ମା ପରି କିଏ ହେବ

ମା ଅର୍ଥ ମାଟି ଆରେ ଆକାଶ

ସୁଦୂର ପ୍ରସାରି ସିଏ,

କିଏ ସେ ମାପିବ ସେ ହୃଦ ମମତା

ଅସରନ୍ତି ପରା ସିଏ |

କେତେ ପୂଜାର୍ଚ୍ଚନା କେତେ ମାନସିକ

ସନ୍ତାନଟିଏ ପାଇଁ,

ଦଶ ମାସର ସେ ଗର୍ଭ ଯନ୍ତ୍ରଣାକୁ

ହସି ହସି ଯାଏ ସହି |

ଧାରଣ ପାଳନ ପୋଷଣ ଦେଇ ସେ

ଛୋଟରୁ କରଇ ବଡ,

ଅନ୍ତର ଭରା ବାତ୍ସଲ୍ୟ ମମତା

କିଏ ଦେବ ତାର ମୂଲ |

ବିଶ୍ୱ ନିୟନ୍ତାଙ୍କ ଚରଣାର ବିନ୍ଦେ

ସଞ୍ଜ ସଳିତା ଜାଳି,

ଲଭୁ ତା ସନ୍ତାନ ଯଶ ଓ ବିଭବ

ଏତିକି କରଇ ଅଳି |

ଲୋଡ଼େ ନା ସେ ଅର୍ଥ ଚାହେଁନା ସେ ସ୍ୱାର୍ଥ

ତ୍ୟାଗ ଅଟେ ତା ମହାନ,

କିଏ ସେ ବିନ୍ଧାଣି ଗଢ଼ିଛି ତାହାକୁ

ଧନ୍ୟ ତାହାର ଭିଆଣ |

ନିଖିଳ ପାବନୀ ବିଶ୍ୱ ପ୍ରସବିନୀ

ମା ର ବନ୍ଦନା ପାଇଁ,

ଆସରେ ସର୍ବେ କରିବା ତା ପୂଜା

ତାର ଶ୍ରୀ ଚରଣେ ଯାଇ |

ମା' ର ଆଶିଷ ଆମ ଚଲା ପଥେ

ସର୍ବଦା ସହାୟ ହବ,

ଲୋଡ଼ା ନାହିଁ ଧନ ଯଶ ଓ ବିଭବ

ମା ପରି କିଏ ହବ |

ଶୈଳେନ୍ଦ୍ର କୁମାର ପତି