ମିଳିଯାଅ ମୋର ପାଶେ

ଆଶାଅଛି ମୋର ଥରୁଟେ ଦେଖିବି

ତୁମରି ମୋହନ ରୂପ ,

କୃପାକର ନାଥ, ଅଚିରେ ସଫଳ

ହୋଇଯାଉ ମୋର ତପ ।

ବାଳୁତ କାଳରୁ ତୁମ୍ଭଙ୍କୁ ଚିହ୍ନିଛି

କହିଛନ୍ତି ପିତା-ମାତା ,

ଛାଇଭଳି ତୁମେ ଜଗି-ରହିଥାଅ

ଭକତକୁ ଆହେ ଧାତା ।

ଜଳ,ସ୍ଥଳ,ବନ,ଅକାଶ ଗଢ଼ିଛ

କେଡ଼େ କଉଶଳେ ତୁମେ ,

ଆତଯାତ ହୋ'ନ୍ତି ଗ୍ରହ ଉପଗ୍ରହ

ତୁମରି ଇଙ୍ଗିତ କ୍ରମେ ।

କେଡ଼େ କଉଶଳେ ଗଢ଼ି ପୁଣି ମୋତେ

ମୋ ଭିତରେ ଅଛ ରହି ,

ତୁମ କରୁଣାରୁ ଅସୀମ ଯାତନା

ହସି ହସି ଯାଏ ସହି ।

କୋଉ ଦରବରେ ମନବଳେ ନାହିଁ

ରହିଅଛି ତୁମ ଆଶେ ,

ଇଚ୍ଛାମୟ ବାରେ ଇଚ୍ଛା ପୂର୍ଣ୍ଣକର

ମିଳିଯାଅ ମୋର ପାଶେ ।।

ବି. ନିରୁପମା,

ମାମୁରିଆ, ଛେଣ୍ଡିପଦା,ଅନୁଗୋଳ।