ସୁନାମ ଅର୍ଜନ କର
ସୁନାମ ଅର୍ଜନ କର
ଯେତେ ଦିନ ଯାଏଁ ରହିଥିବ ପାଶେ
ଈର୍ଷା ଗର୍ବ ଅହଙ୍କାର ।
ଜାତିର ଉନ୍ନତି ଅସମ୍ଭବ ଜାଣ
ହେତୁକର ବାରମ୍ବାର ।
ପରର ଉନ୍ନତି ଦେଖି ଯଦି କେବେ
କରୁଥାଅ ତୁମେ ଈର୍ଷା ।
ନିଶ୍ଚିତ ଜଗତେ ତୁମ ଛଡା ଆଉ
କିଏ ହେବ ଲୋକହସା।
ଅନ୍ୟର କ୍ଷତିରେ ଯଦି ହସୁଥାଅ
ଏହା ନୁହଁ ତୁମ ଧର୍ମ ।
ପଦାଘାତ ତୁମେ ନିଶ୍ଚେ ହେବ ଜାଣ
କହିରଖେ ତୁମ କର୍ମ ।
ଭାବୁଛ ନିଜକୁ ଅନ୍ୟଠୁ ଚାଲାକ
କରିକରି ଅପକର୍ମ ।
ସେହି ଅପକର୍ମ ତୁମ ପାଇଁ ନିଶ୍ଚେ
ପାଳଟିବ କାଳଯମ।
ଲୁଚାଉଛ ଯଦି ସତ୍ୟକୁ ତୁମର
କହି ସଦା ମିଥ୍ୟା ବାଣୀ ।
ଫଳ ତ ଭୋଗିବ ଏଇ ଜନମରେ
ବଞ୍ଚି ଥାଅ ଦିନ ଗଣି ।
ଦୁର୍ନୀତି ପଥରେ ଆଗେଇ ଯିବାକୁ
କରୁଛ ଯଦି ମନସ୍ଥ ।
ହଟିଯାଅ ତୁମେ ପଛକୁ ପଛକୁ
ସୁକାର୍ଯ୍ୟରେ ହୁଅ ନ୍ୟସ୍ତ ।
ନିଜ ହିତ ପାଇଁ ପର କ୍ଷତି କରେ
ଏଇ ଜନମରେ ଯିଏ ।
ନିଶ୍ଚେ ନର୍କ ଭୋଗ କରିଥାଏ ଜାଣ
ମରିବା ଆଗରୁ ସିଏ ।
ଗୁରୁଜନ ସହ ମାତାପିତାଙ୍କୁ ଯେ
ସଦା କରିଚାଲ ଭକ୍ତି ।
ଜୀବନ ପଥରେ ଆଗେଇ ଯିବାକୁ
ନିଶ୍ଚେ ମିଳିଯିବ ଶକ୍ତି ।
ଗୁରୁଜନଙ୍କର ବିଶ୍ବାସରେ ଯଦି
ଯିଏ ଦେଉଥାଏ ବିଷ ।
ତା'ଜୀବନର ଅନେକ କାହାଣୀ
ଅଦିନରେ ହେବ ଶେଷ ।
ଜାଣି ଜାଣି କେତେ ଏଇ ସମାଜରେ
କରିଥାନ୍ତି କେତେ ଭ୍ରମ ।
ସେଇ ଲୋକମାନେ ଦୁଃଖଯନ୍ତ୍ରଣାରେ
କାଟୁଥାନ୍ତି ଇହ ଧାମ।
ସେଥିପାଇଁ ସଦା ମାନବ ସେବାରେ
ଦିଅ ନିଜ ତନମନ।
ଗୁରୁ ସାଥେ ଯେତେ ରହିଛନ୍ତି ଜନ
ସଭିଙ୍କୁ ଦିଅ ସମ୍ମାନ ।
ପର ଜନ୍ମକଥା କିଏ ବା ଦେଖିଛି
ଏଇ ଜନମକୁ ଦେଖ ।
ଭଲ କାମ କରି ଏ ମର୍ତ୍ତ୍ୟ ମଣ୍ଡଳେ
ନିଜର ସୁନାମ ରଖ ।
ଶ୍ରୀ ଡମ୍ବରୁଧର ବାଗ
ଚପ୍ରିଆ, ଗୋଲାମୁଣ୍ଡା, କଳାହାଣ୍ଡି