ସମ୍ବନ୍ଧ

ସମ୍ବନ୍ଧ ବି ଦୁଇ ପର୍ଯ୍ୟାୟକୁ ନେଇ ସଂସାରେ ରଚଇ ଖେଳ

କେଉଁଠି ଅବଶ୍ୟ ଢାଳଇ ପିୟୁଷ କେଉଁଠି ଢାଳେ ଗରଳ ।

ଜୀବର ସମ୍ବନ୍ଧ ପରମେ ନିବିଦ୍ଧ ସେ ଲାଗି ପ୍ରକୃତି ଗଢା

ଜୀବ ଦୋଷପୂର୍ଣ୍ଣ ହେଲେ ପରମବ୍ରହ୍ମ କରେ ନାହିଁ ହାତ ଛଡା ।

ଏଥିପାଇଁ ସିନା ସୃଷ୍ଟିହେଲା କ୍ଷମା, ଦେବା, ନେବା ଛଇଛାପ

ସମ୍ବନ୍ଧ ଯୋଗୁହିଁ ସୃଷ୍ଟି ଅଛି ପାଇ ମହନୀୟତାର ରୂପ ।

ଦାନଭାବେ ଏଇ ସମ୍ବନ୍ଧ ରାଜଇ ଉଦିତ ସୂରୁଜ ପରି

ପ୍ରତିଦାନ ଆଶା ରଚେ ଅମାବାସ୍ୟା ସମ୍ବନ୍ଧେ ବିକଳ କରି ।

ସମ୍ବନ୍ଧର ଗୁଢ଼ ଅର୍ଥରେ ହିଁ ମୁଢ଼ ପାଏ ଫଳ ଚତ୍ତୁବର୍ଗ

ଅନ୍ୟଥା ଜୀବନ ଘୁର୍ଣ୍ଣାୟମାନ କଦର୍ଥିତ ସଉଭାଗ୍ୟ ।

ଶତ୍ରୁତା, ମିତ୍ରତା ଦ୍ବିଭାଗ ଆଶ୍ରିତା ହୋଇଛି ସମ୍ବନ୍ଧ ସିନା

ଶତ୍ରୁତାରେ ହୃଦ ହୁଏ ସଦା ଦଗ୍ଧ ଧରି ବିନାଶ କାମନା ।

ମିତ୍ରତା ସଦାହିଁ ହୃଦୟ ମୋହଇ କଳ୍ପନାରେ ରଙ୍ଗ ଭରି

ଯା' ହେଉ ସମ୍ବନ୍ଧ ଚିନ୍ତନେ ଆବଦ୍ଧ ରୁହଇ ଜୀବନ ଭରି ।