ଅସ୍ମିତା ଓଡିଶାର
ଅସ୍ମିତା ଓଡିଶାର
ସରଗ ସୁଷମା ଶୀରି ଉଣା ହେବ ଅତୁଲ୍ୟ ଓଡିଶା ଭୂଇଁ
ଜଗତର ନାଥ ଜଗନ୍ନାଥ ବିଜେ ମର୍ତ୍ୟରେ ଉପମା ନାହିଁ !
ଉଡ୍ର ଓଡିଶା ଉତ୍କଳ କଳିଂଗ ମୋ ପ୍ରିୟ ଜନମ ମାଟି
ପୂରୁବ ରାଇଜ ଉତ୍ତର ଦକ୍ଷିଣ ସମାହାର ତା ସଂସ୍କୃତି ।
ନୈସର୍ଗିକ ଶୋଭା ଭରା ରାଇଜର ଚାରୁ ଚିତ୍ରପଟ ଦେଖି
କଳା ସ୍ଥାପତ୍ୟ ସଂସ୍କୃତି ଧରମ କରମ ହୋଇ ପରଖି ।
ସାଗର ସୈକତ କାହିଁ ଗିରିବର କାହିଁ ସବୁଜିମା ଶୋହେ
କୁଳୁନାଦେ ବହେ ନିର୍ଝରିଣୀ ଝର ସାଗରେ ମିଶିବା ଯାଏ ।
ଅଲିଭ ରିଡଲେ କଛପ ଗହୀରମଥା ମଣେ ନିରାପଦ
ସାଇବେରିଆର ପକ୍ଷୀ ଚିଲିକାରେ ନମଣେ କାହିଁ ବିପଦ ।
ସ୍ୱାଧୀନତା ତା'ର ଦେବନାହିଁ ଦୟାନଦୀ ଶୋଣିତେ ଭରିଲା
ଶାନ୍ତିପ୍ରିୟ ରାଜ୍ୟ ଚଣ୍ଡାଶୋକେ ଧର୍ମାଶୋକ ପରିଣତ କଲା।
ମଧୁର ତାହାର ଭାଷା ସଂସ୍କୃତି ସମ୍ପର୍ଣ୍ଣ ମର୍ଯ୍ୟଦା ପ୍ରାପ୍ତ
କବିତା ସମ୍ଭାର ସଂଗୀତ ମଧୁର ଝଂକାର ପରିବ୍ୟାପ୍ତ ।
ଗଂଗାଠାରୁ ଗୋଦାବରୀ ଯାଏ ଥିଲା ସୀମା ସରହଦ ଦିନେ
ବିଜୟ ବାହୁଡା ବିଜୟ ନଗର ମେଦିନାପୁର ପ୍ରଗନେ ।
ପୂର୍ବ ଶୂରୀ ଆମ ଜାଭା ବୋର୍ଣିଓ ସୁମାତ୍ରା ଦ୍ୱୀପକୁ ଯାଇ
ବାଣିଜ୍ୟ ବ୍ୟାପାରେ ଧନ ଦଉଲତ ଅରଜନ କରିଥାଇ ।
କଳା ସଂସ୍କୃତି ଆଦାନ ପ୍ରଦାନ କରୁଥିଲେ ଦେଶ ଦେଶ
ଓଡିଶୀ ସଂଗୀତ ଓଡିଶୀ ନୃତ୍ୟ ବୈଜ୍ଞାନିକ ଧାରା ରସ ।
'ଉଡିୟା ଏକଟା ସ୍ୱତନ୍ତ୍ର ଭାଷା ନୟ' ପ୍ରତିବେଶୀ କହି
ଜାତି ପ୍ରେମ ବହ୍ନି ପ୍ରଜ୍ୱଳିତ କଲା ସମ୍ମିଳନୀ ଗଢା ହୋଇ ।
ଉନବିଂଶ ଶଦି ଶଡତ୍ରିଂଶ ସାଲ ଭାଷା ଭିତ୍ତିକ ପ୍ରଦେଶ
ବହିଛି ଦେଶର ପ୍ରଥମ ହେବାର ଗୌରବାବହ ସଂଦେଶ !
ଅସ୍ମିତା ସୁମରି ଜାଗ ଉତ୍କଳୀୟ ସ୍ୱାଭିମାନୀ ଦିଗ୍ଗଜ
ବନ୍ଦେ ଉତ୍କଳ ଜନନୀ ଗାଇବା ଉଦାତ୍ତ କଣ୍ଠରେ ଆଜ ।
-ବିଶ୍ୱେଶ୍ଵର ମାଝୀ-