବନାହିଁ ଆଉ

ଆଶାକରେ କ୍ଷମା ଦେବ ବୋଲି ॥

ମଧୁମୟ ତୁମ ଦାମ୍ପତ୍ୟ ଜୀବନ

ହେଉ କଟୁ ଦିନ ଆନନ୍ଦରେ ।

ଯଦି ପାର ସ୍ଥାନ ଦେବ ଏ ଆମର

ଅତୀତ ସ୍ମୃତିକୁ ହୃଦୟରେ ॥

******