ବଦଳି ଯାଇଛି ମୋ ଗାଆଁ
ବଦଳି ଯାଇଛି ମୋ ଗାଆଁ
ସମୟ ଯାଇଛି ବଦଳି
ତା ସହିତ ତାଳ ଦେଇ
ଦୃତ ଗତିରେ ବଦଳୁଛି
ଏଇ ମଣିଷ ଜୀବନର ସଂଜ୍ଞା
ଆଉ ଆମ ଗାଆଁର ଚିତ୍ର ।
କେତେ ତଫାତ୍ ସତରେ
ସେଦିନ ଆଉ ଆଜିର ଭିତରେ ?
ଏବେ ତ ମଣିଷର
ପାରମ୍ପରିକ ସମ୍ପର୍କର
ରଜ୍ଜୁ ସବୁ ଗଲାଣି ଛିଡି,
ସମସ୍ତ ସାମାଜିକ ବଂଧନ
ଗଲାଣି ଭାଙ୍ଗି ।
ସ୍ଵାର୍ଥପରତାକୁ ସମସ୍ତେ
ଏବେ କରି ନିଜର
ଗାଆଁରେ ଥିବା ପୂର୍ବର
ସେଇ ଭାଇଚାରା ସହ
ସ୍ନେହ ପ୍ରେମ ଭଲପାଇବା
ସବୁ ଆସ୍ତେ ଆସ୍ତେ
ପାଇଲାଣି ଲୋପ ।
ଯୌଥ ପରିବାର ସବୁ
ଭାଙ୍ଗିଭୁଙ୍ଗି ଏବେ ଅବକ୍ଷୟମୁଖୀ
ପରିବାର କହିଲେ ଏବେ
ବୁଝାଉଛି କେବଳ କ୍ଷୁଦ୍ର
ଏକକ ପରିବାର ମାତ୍ର ।
ଗୋଧୂଳି ସମୟରେ
ଦେଖା ଯାଉନି ଆଉ
ଗାଆଁ ଦାଣ୍ତରେ ଗୋରୁ ଗାଈଙ୍କ
ପୂର୍ବର ସେଇ ଭିଡ ।
ବଳଦଗାଡ଼ି ସହ ହଳ ଲଙ୍ଗଳ
ଆଦି ଚିଜ ଦେଖିବା
ହେଲାଣି ସତ ସପନ,
ଗାଆଁ ପୋଖରୀ ତୁଠ
ଏବେ ପୋତି ହୋଇ
ଝୁରୁଛୁ ତା ପୂର୍ବ ଅତୀତ ଗୌରବ ।
ସଂଧା ହେଲେ ଘର ସାମ୍ନାରେ
ଥିବା ତୁଳସୀ ଚଉରା ମୂଳେ,
ଆଗର ସେ ଝିଅ ବୋହୂଙ୍କ
ଭିଡ ଅଦୌ ଜମୁନାହିଁ ।
ଗାଆଁ ଭାଗବତ ଟୁଙ୍ଗୀରେ
ଆଜିଜାଲି ପୁରାଣ ଭାଗବତ
ପଢା ହେଉନାହିଁ ।
ଏବେ ପାଲଟି ଯାଇଛି
ତାହା ନିଶାଡିଙ୍କ ଆଡ୍ଡା ।
ପର୍ବ ପର୍ବାଣୀରେ ଆଉ
ବନ୍ଧୁ ବାନ୍ଧବଙ୍କୁ ବି
କେହି ଲୋଡୁନାହିଁ ।
ଅଧୁନିକତାକୁ କରି ନିଜର
ସମସ୍ତେ ଏବେ ଗାଆଁ ଛାଡି
ସହର ମୁଖି ନିଶାରେ
ହୋଇଛନ୍ତି ମସ୍ତ ।
ଗାଆଁରେ ଏବେ ରହିଥିବା
କିଛି ଅସହାୟ ମଣିଷ
ଖୁବ୍ ସୁଖ ଶାନ୍ତିରେ ଥିବାର
ସୁନ୍ଦର ଭର୍ ପୁର୍
ଅଭିନୟ କରିବାରେ ବ୍ୟସ୍ତ ।
ପ୍ରଶାନ୍ତ କୁମାର ବେହେରା
ଅଧ୍ୟାପକ , ରାଜନୀତି ବିଜ୍ଞାନ ବିଭାଗ,
ସ୍ୱାମୀ ବିବେକାନନ୍ଦ ସ୍ମାରକ ସ୍ୱୟଂଶାସିତ ମହାବିଦ୍ୟାଳୟ,
ଜଗତସିଂହପୁର ।
ଦୂରଭାଷ - ୯୪୩୭୧୩୫୯୧୬